កម្មវិធីប្រកួតសម្រស់ដ៏ធំលំដាប់ពិភពលោក Miss Universe បានបញ្ចប់ជាស្ថាពរ ដោយរកបានបេក្ខភាពជើងខ្លាំងក្លាយជា ម្ចាស់មកុដ Miss Universe 2023 គឺកញ្ញា Sheynnis Alondra Palacios Cornejo (ហ្សេនីស អាឡូនដ្រា ផាឡាស៊ីអូស ខ័រនេជូ) បវរកញ្ញាតំណាងប្រទេស នីហ្គារ៉ាហ្គ័រ។ ថ្វីត្បិតកម្មវិធីចប់ តែអ្នកគាំទ្រហាក់ដូចជាមិនទាន់ចប់ មិនទាន់អស់ចិត្តចំពោះលទ្ធផលខាងលើនេះនៅឡើយ ដោយក្នុងនោះក៏មានអ្នកគាំទ្រ ដែលបានដាក់ក្ដីរំពឹងយ៉ាងខ្ពស់ទៅលើកញ្ញា ចន សុទិម៉ា ព្រោះមានសម្រស់ស្អាតនិងសមត្ថភាពចំណេះដឹងក៏ខ្ពស់ តែបែរជាមិនបានឡើងទៅដល់វគ្គ Top ណាមួយនៃការប្រកួតទៅវិញ។ អំឡុងពេលប្រកួតមានអ្នកគាំទ្រជាច្រើនបានបោះសំដីទៀតថា ប្រសិនបើ សុទិម៉ា មិនបានឡើងដល់ Top នឹងឈប់មើល ឬគាំទ្រកម្មវិធីប្រកួតនេះជាបន្តទៀត ព្រោះគ្រប់គ្នាសុទ្ធតែជឿជាក់ និងទុកចិត្តលើ សុទិម៉ា ខណៈដែលឆ្នាំ២០២៣នេះ បណ្ដាញផ្សព្វផ្សាយឬហ្វេនៗបរទេសជាច្រើន ក៏បង្ហាញការចាប់អារម្មណ៍លើបេក្ខនារីកម្ពុជារូបនេះជាពិសេសផងដែរ។ នេះមិននិយាយដល់អ្នកសិល្បករ ឬអតីតបេក្ខភាពប្រកួតសម្រស់នានា ដែលបានចេញមកបង្ហាញការមិនពេញចិត្តដែលបេក្ខនារីកម្ពុជាមិនទទួលបានចំណាត់ថ្នាក់ក្នុង Top ណាមួយផង។
ការមិនទទួលបានតំណែង ឬចូលដល់កម្រិត Top ណាមួយរបស់ កញ្ញា ចន សុទិម៉ា នេះធ្វើឱ្យផេកមួយចំនួនបានបង្ហាញក្ដីព្រួយបារម្ភព្រោះបេក្ខភាពជើងខ្លាំងប្រហែល សុទិម៉ា ទៅហើយ នៅមិនទទួលបានលទ្ធផលល្អ តើទៅថ្ងៃមុខកម្ពុជានឹងមានបេក្ខភាពខ្លាំងៗច្រើនទៀត ត្រៀមចេញទៅប្រកួតដែរទេ? ដូចជាការលើកឡើងមួយរបស់ផេក Universe Pageant បានលើកឡើងថា៖ តើយើងគួរតែយកបវរកញ្ញាបែបណាទៀតទៅប្រកួត Miss Universe បើអ្នកខ្លាំងៗប្រចាំប្រទេសយើងយកទៅអស់ហើយ?
