Thursday, December 8 Login

មនុស្ស​ស្រី​សម័យ​ថ្មី​កុំ​ខ្វល់ខ្វាយ​ច្រើន​លើ​រូប​រាង​​និង​សម្រស់​ខាង​ក្រៅ​ ព្រោះ​បច្ចុប្បន្ន​ចង់​ស្អាត​អាច​ស្អាត​តុបតែង​ខ្លួន​ដោយ​គ្រឿង​សម្អាង​ទៅ​ប្រាកដ​ជា​លេច​ចេញ​សម្រស់​ដ៏​លេចធ្លោរ​ជាក់​ជា​មិន​ខាន។ ​មួយ​វិញ​ទៀត​ឈប់​គិត​ទៀត​ទៅ​ថា​ខ្លួន​ឯង​មិន​ស្អាត​ដូច​គេ​ គ្មាន​សិទ្ធិ​បាន​បុរស​ល្អ​មក​ធ្វើ​ជា​គូគ្រង​។ សូម​និយាយ​ថា​សម័យ​នេះ​ទៅ​ហើយ​អង្គុយ​រង់ចាំ​ឱ្យ​បុរស​ៗ​ចូល​មក​សុំ​ស្នេហ៍​យើង​មុន​នោះ​វា​ងាយ​ពេក​ហើយ​ យើង​ត្រូវ​តែ​ធ្វើ​ឱ្យ​គេ​ឃើញ​ពី​តម្លៃ​របស់​យើង​ថា​មិន​មែន​ជា​របស់​ធម្មតា​លក្ខណៈ​ Limited Edition មិនមែន​រក​បាន​ងាយ​ៗ​នោះ​ទេ​ ចង់​បាន​ត្រូវ​តែ​ព្យាយាម​បន្តិច​។ ចង់​ដឹង​ទេ​ថា​ចង់​កសាង​ខ្លួន​ឱ្យ​មាន​តម្លៃ​បែប​ណា​?​ លេង​ចរិត​ធ្វើ​ដូច​មិន​ចាប់​អារម្មណ៍​របៀបណា​? ទើប​​តែ​ធ្វើ​ឱ្យ​បុរស​ៗ​ឈ្លក់​វង្វេង​ហើយ​រត់​មក​រក​អ្នក​ដោយ​ខ្លួន? ថ្ងៃ​នេះ​ត្រយង​មាន​តិចនិក​ពិសេស​ចំនួន​៥​មក​ចែក​ជូន​៖

១./ ពេល​គេ​ផ្ញើរ​សា​មក​តប​យឺត​បន្តិច​ក៏​បាន​ដែរ​ ឱ្យ​គេ​ដឹង​ថា​យើង​មិនមែន​រង់ចាំ​ឆ្លើយតប​តែ​សារ​គេ​ម្នាក់​នោះ​ទេ​!​

តិចនិក​លេង​ចរិត​ទីមួយ​ធ្វើ​​ឱ្យ​ខ្លួន​យើង​មាន​តម្លៃ​ សុំ​សួរ​តាម​ត្រង់​ពេល​បុរសៗ​គេ​ផ្ញើ​ DM មក (Direct Message) តើ​នារី​ៗ​គ្នា​យើង​ប្រញាប់​ចូល​ទៅ​អាន​ហើយ​ឆ្លើយ​តប​នឹង​គេ​ភ្លាម​ៗ​មែនទេ?​ ចម្លើយ​មិន​បាច់​គិត​គឺ​ «ពិតមែន​» បើ​ដូច្នេះ​សូម​រៀបចំ​ខ្លួន​សារ​ជា​ថ្មី​ ទោះ​ជា​ការ​ប្រញាប់​មើល​ប្រញាប់​ឆ្លើយ​តប​គឺ​ជា​ការ​បង្ហាញ​ថា​យើង​យក​ចិត្ត​ទុក​ដាក់​ចំពោះ​គេ​ខ្លាំង​ប៉ុណ្ណា​ក៏​ដោយ តែ​ជួន​កាល​ ទង្វើ​របស់​យើង​ធ្វើ​ឱ្យ​បុរស​ដែល​គេ​ចាប់​អារម្មណ៍​លើ​យើង​គិតថា​យើង​ទំនេរ​ជ្រុល​ ឬ​អាច​ជា​មនុស្ស​គ្មាន​មិត្តភក្ដិ​សេពគប់​ ទើប​មាន​ពេលវេលា​ច្រើន​សម្រាប់​គេ​។ ចំណុច​នេះ​ប្រញាប់​បោះ​ចោល​ទម្លាប់​បែប​នោះ​ភ្លាម​ វិធី​ដ៏​ល្អ​ មុន​នឹង​ឆ្លើយ​តប​ទុក​រយៈ​ពេល​ឱ្យ​មាន​គំលាត​យូរ​បន្តិច​ ធ្វើ​ឱ្យ​គេ​មាន​អារម្មណ៍​ជា​រង់ចាំ​ខ្លះ ដើម្បី​ឱ្យ​គេ​បាន​ភ្លក់​រសជាតិ​ពេល​ដែល​យើង​រង់ចាំ​សារ​របស់​គេ​តើ​មាន​អារម្មណ៍​អន្ទះសា​​បែប​ណា​ខ្លះ​​ ។

