តារាចម្រៀង និងជាតារាសម្ដែងរូបស្រស់សោភាប្រចាំផលិតកម្មហង្សមាស និង រស្មីហង្សមាស កញ្ញា រ៉េត ស៊ូហ្សាណា ក្ដោបបានតំណែងជាតួឯកស្រីក្នុងរឿងភាគថ្មីមួយទៀតរបស់ស្ថានីយទូរទស្សន៍ហង្សមាស បន្ទាប់ពីធ្លាប់បង្ហាញវត្តមានជាតួឯកស្រីកន្លងមកហើយ ប៉ុន្តែនៅមិនទាន់ផ្ទុះការគាំទ្រគួរជាទីគាប់ចិត្តប៉ុន្មាននោះទេ។
កាលពីថ្ងៃទី២៨ ខែសីហា ឆ្នាំ២០២១ តួឯកស្រីរឿង «ម៉ែក្មេកចេញពីក្នុងព្រះចន្ទ» រូបនេះត្រូវទូរទស្សន៍ហង្សមាស បង្ហើបឱ្យដឹងតាមរយៈបណ្ដាញសង្គមថាកញ្ញាក្ដោបបានតំណែងជាតួឯកថ្មីក្នុងរឿងភាគខ្មែរថ្មីមួយទៀត ដែលសេចក្ដីប្រកាសនេះអាចចាត់ទុកបានថាជាដំណឹងល្អមួយសម្រាប់អ្នកស្រលាញ់ និង អ្នកគាំទ្រតារាស្រីរូបស្រស់ម្នាក់នេះ។
យ៉ាងណាមិញការប្រកាសខាងលើនេះត្រូវបានអ្នកគាំទ្ររឿងភាគខ្មែរមួយចំនួនរបស់ស្ថានីយខាងលើបង្ហាញសញ្ញាណវិជ្ជមាន ប៉ុន្តែក្នុងនោះក៏មានអ្នកគាំទ្រមួយចំនួនបានលើកជាមតិសំណូមពរឱ្យមានការបញ្ចូលសំឡេង ជាពិសេសទៀតនោះគឺសុំឱ្យអ្នកបញ្ចូលសំឡេងអាជីព បញ្ចូលសំឡេងឱ្យតារាស្រីរូបនេះតែម្ដង។
ការលើកឡើងខាងលើ អាចដោយសារតែរឿង «ម៉ែក្មេកចេញពីក្នុងព្រះចន្ទ» ដែលកញ្ញាសម្ដែងជាមួយលោក ដួង វីរៈសិទ្ធិ អតីតតារារួមទ្រនំ មានការលើកច្រើន ព្រោះការប្រើប្រាស់សំឡេងផ្ទាល់របស់កញ្ញា មិនសូវជាទាក់ទាញដោយសារតែកញ្ញាអាចនៅស្ទើតិចនិចក្នុងការប្រើប្រាស់ការលើកដាក់សំឡេង ទើបធ្វើឱ្យអ្នកគាំទ្រកាលណោះក៏បានលើកឡើងដែរថាបើសិនជាបញ្ចូលសំឡេងឱ្យកញ្ញាទៀតនឹងកាន់តែល្បី។
សម្រាប់ការលើកឡើងពីសំណាក់អ្នកគាំទ្រក្រោយទទួលបានដំណឹងថា ម្ចាស់បទ «ត្រូវការកម្លាំងចិត្ត» រូបនេះក្ដោបបានតំណែងតួឯករឿងថ្មី ហើយត្រៀមបញ្ចាំងនៅលើកញ្ចក់ទូរទស្សន៍ក៏បានលើកឡើងថា ៖ «សុំបញ្ចូលសំឡេងផង» «ស្រលាញ់រឿងបញ្ចូលសំឡេង» និង «អ្វីដែលសំខាន់គឺបញ្ចូលសំឡេងឱ្យគាត់ផង» ជាដើម។
ថ្វីត្បិតតែទូរទស្សន៍ហង្សមាសចេញមកប្រកាសដំណឹងកញ្ញា រ៉េត ស៊ូហ្សាណា ក្ដោបតំណែងរឿងភាគថ្មី ហើយនឹងមានបញ្ចាំងក្នុងពេលឆាប់ៗខាងមុខនេះក្ដី ប៉ុន្តែមិនបានបង្ហាញឱ្យបានលម្អិតនោះទេថា តើរឿងភាគថ្មីជារឿងបែបណា? ហើយស្រីតូចម្នាក់នេះនឹងសម្ដែងជាតួអង្គបែបណា?