ចំពោះការលើកឡើងនេះ មានការឆ្លើយតបផ្សេងៗពីគ្នា ដោយមានអ្នកខ្លះយល់ថា កម្មវិធីមិនមានភាពសុក្រិត មិនយុត្តិធម៌ ប៉ុន្តែក៏មានអ្នកខ្លះទៀតបានលើកហេតុផលមកបញ្ជាក់ ដោយមានជាអំណះអំណាងគួរទទួលយកបានថា ៖ «ខ្ញុំជឿថាបវរកញ្ញារបស់យើងមានសម្រស់ និងសក្ដានុពលគ្រប់គ្រាន់ក្នុងការក្លាយជាបវរកញ្ញារួចហើយ ប៉ុន្តែនៅមានរឿងជាច្រើនទៀតដែលយើងត្រូវផ្តោតទៅលើដូចជា ប្រវត្តិអប់រំរបស់នាង សមត្ថភាពនិយាយជាសាធារណៈ និងការចូលរួមក្នុងសកម្មភាពសប្បុរសធម៌ និងសង្គម។ ស្ទើរតែគ្រប់បេក្ខភាពចុងក្រោយកំពូលទាំង 20 មានប្រវត្តិគួរឱ្យចាប់អារម្មណ៍ក្នុងការនិយាយជាសាធារណៈ ការអប់រំ ការតស៊ូមតិ អាជីព និងការងារសប្បុរសធម៌។ ប្រហែលជាទាំងនេះគួរតែជាការពិចារណាចម្បងនៅពេលជ្រើសរើសបេក្ខភាពតំណាងប្រទេសបន្ទាប់។»
ខណៈដែលផេកគាំទ្រវិស័យប្រកួតសម្រស់ដ៏មានឥទ្ធិពលមួយគឺ Beauty Pageant Reviewer ក៏បានលើកឡើងត្រង់ៗឥតមានបញ្ឆិតបញ្ឆៀងដែរពីកត្តាមិនបានចូល Top របស់កម្ពុជា ៖ ចំណុចខ្សោយបវរកញ្ញាកម្ពុជានៅចក្រវាល គឺ ជាប់ហើយបានទៅរកធ្វើសប្បុរសធម៌ តែ ស្រុកគេអត់ចឹងទេ! សប្បុរសធម៌រាប់ឆ្នាំ មានគ្រោងការណ៍ច្បាស់លាស់សិន បានមកចូលចក្រវាល។ ដែលការលើកឡើងនេះត្រូវបានអ្នកគាំទ្របញ្ចេញមតិបន្ថែមដែរថា៖ «ប្រសិនបើចង់ចូលចក្រវាឡត្រូវមាន ÷ ប្រវត្តិរូបទាក់ទាញ មានជំនាញនិយាយជាសាធារណៈ មានកម្រិតវប្បធម៌ខ្ពស់ មាន មានជំនាញតស៊ូមតិ មានសកម្មភាពមនុស្សធម៌ និងមានទំនាក់ទំនងល្អ។ កម្មវិធីមួយនេះគេត្រូវការស្រ្តីដែលខ្លាំង មាន Power ក្នុងការតស៊ូមតិ មានភាពជាអ្នកដឹកនាំនៅក្នុងខ្លួន ច្រើនជាងរូបសម្រស់។»
ជាការពិតណាស់ អ្នកគាំទ្រណាក៏ដោយរមែងចង់ឃើញបេក្ខភាពតំណាងប្រទេសរបស់ខ្លួនឈ្នះមកុដ ឬចូលទៅក្នុងកម្រិត Top ប៉ុន្តែកម្ពុជាខ្លួនឯងក៏ត្រូវងាកមកសម្លឹងពីចំណុចខ្វះខាតមួយចំនួន និងជាពិសេសគឺត្រូវយល់ឱ្យបានច្បាស់ថាតើកម្មវិធីតម្រូវអ្វី គោលបំណងចំបងចង់បានអ្វី ដើម្បីត្រៀមលក្ខណៈសម្បត្តិបេក្ខជនដែលត្រូវទៅប្រកួតឱ្យបានគ្រប់គ្រាន់ ត្រូវនឹងអ្វីដែលកម្មវិធីចង់បាននោះ មិនយូរមិនឆាប់មកុដ Winner ឬលំដាប់ Top កម្ពុជាប្រាកដជាអាចយកបានដូចប្រទេសគេឯទៀតដែរ៕
