ខ្សែការពារកណ្ដាល Kim Min-jae វ័យ២៤ឆ្នាំជាខ្សែការពារកណ្ដាលក្នុងក្រុមជម្រើសជាតិកូរ៉េខាងត្បូង បានសម្រេចចាកចេញពីក្លិប Beijing Guoan របស់ចិន ទៅចូលរួមក្រុមយក្សក្នុងលីគកំពូលទួរគី (Süper Lig) Fenerbahçe ដែលមានខ្សែបម្រើឆ្នើមរបស់អាល្លឺម៉ង់ Mesut Özil កំពុងលេងនៅទីនោះ។
កីឡាករកូរ៉េខាងត្បូង រូបនេះទទួលបានថ្លៃដោះដូរ២លានអឺរ៉ូ ក្នុងកិច្ចសន្យា៤ឆ្នាំនៅទឹកដីអឺរ៉ុបមួយនេះ។ កីឡាករ Kim Min-jae ធ្លាប់ឈ្នះពានរង្វាន់លីគកំពូលកូរ៉េខាងត្បូង K League 1ជាមួយក្រុម Jeonbuk Hyundai Motors នៅឆ្នាំ២០១៧ និងឆ្នាំ២០១៨ មុនផ្ទេរទៅក្រុម Beijing Guoan ព្រមទាំងឈ្នះជើងឯករងនៅឆ្នាំ២០១៩។
នៅក្នុងក្រុមជម្រើសជាតិវិញកីឡាករកម្ពស់ ១.៩០ម៉ែត្ររូបនេះធ្លាប់ឈ្នះពានរង្វាន់ Asian Games ឆ្នាំ២០១៨ ឈ្នះជើងឯកប្រចាំតំបន់អាស៊ីខាងកើត EAFF Championship ឆ្នាំ២០១៩ ខណៈរូបគេធ្លាប់ពានរង្វាន់ឯកត្តជនដូចជា K League 1 Young Player of the Yearឆ្នាំ២០១៧ ពានរង្វាន់ K League 1 Best XI ឆ្នាំ២០១៧,២០១៨ ពានរង្វាន់ AFC Asian Cup Team of the Tournamentឆ្នាំ២០១៩ និងពានEAFF Championship Best Defenderឆ្នាំ២០១៩៕