ក្រៅពីអ្នកស្រី ពាន់ ភួងបុប្ផា ដែលដិតដាមក្នុងសិល្បៈ យ៉ាងណាមិញចៅប្រុសអ្នកស្រី លោក ម៉ុង ម៉ានុត មានឈាមជ័រសិល្បៈបន្តវេនពីអ្នកស្រីនោះ សន្សឹមបានប្រឡូកចូលក្នុងសិល្បៈម្ដងបន្តិចៗតាមរយៈការរួមសហការនិពន្ធ សៀវភៅ Cover បទចម្រៀង និងចុងក្រោយនេះសាមីខ្លួនបានប្រកាសប្រឡូកចូលសិល្បៈពេញទំហឹងតែម្ដង។
លោក ម៉ុង ម៉ានុត កាលពីថ្ងៃទីអាទិត្យ ទី១៥ ខែសីហា ឆ្នាំ២០២១ បានប្រកាសតាមរយៈហ្វេសប៊ុករបស់ខ្លួនដែលមានឈ្មោះថា «Nuth-នុត» លោកនឹងចាប់ផ្ដើមវិស័យសិល្បៈ ដោយក្នុងនោះលោកក៏បានបញ្ជាក់ដែរថាបទចម្រៀងដំបូងរបស់លោកបានចេញកាលពី៩ឆ្នាំមុន ហើយបន្ទាប់ពីនោះមកលោកតែងតែរង់ចាំនូវពេលវេលាស័ក្តិសមណាមួយទៀត ដើម្បីបង្ហាញនូវបទចម្រៀងថ្មីរបស់លោក ដោយលោកបានបញ្ជាក់ដែរថាហ្វេនធ្លាប់បានស្ដាប់សំឡេងកុមារ នុត ហើយ ប៉ុន្តែនៅពេលឆាប់ៗខាងមុខនេះ ហ្វេននឹងបានស្ដាប់បទចម្រៀងថ្មីរបស់លោកម្ដងទៀតដែលជាស្នាដៃនិពន្ធដោយលោកផ្ទាល់។
ប្អូនបង្កើតរបស់តារាចម្រៀង ម៉ុង ម៉ានិត ហៅម៉ានិត រូបនេះក៏មានស្នាដៃចូលរួមសហការជាមួយនឹងបងប្រុសរបស់លោក ក្នុងការនិពន្ធសៀវភៅដូចគ្នា ព្រោះកន្លងមកសៀវភៅរបស់លោក ម៉ានិត តែងតែមាន លោក ចូលរួមសហការនិពន្ធជានិច្ចដូចជាសៀវភៅរឿងចុងក្រោយ «ត្រកូលចម្លែក» ដែលលោកបានរួមសហការនិពន្ធនោះក៏ទទួលបានការគាំទ្រយ៉ាងខ្លាំងរហូតដល់បិទការបញ្ជាកក់មុនពេលកំណត់ថែមទៀតផង។
គួរដឹងថា លោក ម៉ុង ម៉ានុត គឺជាប្អូនប្រុសបង្កើតរបស់លោក ម៉ុង ម៉ានិត និងជាចៅប្រុសបង្កើតរបស់អ្នកនិពន្ធ អ្នកដឹកនាំល្បី លោកស្រី ពាន់ ភួងបុប្ផា ធ្លាប់បានសាងនូវភាពល្បីល្បាញម្ដងកាលពី៩ឆ្នាំមុនតាមរយៈបទចម្រៀងដាក់បញ្ចូលក្នុងភាពយន្តខ្នាតធំរឿង «កុមារី២៥ឆ្នាំ»៕
