សហព័ន្ធកីឡាប៊ូល និងប៉េតង់កម្ពុជា បានរៀបចំមហាសន្និបាតបញ្ចប់អាណត្តិទី៦ និងបោះឆ្នោតជ្រើសរើសគណៈកម្មាធិការប្រតិបត្តិ អាណត្តិថ្មី ទី៧ ពីឆ្នាំ២០២១ដល់ ឆ្នាំ២០២៥ នៅព្រឹកថ្ងៃសុក្រ ទី១៣ ខែសីហា ឆ្នាំ២០២១ ខណៈឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា បន្តជាប់ឆ្នោតជាប្រធានសហព័ន្ធកីឡាប៊ូល និងប៉េតង់កម្ពុជា សម្រាប់អាណត្តិថ្មីទៀត។
នៅលើទំព័រហ្វេសប៊ុកផ្លូវការរបស់ឯកឧត្តម បានបញ្ជាក់ថា៖«ខ្ញុំសូមថ្លែងអំណរគុណចំពោះគណៈកម្មាធិការប្រតិបត្តិ ដែលបានផ្តល់សេចក្តីទុកចិត្តបោះឆ្នោតជ្រើសរើសរូបខ្ញុំឲ្យបន្តជាប្រធានសហព័ន្ធកីឡាប៊ូល និងប៉េតង់កម្ពុជា សម្រាប់អាណត្តិទី៧ ឆ្នាំ២០២១-២០២៥»។
ក្រោយបន្តទទួលកៅអីជាប្រធានសហព័ន្ធឯកឧត្តមបានតាំងចិត្តថា៖«ក្នុងនាមជាប្រធានសហព័ន្ធកីឡាប៊ូល និងប៉េតង់កម្ពុជា អាណត្តិទី៧ ខ្ញុំសូមប្តេជ្ញាចិត្តបំពេញកិច្ចការងារសម្រាប់អាណត្តិថ្មី សំដៅបម្រើផលប្រយោជន៍សហព័ន្ធ និងដើម្បីតបស្នងចំពោះការលះបង់របស់ថ្នាក់ដឹកនាំជំនាន់មុន ព្រមទាំងស្វែងរកលទ្ធផលល្អៗ ជោគជ័យថ្មីៗ ជូនអ្នកគាំទ្រ និងជាតិមាតុភូមិនៃយើង»៕