២. (Push&Pull) រុញ​ និង​ទាញ​ ទុក​ចន្លោះ​ដើម្បី​ទាញ​គេ​ចូល​ជិត​ខ្លួន​យើង​ឱ្យ​កាន់​តែ​ជិត​

នារី​ៗ​គ្នា​យើង​មាន​ដែល​ធ្លាប់​ឮ​ទ្រឹស្ដី​ Push & Pull ខ្លះ​ដែរ​ទេ​? ទ្រឹស្ដី​​នេះ​គេ​ហៅ​ងាយៗ​ថា​ល្បែង​ទាញព្រ័ត្រ​ស្នេហា​។ ជួន​កាល​បើ​មនុស្ស​ស្រី​យើង​មាន​អារម្មណ៍​ថា​បុរស​ដែល​យើង​កំពុង​ប្រតិព័ទ្ធ​ចូល​មក​កាន់​តែ​ជិត​យើង​ យើង​គួរ​តែ​រុញ​គេ​ចេញ​ឬ​ក៏​ទុក​ចន្លោះ​រវាង​គ្នា​នឹង​គ្នា​ ធ្វើ​បែប​នេះនឹង​ធ្វើ​ឱ្យ​គេ​កាន់​តែ​ព្យាយាម​ចូល​មក​ក្បែរ​យើង​ តែ​បើសិន​ជា​មើល​ទៅ​ឃើញ​គេ​ចាប់​ផ្ដើម​ធ្វើ​ខ្លួន​ឃ្លាត​ឆ្ងាយ​ចូរ​ប្រើ​យុទ្ធសាស្ត្រ​ទាញ​ឱ្យ​គេ​ត្រលប់​មក​ក្បែរ​ខ្លួន​យើង​វិញ​។ វិធី​សាស្ត្រ​នេះ​ត្រូវ​មើល​លើ​ពេល​វេលា​ឱកាស​និង​កាលៈទេសៈ​ដែរ​មិន​អាច​ចេះ​ប្រើ​ញឹកញាប់​ពេក​នោះ​ទេ​ព្រោះ​អាច​នឹង​ធ្វើ​ឱ្យ​គេ​ធុញ​ចប់​ហើយ​គិត​ថា​យើង​មាន​ជំងឺ​សរសៃ​ប្រសាទ​ផង​ក៏​ថា​បាន​ ដូច្នេះ​មុន​នឹង​ប្រើ​ត្រូវ​គិត​គូ​ឱ្យ​ល្អិតល្អន់​ផង​

៣. ធ្វើ​ខ្លួន​ជា​មនុស្ស​អាថ៌កំបាំង​ដើម្បី​ឱ្យ​គេ​មាន​អារម្មណ៍​ដូច​ជា​ព្រានតាមប្រមាញ់​

មនុស្ស​ប្រុស​ភាគ​ច្រើន​ចូលចិត្ត​អារម្មណ៍​ជា​ព្រានព្រៃ​ ព្រោះ​ពេល​ដែល​គេ​ចូល​ទៅ​ញ៉ែ​ឬ​សុំ​ស្នេហ៍​នារី​ណា​ម្នាក់ គេ​សុខ​ចិត្ត​លះបង់​គ្រប់​យ៉ាង​ដើម្បី​ឱ្យ​បាន​បេះដូង​របស់​នាង​មិន​ថា​កម្លាំង​កាយ​និង​កម្លាំង​ចិត្ត​។ ដូច្នេះ​បើ​សិន​ជា​មនុស្ស​ស្រី​យើង​ធ្វើ​ខ្លួន​​ជា​មនុស្ស​អាថ៌កំបាំង​ប្រៀប​ដូច​ជា​កូន​ម្រឹគ​នឹង​កាន់​តែ​ធ្វើ​ឱ្យ​ចង់​ស្គាល់​ចង់​ជិតស្និទ្ធ​ថែម​ទៀត​ ហេតុនេះ​កុំ​ព្យាយាម​និយាយ​ប្រាប់​គេ​ឱ្យ​អស់​ពី​ខ្លួន​អ្នក​ តែ​ត្រូវ​ធ្វើ​ឱ្យ​គេ​កើត​ក្ដី​សង្ស័យ​ហើយ​ព្យាយាម​ស៊ើប​សួរ​ពី​អ្នក​ប្រសើរ​ជាង។ វិធី​សាស្ត្រ​នេះ​នឹង​ធ្វើ​ឱ្យ​បុរស​​ដែល​មក​ស្រលាញ់​អ្នក​គិតថា​អ្នក​ជា​មនុស្ស​ស្រី​មាន​តម្លៃ​គួរ​ឱ្យ​ចង់​ស្វែង​យល់​កាន់​តែ​ចង់​ដឹង​ពី​អ្នក​ច្រើន​ប៉ុណ្ណា​គេ​កាន់​តែ​លង់​ស្នេហ៍​លើ​អ្នក​ ហើយ​នេះ​គឺជា​មន្ត​ស្នេហ៍​ដ៏​ទាក់ទាញ​មួយ​សម្រាប់​មនុស្ស​ស្រី​ដែល​នឹង​ធ្វើ​ឱ្យ​បុរស​លង់​ស្នេហ៍​អ្នក​​ដក​ចិត្ត​​មិន​រួច​។

