អ្នកនាង Maream Brown បានប្រកាសនៅមុននេះបន្តិចថា Account Instagram របស់អ្នកនាងកាលពីយប់ទី២០ខែមេសាឆ្នាំ២០២១ម្សិលមិញនេះត្រូវបានជនអនាមិក Hack ហើយគំរាមទារប្រាក់ដើម្បីជាថ្នូរដោះដូរនឹងការប្រគល់គណនីមកឱ្យអ្នកនាងវិញ។
ស្ត្រីដែលជា Youtuber ល្បីនិងជាអ្នកលក់សំលៀកបំពាក់បានឱ្យដឹងថាគណនីអ្នកនាងដែលមានឈ្មោះថា MareamBrown មានអ្នក Follow ចំនួន 55K ត្រូវបានគេលួច (Hack) តែមិនបានសម្រេចក្រោយមកទៀតគេបានព្យាយាមលួច(Hack)យក Account លក់សំលៀកបំពាក់របស់អ្នកនាងដែលមានឈ្មោះថា Fancy Marvria មាន Follower ចំនួន 1K ដោយលើកនេះអ្នកនាងមិនសំណាងដូចមុននោះទេព្រោះ Hacker លួចយកបានសម្រេច។ ក្រោយមកទៀតជនអនាមិកបានផ្ញើសារមកទាមទារយកប្រាក់ពីអ្នកនាងប៉ុន្តែអ្នកនាងមិនយល់ព្រម ដោយសារអ្នកនាងមិនយល់ព្រមជននោះបានរកលេសឱ្យអ្នកនាងផ្ញើលេខកូដការពារចំនួន៦ខ្ទង់ដែលភ្ជាប់ជាមួយនឹងលេខទូរស័ព្ទអ្នកនាងទៅគេប៉ុន្តែអ្នកនាងនៅតែមិនយល់ព្រមដដែល។ ទីបំផុតនៅមួយម៉ោងក្រោយបទសន្ទនាជាមួយនឹងជនអនាមិកនោះ Account IG របស់អ្នកនាងទាំងពីរខាងលើត្រូវបាន Disabled (មិនដំណើរការ)។ខណៈនេះអ្នកនាងកំពុងតែប្រកាសស្វែងរកភ្នាក់ងារឬសេវាកម្មជួសជុលណាដែលអាចដោះស្រាយនិងយក Account មកឱ្យអ្នកនាងវិញបាន ដោយអ្នកនាងបានបញ្ជាក់ថាចំពោះតម្លៃមិនជាបញ្ហានោះទេ។
យោងតាមការចែករំលែករបស់អ្នកនាង Maream សូមឱ្យបងប្អូនទាំងអស់ដែលមានប្រើប្រាស់ គណនី FB ឬ IG ដែលអាចមានភ្ជាប់ជាមួយនឹងកាតធនាគារផ្សេងៗនោះមានការប្រុងប្រយ័ត្នឱ្យបានខ្លាំងព្រោះបច្ចេកទេសបច្ចុប្បន្នទំនើបណាស់ដែលអាចផ្ដល់នឹងនាំឱ្យមានការខាតបង់ណាមួយជាយថាហេតុ៕