ក្នុងអំឡុងពេលធ្វើដំណើរទៅហ្វឹកហាត់នៅប្រទេសបារាំង នៅពេលនេះក្រុមជម្រើសជាតិ កីឡាករជម្រើសជាតិទោចក្រយាន ផ្នែកកង់គួកចំនួន៣រូប និងគ្រូបង្វឹកចំនួន១រូប បានបន្តចេញទៅចូលរួមប្រកួតនៅប្រទេសប៉ូឡូញ។
បើតាមការបញ្ជាក់របស់សហព័ន្ធកីឡាទោចក្រយាន បានបញ្ជាក់ថានៅថ្ងៃពុធ នេះក្រុមកម្ពុជា បានទៅដល់ប្រទេសប៉ូឡូញ ហើយដើម្បីចូលរួមប្រកួតក្នុងព្រឹត្តិការណ៍ប្រកួតកង់គួកពានរង្វាន់ CCC Tour Grody Piastowskie UCI Europe Tour កម្រិត២.២។ ការប្រកួតប្រព្រឹត្តទៅរយៈពេល៤ថ្ងៃ ដែលនឹងចាប់ផ្តើមនៅថ្ងៃទី១៩ រហូតដល់ថ្ងៃទី២២ ខែសីហា ឆ្នាំ២០២១។
ប្រភពបន្តថាសម្រាប់ការប្រកួតនេះជាការប្រកួតដកស្រង់បច្ចេកទេស និងការវាស់ស្ទង់កម្រិតសមត្ថភាពរបស់ក្រុមកីឡាកររបស់កម្ពុជា ដែលពួកគេបានធ្វើការហ្វឹកហាត់រយៈពេល២ខែកន្លងមកនៅប្រទេសបារាំង ជាមួយសមាគមកីឡាទោចក្រយានកម្ពុជា Cambodia Cycling Academy។
នេះជាការប្រកួតលើកទី២ហើយរបស់ក្រុមកម្ពុជា បន្ទាប់ពីបានចូលរួមប្រកួតកម្មវិធីប្រណាំង Tour of Szeklerland របស់ប្រទេសរ៉ូម៉ានី កាលពីដើមខែសីហា ថ្មីៗនេះ។
សូមបញ្ជាក់កម្ពុជា បញ្ជូនក្រុមជម្រើសដើម្បីខ្លួនទៅហ្វឹកហាត់និងប្រកួតក្នុងទ្វីបអឺរ៉ុប នេះគឺដើម្បីត្រៀមចូលរួមការប្រកួតកីឡាស៊ីហ្គេមលើកទី៣១ ឆ្នាំ២០២២ នៅប្រទេសវៀតណាម និងត្រៀមការប្រកួតកីឡាស៊ីហ្គេម លើកទី៣២ ឆ្នាំ២០២៣ កម្ពុជា ធ្វើជាម្ចាស់ផ្ទះ៕