៤. ឈប់​ធ្វើ​ខ្លួន​ដូច​នំ​ឆាខ្វៃ​ជាប់​គ្នា​រហូត​ ត្រូវ​មាន​ពេលវេលា​សម្រាប់​ខ្លួន​ឯង​ខ្លះ

ច្បាប់​ដ៏​សំខាន់​សម្រាប់​នារី​ដែល​ចង់​លេងចរិត​ឱ្យ​គេ​ចាប់​អារម្មណ៍​សូម​ឈប់​ធ្វើ​ខ្លួន​ដូច​នំឆាខ្វៃ​ព្យាយាម​នៅ​ជាមួយ​គេ​គ្រប់​ពេលវេលា​ ទោះ​ជា​អ្នក​ចាប់​អារម្មណ៍​បុរស​ម្នាក់​នោះ​តែ​កុំ​ព្យាយាម​ចូល​ទៅ​ក្បែរ​គេ​ឬ​ទៅ​ណាមក​ណាជាមួយ​គេ​រហូត​ ព្រោះ​បើ​អ្នក​ធ្វើ​បែប​នេះ​នឹង​ធ្វើ​ឱ្យ​គេ​គិតថា​អ្នក​ជា​មនុស្ស​ស្រី​ចិត្ត​ងាយ​ ចង់​គេ​ធ្វើ​អ្វី​ក៏​បាន​ ដូច្នេះ​ពេល​ដែល​គេ​ខល​មក​បបួល​មិន​ចាំ​បាច់​ត្រូវ​ OK រហូត​នោះ​ទេ​ Say No ខ្លះ​ដើម្បី​ឱ្យ​គេ​ដឹង​ថា​យើង​មិនមែន​មាន​ពេលវេលា​សម្រាប់​តែ​គេ​ម្នាក់​នោះ​ទេ​ តែ​យើង​មាន​ការងារ​ផ្សេងៗ​ក្នុង​ជីវិត​ដែល​ត្រូវ​បំពេញ​ដូច​គ្នា​។ អ្នក​សាក​ធ្វើ​បែប​នេះ​នឹង​ធ្វើ​ឱ្យ​បុរស​ជា​អ្នក​ព្យាយាម​ចូល​មក​ក្បែរ​អ្នក​វិញ​

៥. កុំ​ចេញ​ចរិត​ហ្ស៊ីន​ឱ្យ​គេ​ដឹង​ថា​យើង​ចូលចិត្ត​គេ​ខ្លាំង​ជា​ដាច់​ខាត​

ឈប់​សិន​កញ្ញាៗ!​ ទោះ​ជា​អ្នក​និង​បុរស​ដែល​អ្នក​ពេញចិត្ត​មាន​ចិត្ត​ដូច​គ្នា​ បាន​សេចក្ដី​ថា​អ្នក​ចូលចិត្ត​គេ​ចំណែក​គេ​ក៏​ចូលចិត្ត​អ្នក​តែ​អ្នក​ត្រូវ​ចេះ​ចាប់​ហ្វ្រាំង​កុំ​បញ្ចេញ​អស់​ពេក​ព្រោះ​អាច​នឹង​ធ្វើ​ឱ្យ​ពួក​គេ​យល់​ថា​គេ​អាច​យក​ចិត្ត​អ្នក​បាន​ហើយ តទៅ​គេ​នឹង​លែង​ព្យាយាម​ធ្វើ​អ្វី​ទាំងអស់​។ ដើម្បី​បង្ការ​ចំណុច​នេះ​នារី​គួរ​ចាំ​បើ​សិន​មិន​ទាន់​បើកចំហ​សេពគប់​គ្នា​ជា​សង្សារ​ឬ​ក្នុង​ឋានៈ​ច្បាស់លាស់​ណាមួយ​មិន​គួរ​បង្ហាញ​ចរិត​ហ្ស៊ីន​ឱ្យ​ដឹង​ពី​ចិត្ត​យើង​ទាំង​ស្រុង​ដូច​ជា​ការ​ខល​ការ​ផ្ញើ​សារ​ឬ​ទៅ​រក​គេ​ញឹកញាប់​ពេក​នឹងធ្វើ​ឱ្យ​គេ​ធុញ​ហើយ​រត់​គេច​ចេញ​ពី​អ្នក​ក៏​ថាបាន​ខណៈ​ដែល​សម្ព័ន្ធភាព​​នៅ​កណ្ដាល​ទី​។

Share.

Leave A Reply