ក្រៅពីភាពយន្តភាគជាស៊េរីមនោសញ្ចេតនាបែបរ៉ូមែនទិក «Descendants of the Sun» របស់ ទូរទស្សន៍ KBS រហូត មកដល់ភាពយន្តភាគបែបម៉ាហ្វៀ Vincenzo របស់ TVN Song Joong Ki ក៏ធ្លាប់បានបង្ហាញស្នាដៃនៅក្នុងភាពយន្តបុរាណកូរ៉េ Sungkyungwan scandal និង Arthdal Chronicles តែអ្វីដែលធ្វើឱ្យអ្នកគាំទ្រទាំងជាតិនិងអន្តរជាតិចាប់អារម្មណ៍ខ្លាំងនោះគឺអាពាហ៍ពិពាហ៍ ផ្លេកបន្ទោររវាងរូបគេនិងអតីតភរិយា Song Hye Kyo ក្រោយពីអ្នកទាំងពីរបានស្គាល់គ្នាបន្ទាប់ពីថត ភាពយន្តភាគរឿង«ម្ចាស់ព្រះអាទិត្យ»រួច។ ថ្ងៃនេះត្រយងនឹងធ្វើការសង្ខេបពីប្រវត្តិរបស់តារាប្រុសរូបសង្ហាម្នាក់នេះតើគេមានប្រភពមកពីណា? តើមុនពេលចូលប្រឡូកក្នុងសិល្បៈគេបានធ្វើអ្វីខ្លះ? ជូនដល់អ្នកគាំទ្រស្ដាប់និងទស្សនាដូចតទៅ។
Song Joong Ki គឺជាតារាសម្ដែងជនជាតិកូរ៉េខាងត្បូងដែលអ្នកគាំទ្របានស្គាល់គាត់តាមរយៈ ការសម្ដែងភាពយន្តភាគបុរាណ Sungkyungwan Scandal និងជាអតីតសមាជិកអចិន្ត្រៃយ៍របស់កម្មវិធី ទូរទស្សន៍ Running Man របស់ទូរទស្សន៍ SBS។ បុរសសង្ហារូបនេះកើតនៅថ្ងៃទី ១៩ ខែកញ្ញាឆ្នាំ ១៩៨៥ បច្ចុប្បន្ន មានអាយុ៣៥ ឆ្នាំមានទីកន្លែងកំណើតនៅសង្កាត់ Dong-gu ក្រុង Daejeon មាន កំពស់ ១,៧៨ ជានិស្សិតបញ្ចប់ការសិក្សានៅសកលវិទ្យាល័យ Sungkyungwan ផ្នែកគ្រប់គ្រងពាណិជ្ជកម្ម ។ Song Joong Ki ចូលសិល្បៈដំបូងក្នុងឆ្នាំ ២០០៨ ហើយបានរៀបអាពាហ៍ពិពាហ៍ ជាមួយនឹងតារាស្រី Grade A Song Hye Kyo នៅឆ្នាំ ២០១៧ និងបានលែងលះគ្នានៅឆ្នាំ ២០១៩ ។
Song Jong Ki គឺជាអ្នកជិះស្គីដ៏ជំនាញម្នាក់ថែមទាំងជាកីឡាករលេងឱ្យក្រុមតំណាងក្រុងដែលគេ រស់នៅថែមទាំងធ្លាប់បានចូលរួមប្រកួតក្នុងពិធីប្រកូតកីឡាថ្នាក់ជាតិប្រចាំប្រទេសកូរ៉េចំនួន ៣ ដង ទៀតផង។ រយៈពេល១២ ឆ្នាំក្នុងនាមជាកីឡាករជិះស្គីបានបញ្ចប់ដោយសារតែគេមានបញ្ហារបួស បន្ថែមលើសនេះទៀតក្នុងសម័យកាលនោះកីឡាករជិះស្គីមិនទាន់ត្រូវបានទទួលស្គាល់យ៉ាង ទូលំទូលាយទេ ដូច្នេះពិបាកនឹងត្រូវជ្រើសរើសជាកីឡាករជម្រើសជាតិណាស់ហេតុនេះគេក៏ សម្រេចចិត្តបោះបង់ចោលក្ដីស្រមៃជាកីឡាករជម្រើសជាតិជិះស្គីហើយត្រលប់មកខិតខំសិក្សាវិញ។ នៅក្នុងបទសម្ភាសមួយជាមួយនឹងទូរទស្សន៍ SBS តារាសម្ដែងរូបនេះបានរំលឹកថារូបគេ «យំយ៉ាង ខ្លាំងនៅពេលបោះបង់និងឈប់លេងកីឡាជិះស្គី »។ ក្រោយបោះបង់ចោលកីឡាជិះស្គី Song Joong Ki ត្រលប់មកផ្ចង់ស្មារតីលើការសិក្សាចំពោះរឿងនេះគេធ្លាប់បាននិយាយនៅក្នុងកម្មវិធីមួយថាគេជា មនុស្សចូលចិត្តយកការបាត់បង់មកធ្វើជាកម្លាំងចលកររុញច្រានឲ្យជោគជ័យលើអ្វីមួយផ្សេង ឧទាហរណ៍ការសិក្សាជាដើម។ ការប្រឹងប្រែងរបស់គេបានសម្រេចជោគជ័យព្រោះគេទទួលបាន ពិន្ទុល្អហើយថែមទាំងបានចូលសិក្សានៅក្នុងមហាវិទ្យាល័យល្អបំផុតមួយរបស់ប្រទេសកូរ៉េខាងត្បូង គឺសកលវិទ្យាល័យសុងខ្យុងវ៉ាន។ កេរ្តិ៍ឈ្មោះជាសិស្សល្អរបស់គេមិនមែនបានមកដោយគ្រាន់តែភាពឆ្លាតនោះទេប៉ុន្តែពេលនៅ សិក្សា ថ្នាក់វិទ្យាល័យគេទទួលបានពានរង្វាន់សម្រាប់ការបង្ហាញវត្តមានមកសិក្សាមិនដែលខកខានឬ អវត្តមានសូម្បីតែមួយថ្ងៃទៀតផង។
