យុវតីវ័យ១៨ឆ្នាំ Sunisa Lee ដែលជាជនជាតិម៉ុង ក្នុងប្រទេសឡាវ រកបានមេដាយ២ម្នាក់ឯងឱ្យសហរដ្ឋអាមេរិក ក្នុងព្រឹត្តិការណ៍កីឡាអូឡាំពិកឆ្នាំ២០២០ Olympic Games 2020 នៅទីក្រុងតូក្យូ ប្រទេសជប៉ុន។
កីឡាការិនីដែលមានឈ្មោះដើម Sunisa Phabsomphou បានឈ្នះមេដាយមាសក្នុងកីឡាកាយសម្ព័ន្ធវិញ្ញាសា Women’s artistic individual all-around នៅល្ងាចថ្ងៃព្រហស្បតិ៍ នេះដែលមានពិន្ទុសរុប ៥៧.៤៣៣ ច្រើនជាម្ចាស់មេដាយប្រាក់ប្រេស៊ីល Rebeca Andrade ដែលមាន៥៧.២៩៨ ពិន្ទុ និងមេដាយសំរឹទ្ធរបស់រុស្ស៊ី Angelina Melnikova មានពិន្ទុ៥៧.១៩៩។ វិញ្ញាសានេះមានអ្នកចូលរួមរហូតដល់២៤នាក់ឯណោះ។
ចំណែកមេដាយ១ទៀតគឺឈ្នះមេដាយប្រាក់ក្នុងវិញ្ញាសាក្រុម Women’s artistic team all-around កាលពីថ្ងៃអង្គារ កន្លងទៅនេះ ដែលមានគ្នា៤នាក់ ជាមួយដៃគូ Simone Biles,Jordan Chiles និង Grace McCallum មាន១៦៦.០៩៦ ពិន្ទុ ខណៈមេដាយមាសបានទៅក្រុមរបស់រុស្ស៊ី មាន១៦៩.៥២៨ពិន្ទុ។
នាង Sunisa Lee មានម្តាយឈ្មោះ Yeev Thoj ដែលបានធ្វើដំណើរទៅកាន់សហរដ្ឋអាមេរិកតាំងពីអាយុ១២ឆ្នាំ ក្នុងឆ្នាំ១៩៨៧ មកម៉្លេះ ជាមួយជនជាតិម៉ុង ផ្សេងទៀតនៅទីក្រុង Saint Paul រដ្ឋ Minnesota។ នាងបានជាប់ឈ្មោះក្នុងជម្រើសជាតិអាមេរិក តាំងពីឆ្នាំ២០១៩ មកម៉្លេះ គឺនៅឆ្នាំដែលឪពុកនាងស្លាប់ដោយសារធ្លាក់ពីលើដើមឈើដែលព្យាយាមជួយសង្គ្រោះមិត្តភក្ដិខ្លួននៅគ្រានោះ។
បច្ចុប្បន្នមានជនជាតិម៉ុង ប្រមាណជាង៣០ម៉ឺននាក់ដែលរស់នៅសហរដ្ឋអាមេរិក ដែលភាគច្រើនក្នុងរដ្ឋ California, Minnesota និងWisconsin ហើយនាង Sunisa Lee ជាជនជាតិម៉ុង មុនគេដែលឈ្នះមេដាយមាសនៅអូឡាំពិក៕
