ក្រោយបញ្ចប់បេសកកម្មប្រកួតក្នុងព្រឹត្តិការណ៍កីឡាអូឡាំពិក Olympic Games 2020 នៅទីក្រុងតូក្យូ កាលពីពេលថ្មីៗ កីឡាករ ប៉ែន សុខគង់ ត្រូវបន្តហ្វឹកហាត់នៅប្រទេសជប៉ុន រហូតដល់ស៊ីហ្គេមឆ្នាំ២០២២ នៅប្រទេសវៀតណាម ខាងមុខ។
យោងតាមការបញ្ជាក់របស់អតីតកីឡាការិនីវាយកូនគោល និងអត្តពលកម្មកម្ពុជា ចាន់ លីណា ដែលមានម្តាយជាជនជាតិខ្មែរ និងឪពុកជាជនជាតិជប៉ុន ដែលរស់នៅប្រទេសជប៉ុន លើកឡើងនៅលើហ្វេសប៊ុករបស់នាងថា៖«កីឡាករ ប៉ែន សុខគង់ មិនធ្វើដំណើរត្រឡប់ទៅមាតុភូមិវិញជាមួយនឹងប្រតិភូកម្ពុជា នោះទេ ព្រោះពួកយើងនៅទីនេះជួយគាំទ្រដល់ការស្នាក់នៅហូបចុក ហ្វឹកហាត់របស់គេរហូតដល់ស៊ីហ្គេម ឆ្នាំ២០២២ នៅវៀតណាម។ គាត់នឹងរស់នៅទីក្រុង Kanagawa Prefecture។ អរគុណគ្រប់គ្នាដែលតែងតែគាំទ្រ»។
អត្ថបទពាក់ព័ន្ធ៖ប៉ែន សុខគង់ រត់បាន១១.០២វិនាទី ក្នុងចម្ងាយ១០០ម៉ែត្រនៅអូឡាំពិក តែអស់ឱកាសយកមេដាយ
កីឡាករ ប៉ែន សុខគង់ បានចូលរួមប្រកួតរត់ចម្ងាយ១០០ម៉ែត្រសេរីផ្នែកបុរស ក្នុងព្រឹត្តិការណ៍កីឡាអូឡាំពិក ដោយស្ថិតនៅ Heat ទី១ ប្រើថិរវេលាបាន ១១.០២ វិនាទី ឈរលេខ៦ ក្នុងចំណោមអ្នកស្ថិតក្នុង Heat ជាមួយគ្នាដែលមាន៩នាក់។ មេដាយមាស វិញ្ញាសានេះបានទៅកីឡាករអ៊ីតាលី Marcell Jacobs ប្រើថេរវេលា ៩.៨០វិនាទី មេដាយប្រាក់បានទៅកីឡាករ Fred Kerley របស់អាមេរិក ប្រើថេរវេលា៩.៨៤វិនាទី និងមេដាយសំរឹទ្ធ បានទៅកីឡាករ Andre De Grasse របស់កាណាដា ប្រើថេរវេលាបាន៩.៨៤វិនាទី៕