ពេលនេះបើហៅ Zheng Shaung ថានាងហង្សបាក់ស្លាបក៏មិនខុសដែរ ព្រោះតារាសម្ដែងជនជាតិចិនដីគោករូបនេះ ជួបបញ្ហាធំៗជាប់ៗគ្នា មិនថាជារឿងក្ដីគេចពន្ធរដ្ឋ រឿងបោះបង់កូនដែលកើតពីការពពោះជំនួស រហូតធ្វើឱ្យអស់អនាគតក្នុងសិល្បៈ ផលិតផល Brand ល្បីកាត់ផ្ដាច់កុងត្រាជា Presenter មិនតែប៉ុណ្ណោះថែមទាំងបាត់បង់សិទ្ធិចិញ្ចឹមកូនទៀត។
ទោះជាមុននេះមានដំណឹងថា Zheng Shaung ចាកចេញពីរង្វង់សិល្បៈ តែកាលណោះជីវិតរបស់ស្រីស្រស់រូបនេះក៏មិនពិបាកដែរព្រោះលុយដែលអ្នកនាងសន្សំមានច្រើនគួរសម ព្រោះរឿង Chinese Ghost Story ដែលអ្នកនាងបានសម្ដែងទទួលបានតម្លៃខ្លួនខ្ពស់រហូតដល់១៦០លានយ៉ន់ (ប្រមាណជាជាង២៤លានដុល្លារ)។
បច្ចុប្បន្នជីវិតរបស់ Zheng Shaung អាចនិយាយបានថាធ្លាក់កម្រិតមួយទាបបំផុត ដោយសាមីខ្លួនបានចេញមកបង្ហាញពីជីវិតដ៏សែនលំបាករបស់ខ្លួនរស់នៅសហរដ្ឋអាមេរិកថា ខ្លួនមិនអាចទទួលការងារនៅក្នុងរង្វង់សិល្បៈបាន ចំណែកគណនីក៏ត្រូវបង្កកដើម្បីពិនិត្យបញ្ជីស្នាមផ្សេងៗ ជីវិតបច្ចុប្បន្ននេះអាចរស់ទៅមុខបានបន្តទៀតដោយសារតែមានមិត្តភក្ដិជិតស្និទ្ធជួយ។
«បើនិយាយប្រាប់ទៅធ្វើឱ្យអ្នកទាំងអស់គ្នាមានអារម្មណ៍ល្អបានល្អ ខ្ញុំសូមប្រាប់ថាសព្វថ្ងៃនេះខ្ញុំត្រូវផឹកទឹកម៉ាស៊ីនរាល់ថ្ងៃ មានសំលៀកបំពាក់ត្រឹមអាវយឺតចំនួន៥ ខោខូវប៊យចំនួន២ មិនសូវមានអ្វីញ៉ាំនោះទេ សូម្បីតែក្រដាសអនាម័យប្រើតែពេលចាំបាច់ប៉ុណ្ណោះ»
អតីតតារាល្បីផ្ទុះខ្លាំងតាមរយៈសាច់រឿង «Love O2O» រូបនេះបានបន្តទៀតថា៖ «ថ្ងៃណាដែលខ្ញុំចង់ញ៉ាំអាហារចិន ខ្ញុំនឹងទិញខ្ទឹមបារាំង ខ្ទឹមស ស្លឹកខ្ទឹមចិន មកចៀនជាមួយនឹងពងទា លុយដែលមានត្រូវសន្សំទុកទិញអាហារ និងទុកទិញរបស់លេងឱ្យកូន»
យ៉ាងណាមិញ ក្រោយមានកើតហេតុការណ៍ទឹកជំនន់ដ៏ធំនៅប្រទេសចិន Zheng Shaung បានលុបសំណេរដែលខ្លួនបានផុសហើយ ទុកតែសំណេរលើកទឹកចិត្តនិងផ្ដល់កម្លាំងចិត្តដល់ប្រជាជនដែលរងគ្រោះព្រោះទឹកជំនន់ប៉ុណ្ណោះ៕