យោងតាមសារព័ត៌មាន Enews24 ធ្លាប់បាន ផ្សាយថាក្រៅពីមានខួរក្បាលឆ្លាតហើយនោះមុខមាត់ សង្ហារបស់គេក៏បានទាក់ទាញសិស្សពីសាលាផ្សេងៗឱ្យទៅចូលរួមក្នុងកម្មវិធីបុណ្យរបស់ សាលាដែលគេរៀនរាល់ៗលើកដែលមានរៀបចំកម្មវិធី។ នៅក្នុងសកលវិទ្យាល័យ Sungkyungwan ដែល គេបានបញ្ចប់ថ្នាក់បរិញ្ញាប័ត្រផ្នែកគ្រប់គ្រងពាណិជ្ជកម្ម Song Joong Ki ធ្លាប់ត្រូវបានយករូបទៅ ដាក់លើក្របទស្សនាវដ្ដី Kingo ជាទស្សនាវដ្ដីប្រចាំក្នុងសាលាជាច្រើនដងរវាងពីឆ្នាំ ២០០៨ រហូត ដល់ឆ្នាំ២០១៣ ។
តារាសម្ដែងរូបនេះធ្លាប់បានចំណាយពេលជាច្រើនធ្វើជាអ្នកអានព័ត៌មាននៅក្នុងជំរុំផ្សព្វផ្សាយនាសកលវិទ្យល័យដែលគេសិក្សា។ Song Joong Ki ជាមនុស្សមានសមត្ថភាពព្រោះគេធ្លាប់បាន ចូលរួមលេងហ្គេម Quize Korea កាលពីឆ្នាំ ២០០៦ហើយឈ្នះបានចំណាត់ថ្នាក់លេខ ២ ព្រមទាំង ទាញបានចំណាប់អារម្មណ៍ពីអ្នកទស្សនារហូត មិត្តរួមថ្នាក់របស់គេបានបង្កើតក្រុមអ្នកគាំទ្ររូបគេ ក្នុងកម្មវិធីនោះឱ្យដល់គេផងដែរ។ បន្ទាប់ពីបង្ហាញខ្លួនក្នុងកម្មវិធីនោះម្ដាយរបស់គេថែមទាំងទទួល បានទូរស័ព្ទពី André Kim អ្នក Designer ដ៏ល្បីរបស់កូរ៉េទាក់ទងមកសុំឱ្យគេទៅដើរបង្ហាញម៉ូដក្នុង កម្មវិធី Fashion Show របស់ Kim ថែមទៀតផង ។
នៅក្នុងឆ្នាំ ២០១៦ គេបានក្លាយជាតារាកូរ៉េដំបូងនិងតែម្នាក់គត់បានសម្ភាសន៍ក្នុងម៉ោងព័ត៌មាន KBS 1TV’s New9 ហើយនៅក្នុងកម្មវិធីនោះគេបាននិយាយថា ៖ «កាលពីអតីតកាលខ្ញុំចង់ក្លាយជាពិធីករ អានព័ត៌មានបានឃើញអ្នកអានព័ត៌មានល្បីៗ ដោយផ្ទាល់ហើយបានអង្គុយនៅក្នុងស្ទីតយ៉ូខ្ញុំមាន អារម្មណ៍ដូចជាសុបិនមួយទៀតរបស់ខ្ញុំបានក្លាយជាការពិត»។ មនុស្សមានសមត្ថភាពមិនខ្លាចខ្វះ ការងារធ្វើនៅក្នុងបទសម្ភាសមួយ Song Joong Ki ធ្លាប់បានបង្ហើបថាមានក្រុមហ៊ុនមួយធ្លាប់បាន អញ្ជើញគេឱ្យទៅធ្វើជា Trainer តារាក្នុងក្រុមហ៊ុនរបស់គេថែមទៀតផង។ ទោះជាគេមិនបាន និយាយថាក្រុមណាមួយក៏ដោយតែគេបាននិយាយថាក្រុមនោះបច្ចុប្បន្ននេះល្បីល្បាញណាស់។
សូមរំលឹកថាបច្ចុប្បន្ន Song Jong Ki កំពុងបង្ហាញវត្តមានសម្ដែងរឿង Vincenzo ភាពយន្តភាគកូរ៉េបែបម៉ាហ្វៀរបស់ស្ថានីយទូរទស្សន៍ TVN កំពុងតែល្បីល្បាញខ្លាំងទាំងនៅក្នុងប្រទេសកូរ៉េ និងបណ្ដាប្រទេសដែលពេញនិយមរឿងភាគកូរ៉េផងដែរពិសេសនៅលើ App Netflix តែម្ដង៕
ទស្សនាវីដេអូខាងក្រោម៖