លោក Choi Young Seok គ្រូបង្វឹកកីឡាតេក្វាន់ដូ ជនជាតិកូរ៉េខាងត្បូង ដែលបានជួយដល់ប្រទេសថៃ រកបានមេដាយមាស នៅក្នុងព្រឹត្តិការណ៍កីឡាអូឡាំពិកឆ្នាំ២០២០ Olympic Games 2020 កាលពីពេលថ្មីៗនៅទីក្រុងតូក្យូ កំពុងតែរៀបចំឯកសារស្នើសុំសញ្ជាតិថៃ ក្រោមពីធ្វើដំណើរត្រឡប់មកដល់ប្រទេសអាស៊ាន មួយនេះវិញ។
សារព័ត៌មាន The Nation របស់ថៃ បានបញ្ជាក់ថាឯកសារស្នើសុំសញ្ជាតិរបស់បុរសវ័យ៤៧ឆ្នាំរូបនេះបានដល់ទីស្នាក់ការនគរបាលជាតិ ក្នុងរាជធានីបាងកក រួចរាល់ហើយ។ លោក Pimol Srivikorn ប្រធានសមាគមកីឡាតេក្វាន់ដូរបស់ថៃ និងកីឡាការិនី Panipak Wongpattanakit ម្ចាស់មេដាយមាស ទម្ងន់៤៩គីឡូក្រាមផ្នែកនារី នៅទីក្រុងតូក្យូថ្មីៗ ជាអ្នកជូនដំណើរបុរសកូរ៉េខាងត្បូង រូបនេះដាក់ពាក្យស្នើសុំ។
ឈ្មោះថ្មីរបស់លោកសម្រាប់ស្នើសុំសញ្ជាតិថៃគឺ Chatchai Che ហៅក្រៅថាCoach Chaeដែលលោកទទួលបាន១០០ពិន្ទុពេញ ក្នុងកិច្ចសម្ភាសន៍ផ្ទាល់មាត់ជាមួយមន្រ្តីជំនាញដើម្បីទទួលបានសញ្ជាតិ។ លោកមានផែនការទិញផ្ទះ និងរស់នៅក្នុងប្រទេសថៃ ក្នុងមួយជីវិតចុងក្រោយរបស់លោកផងដែរ។
លោក Choi Young Seok ធ្លាប់ជាគ្រូបង្វឹកតេក្វាន់ដូជម្រើសជាតិបារ៉ែន ចន្លោះឆ្នាំ២០០០ ដល់២០០២ មុនធ្វើដំណើរទៅដល់ប្រទេសថៃ នៅឆ្នាំ២០០២។ សិស្សរបស់លោក១រូប ឈ្នះមេដាយមាស នៅអូឡាំពិក ២ រូបឈ្នះមេដាយសំរឹទ្ធនិង៣នាក់ឈ្នះមេដាយសំរឹទ្ធ។ ជាមួយគ្នានេះដែរសិស្សរបស់លោកឈ្នះមេដាយមាស៣ នៅកីឡា Asian Games និង ៤រូបផ្សេងទៀតឈ្នះមេដាយពិភពលោក៕
