រឿងក្ដៅៗកក្រើកបណ្ដាញសង្គម ក្រោយ លោក ម៉ែន និមលរតន៍ ជានាយកប្រតិបត្តិក្រុមហ៊ុនបង្ហាញម៉ូដ CIM បានប្រកាសប្រគល់តំណែង 3rd Runer Up ឱ្យដល់កញ្ញាសួន ពិសី ដែលជាអតីត 4th runner up Miss Universe Cambodia 2020 ដោយមូលហេតុថាកញ្ញាជាមនុស្សគោរពការងារ ឬ អាចនិយាយសាមញ្ញាហៅថា Real Queen។
បន្ទាប់ពីមានការជជែកវែកញែកគ្នាយ៉ាងគគ្រឹកគគ្រេងនៅលើបណ្ដាញសង្គមពិសេសក្នុងមជ្ឈដ្ឋានអ្នកនិយមគាំទ្រនិងតាមដានកម្មវិធីការប្រកួតសម្រស់ពាក់ព័ន្ធនឹងរឿងដែលលើកឡើងថា តំណែងរបស់ កញ្ញា នេត រក្សា 3rd Runner Up Miss Universe Cambodia 2020 ត្រូវបានផ្ទេរទៅឱ្យកញ្ញា សួន ពិសី អតីត 4th runner up Miss Universe Cambodia 2020 និង ជា Miss Tourism Cambodia 2021ហើយ ដោយយោងតាមការបង្ហោះរបស់លោក ម៉ែន និមលរតន៍នៅលើបណ្ដាញសង្គម។
ដើម្បីស្រាយនូវចម្ងល់នេះ សារព័ត៌មានត្រយងបានធ្វើការទំនាក់ទំនងទៅកាន់ លោក ម៉ែន និមលរតន៍ សូមឱ្យលោកស្រាយបំភ្លឺចំពោះបញ្ហានេះ ដោយលោកបានពន្យល់យ៉ាងលម្អិតថា៖ បញ្ហានេះគឺកើតមានតាំងពីដំបូងមកម្ល៉េះ ដោយសារតែកញ្ញា នេត រក្សាមិនបានចុះហត្ថលេខាជាមួយនឹងក្រុមហ៊ុននោះទេ ដោយមូលហេតុផ្ទាល់ខ្លួនកញ្ញា តែកញ្ញាសុំរក្សាឈៀងទុកដើម្បីជាអនុស្សាវរីយ៍ ដោយកាលនោះលោកក៏មានការយោគយល់ ប៉ុន្តែលោកបានបញ្ជាក់ថាកញ្ញាមិនមានសិទ្ធិយកងារ ជាកញ្ញាឯកចក្រវាឡកម្ពុជាទៅប្រើប្រាស់នោះទេ ព្រោះនោះជាកម្មសិទ្ធិបញ្ញារបស់ក្រុមហ៊ុន ចំណែកកញ្ញាមិនបានកុងត្រាជាមួយនឹងក្រុមហ៊ុននោះឡើយ ហេតុនេះការដែលកញ្ញាប្រើប្រាស់ឈ្មោះជា MUC2020 ដើម្បីផលប្រយោជន៍ឯកជនគឺវាខុសលក្ខន្តិកៈ ម្យ៉ាងទៀតបុគ្គលិក CIMក៏ធ្លាប់បានទំនាក់ទំនងទៅប្រាប់កញ្ញាពីបញ្ហានេះដែរតែកញ្ញាមិនស្ដាប់ ដូច្នេះទើបលោកឈានដល់ប្រគល់តំណែងរបស់កញ្ញាទៅឱ្យកញ្ញា សួន ពិសី ដែលគោរពតាមច្បាប់និងលក្ខខ័ណ្ឌរបស់ក្រុមហ៊ុនប្រកបដោយទំនួលខុសត្រូវវិញ។
ក្រោយពីស្រាយបំភ្លឺចំពោះករណីផ្ទេរតំណែងនេះរួចបុរសដែលមានភាពលេចធ្លោលើវិស័យប្រកួតវេទិកាស្រីស្អាតដ៏ល្បីល្បាញជាច្រើនរូបនេះក៏បានឆ្លៀតផ្ដាំផ្ញើចំពោះយុវជនយុវនារីជំនាន់ក្រោយដែលចង់ចូលរួមកម្មវិធីប្រកួតសម្រស់ត្រូវតែត្រៀមខ្លួននិងសិក្សាពីកម្មវិធីនីមួយៗឱ្យបានច្បាស់លាស់។
«លោក ម៉ែន និមលរតន៍ ក៏បានផ្ដាំផ្ញើដល់យុវជនជំនាន់ក្រោយដែលមានចិត្តស្រលាញ់ និង ចង់ចូលរួមប្រកួតកម្មវិធីសម្រស់សូមពិនិត្យនិងអានខ្លឹមសារកម្មវិធីឱ្យបានច្បាស់លាស់ ជាពិសេសត្រូវរក្សាឱ្យបាននូវសេចក្ដីថ្លៃថ្នូរក្នុងនាមជាកូនខ្មែរមួយរូប ចៀសវាងប្រព្រឹត្តទង្វើណាមួយដែលធ្វើឱ្យជះឥទ្ធិពលដល់អ្នកជំនាន់ក្រោយៗទៀត»។
គួរដឹងដែរថាលោក ម៉ែន និមលរតន៍ ដែលជានាយកប្រតិបត្តិក្រុមហ៊ុនបង្ហាញម៉ូដ CIM គឺជាបុគ្គលដ៏លេចធ្លោមួយរូបលើវិស័យប្រកួតសម្រស់ ព្រោះលោកបានបញ្ជូននារីរូបស្រស់និងបុរសសង្ហាជាច្រើនរូបតំណាងឱ្យព្រះរាជាណាចក្រកម្ពុជា ទៅចូលរួមប្រកួតក្នុងព្រឹត្តិការណ៍អន្តរជាតិ និង ពិភពលោក ប្រកបដោយជោគជ័យយ៉ាងច្រើន៕
ទស្សនាវីដេអូព័ត៌មាន លោក ម៉ែន និមលរតន៍ ខាងក្រោមនេះ៖