ក្រោយផេកផ្លូវការរបស់ទូរទស្សន៍ហង្សមាសមានឈ្មោះថា «Hangmeas Khmer Drama» បានធ្វើការផុសផ្សព្វផ្សាយកាលបរិច្ឆេទផ្លូវការភាពយន្តភាគខ្មែរថ្មីមួយគឺរឿង «អាពាហ៍ពិពាហ៍ចៃដន្យ» តារាសម្ដែងឯកប្រុសស្រីគឺលោក នីកូ និងអ្នកនាង ពេជ្រ សូលីកា បានចូលរួមប្រូម៉ូតរឿងដែលខ្លួនសម្ដែងនេះយ៉ាងខ្លាំងមិនចាញ់គ្នាប៉ុន្មាននោះទេ
ភាពយន្តភាគខ្មែររឿង«អាពាហ៍ពិពាហ៍ចៃដន្យ» ដែលផលិតនិងបញ្ចាំងនៅលើកញ្ចក់ទូរទស្សន៍ហង្សមាស នឹងចាក់ផ្សាយឱ្យអ្នកគាំទ្របានទស្សនាចាប់ផ្ដើមពីថ្ងៃទី១៦ ខែសីហា ឆ្នាំ ២០២១ វេលាម៉ោង៨ ទៅ៩យប់ ហើយមានបញ្ចាំងជូនទស្សនារៀងរាល់ថ្ងៃចន្ទ អង្គារ និងពុធ។
នៅពេលទទួលបានដំណឹងផ្លូវការនេះ មិនត្រឹមតែហ្វេនដែលអន្ទះសារចង់ដឹងចង់ឃើញរឿងភាគនេះនោះទេសូម្បីតែលោក នីកូ និងអ្នកនាង សូលីកា ដែលកន្លងមករមែងតែងតែ Share បន្តដំណឹងផ្សេងៗដែលផ្សព្វផ្សាយដោយផេករបស់ទូរទស្សន៍ហង្សមាសពាក់ព័ន្ធនឹងរឿងនេះព្រមទាំងជាមួយនឹងសំណេរដែលបង្ហាញឱ្យឃើញពីការចង់ឱ្យរឿងដែលខ្លួនសម្ដែងឆាប់ចាក់បញ្ចាំងក្នុងពេលឆាប់ៗនេះ។
ការទន្ទឹងរង់ចាំបានមកដល់ទីបញ្ចប់រឿងភាគខ្មែរនេះបានកំណត់ថ្ងៃបញ្ចាំងយ៉ាងជាក់លាក់ស្របតាមការចង់បានរបស់អ្នកគាំទ្រ ងាកមកតួឯកប្រុសស្រីគឺលោក នីកូ និងអ្នកនាង ពេជ្រ សូលីកា ឯណោះវិញក៏បានចូលរួមធ្វើការចែករំលែក Share ហើយ Share ទៀត ពីដំណឹងនេះ ដើម្បីជាផ្នែកមួយជួយប្រូម៉ូតឱ្យរឿង «អាពាហ៍ពិពាហ៍ចៃដន្យ» ដែលខ្លួនសម្ដែងជាតួឯកប្រុសស្រី មានអ្នកទស្សនាច្រើនពេលបញ្ចាំងនៅលើកញ្ចក់ទូរទស្សន៍។
គួរដឹងថារឿងនេះ គឺជារឿងដែលមានសញ្ជាតិដើមចិនតៃវ៉ាន់ មានចំណងជើងជាភាសាអង់គ្លេសថា «Fate To Love You» ផលិតដំបូងកាលពីឹឆ្នាំ២០០៨ ហើយក្រោយមកមានប្រទេសកូរ៉េ និង ប្រទេសថៃបានទិញយកទៅផលិតយកលំនាំតាមរឿងមួយនេះ និងចុងក្រោយគឺកម្ពុជាបានទិញសិទ្ធិបញ្ញាផលិតដោយប្រើចំណងជើងជាភាសាខ្មែរថា «អាពាហ៍ពិពាហ៍ចៃដន្យ»៕
