សិល្បៈជាតិ៖ ថ្មីៗនេះក្រោយសង្កេតឃើញពីភាពស្និតស្នាលខុសធម្មតារវាងអ្នកមេម៉ាយដ៏ស្រស់សោភា និងអ្នកកំលោះ វន ជីវ័ន្ត អតីតបេក្ខជនដ៏លេចធ្លោនៃកម្មវិធីកម្រិតពិភពលោក The Voice Cambodia រដូវកាលទី៣ ថាមានភាពល្អូកល្អឺនខុសធម្មតា ធ្វើឱ្យកើតមានការសង្ស័យថា តើទំនាក់ទំនងរវាងអ្នកទាំងពីរចេញផុតពីពាក្យថា friendzone ហើយឈានឆ្ពោះទៅរកពាក្យថាគូស្នេហ៍ហើយមែនទេ?
ចម្ងល់នេះត្រូវបានលាតត្រដាងឱ្យសាធារណជន ពិសេសអ្នកគាំទ្របានដឹងហើយ កាលពីថ្ងៃអាទិត្យទី19 ខែវិច្ឆិកា ដោយភាគី ខាងប្រុសបានសារភាពខ្ទេចគ្មានសល់ថាខ្លួនពិតជាលួចស្រលាញ់ ខាងស្រីប្រាកដមែន ប៉ុន្តែកំពុងរង់ចាំខាងស្រីបើកភ្លើងខៀវ? ចុះខាងអ្នកនាង ទូច ស្រីល័ក្ខ ដែលធ្លាប់រងគ្រោះខ្ទេចខ្ទាំបេះដូង ដោយសារស្នេហាបែកបាក់ម្ដងរួចមកហើយនោះ នឹងមានសេចក្ដីក្លាហានបើកចិត្តទទួលយកស្នេហាពីអ្នកកំលោះវ័យក្មេង ដែលមានអាយុប្អូនខ្លួន ថែមទាំងមានរូបរាងសង្ហាម្នាក់នេះដែរទេ?
នៅក្នុងការប្រគំតន្ត្រីរបស់ទូរទស្សន៍ CNC ដែលមានវត្តមានអ្នកនាង ទូច ស្រីល័ក្ខ និង លោក វន ជីវ័ន្ត ជាតារាកិត្តិយស និងបានបកស្រាយបទចម្រៀងរួចគ្នាជាច្រើនបទចប់ ពិធីករ និងពិធីការិនី បានដើរតួជាអ៊ីអ្នកជិតខាងឈរសម្ភាសន៍ សាកសួរពីទំនាក់ទំនងដ៏គួរសង្ស័យរវាងអ្នកទាំងពីរ ដោយពិធីករ បានសួរថា តើមានទំនាក់ទំនងអ្វីជាមួយគ្នា សូមឆ្លើយដោយស្មោះត្រង់ ស្បថ ហាមនិយាយកុហក។
ដោយដំបូងឡើយបុរសសង្ហា វង ជីវ័ន្ត ហាក់ដូចជាអេះអុញ ហើយឆ្លើយបង្វៀងថា ទំនាក់ទំនងនិងពិតខ្លះ និងសាច់រឿងចម្រៀងខ្លះ ប៉ុន្តែក្រោយពីត្រូវពិធីករព្យាយាមសួរជីកឬសជីកគល់ ទីបំផុតបុរសវ័យ២៤ឆ្នាំ ដាច់ចិត្តឆ្លើយកាត់កេរ្តិ៍កាត់ខ្មាស់លើឆាកថា «ទំនាក់ទំនងពិត ឥឡូវកំពុងសុំស្រលាញ់ តែបេះដូងរាងលំបាកបន្តិច រាងចង្អៀត កំពុងមើលចិត្ត» ក្រោយបានចម្លើយចេញពីបបូរមាត់ខាងប្រុសហើយនោះ មុខព្រួញបានងាកមកខាងស្រីវិញម្ដង តើអ្នកនាង ទូច ស្រីល័ក្ខ ព្រមបើកចិត្តទទួលយកក្ដីស្រលាញ់ពីអ្នកកំលោះរូបសង្ហានេះដែរទេ?
អ្នកនាង ទូច ស្រីល័ក្ខ បានតបថា «ពេលខ្លះយើងធ្លាប់ពិបាកម្ដងហើយ អ៊ីចឹងទៅយើងក៏ទុកពេលវេលាក្នុងការមើលដែរ ប៉ុន្តែគាត់មានអាក្រក់ឯណា? ឥឡូវនាងខ្ញុំកំពុងតែមើលចិត្ត ចិត្តហ្នឹងសំខាន់ណាស់» ។
ការឆ្លើយតបរបស់អ្នកនាង ទូច ស្រីល័ក្ខ ខ្លីៗប៉ុណ្ណឹង អាចបញ្ជាក់បានថាអ្នកនាង មិនបានបិទទ្វារបេះដូងជិតឈឹងនោះឡើយ ព្រោះអ្នកនាងបានទុកឱកាស ឱ្យអ្នកកំលោះបាត់ដំបង បញ្ជាក់ចិត្តស្មោះចំពោះខ្លួន ដោយទុកឱ្យពេលវេលាជាអ្នកបញ្ជាក់ការពិត ថាតើអ្នកទាំងពីរអាចបន្តដើរទៅមុខជាមួយគ្នាក្នុងនាមជាគូស្នេហ៍ ឬស្ថិតត្រឹមជា Friendzone រាប់អានគ្នាប្រៀបដូចជាបងប្អូនធម្មតា។
មែនទែនទៅអ្នកគាំទ្រអ្នកនាង ប្រាកដជាដឹងហើយថា អាពាហ៍ពិពាហ៍របស់អ្នកនាងជាមួយនឹង អតីតស្វាមីជនជាតិ ន័រវែស បានបញ្ចប់ទៅដោយមិនសូវជាល្អប៉ុន្មាននោះឡើយ រហូតឈានដល់មានការប្ដឹងផ្ដល់គ្នាឡើងតុលាការថែមទៀត ដូច្នេះហើយតាំងពីចែកផ្លូវគ្នាមកអ្នកនាង កម្រនឹងបើកចិត្តចំពោះបុរសថ្មីណាម្នាក់ ទោះជាអ្នកមេម៉ាយសាច់ក្រអូបរូបនេះសំបូរកន្លង់ចោមរោមសុំសេ្នហ៍ជាច្រើនក្ដី ដូច្នេះនេះអាចចាត់ទុកជាលើកទីមួយហើយដែលអ្នកមេម៉ាយកូនមួយរូបនេះព្រមបើកបេះដូងមើលចិត្តជាមួយអ្នកកំលោះ វង ជីវ័ន្ត៕
