ទីបំផុតគណៈកម្មការរៀបចំការប្រកួតបានស្វែងរកឃើញក្រុមជម្រើសជាតិបាល់បោះបុរសចំនួន១៦គ្រប់ចំនួនហើយ ដែលកក់សំបុត្រយន្តហោះទៅកាន់ទីក្រុងហ្សាកាតា ប្រទេសឥណ្ឌូណេស៊ី ក្នុងព្រឹត្តិការណ៍ដណ្តើមជើងឯកបាល់បោះប្រចាំទ្វីបអាស៊ី 2021 FIBA Asia Cup ខណៈក្រុមកោះតៃវ៉ាន់ ជាកូនពៅគេ។
វគ្គជម្រុះពូល G នេះមានតែ២ក្រុមទេ គឺតៃវ៉ាន់ និងកោះហ្គាំម ដោយការប្រកួតធ្វើឡើងនៅទីក្រុង Mangolao ក្នុងកោះហ្គាំម ហើយជាលទ្ធផលនៅថ្ងៃទី២៦ ខែសីហា ឆ្នាំ២០២១ ហ្គាំម បានយកឈ្នះតៃវ៉ាន់ ៧៧-៧២ ហើយជើងទី២នៅថ្ងៃទី២៨ ខែសីហា ឆ្នាំ២០២១ នេះដែរតៃវ៉ាន់ បានយកឈ្នះវិញដោយលទ្ធផល ៨៥-៧៧។ សរុបលទ្ធផលទាំង២ជើងតៃវ៉ាន់ ឈ្នះហ្គាំម ១៥៧-១៥៤។
ក្រុមដែលមានឈ្មោះឡើងដូចជា៖
*ម្ចាស់ផ្ទះ៖ឥណ្ឌូណេស៊ី
*ពូល A៖ ហ្វីលីពីន និងកូរ៉េខាងត្បូង
*ពូល B៖ ចិន និងជប៉ុន
*ពូល C៖ អូស្ត្រាលី និងនូវែលហ្សេឡង់
*ពូល D៖ លីបង់ និងបារ៉ែន
*ពូល E៖ ស៊ីរី និងអ៊ីរ៉ង់
*ពូល F៖ កាហ្សាក់ស្ថាន និងហ្សកដានី
*ពូល G៖តៃវ៉ាន់
*ពូល H៖ អារ៉ាប៊ីសាអ៊ូឌីត និងឥណ្ឌា
តាមគម្រោងពានរង្វាន់ជើងឯកប្រចាំទ្វីប 2021 FIBA Asia Cup នឹងប្រកួតនៅចន្លោះថ្ងៃទី១៦ ដល់២៨ខែសីហា ឆ្នាំ២០២១ខាងមុខ ប៉ុន្តែដោយសារស្ថានភាពនៃការឆ្លងរីករាលដាលនៃជំងឺកូវីដ-១៩ នៅក្នុងប្រទេសអាស៊ាន មួយនេះមានការកើនឡើងខ្លាំងទើបសហព័ន្ធកីឡាបាល់បោះអន្តរជាតិបានសម្រេចកើកការប្រកួតទៅធ្វើនៅខែ កក្កដា ឆ្នាំ២០២២ វិញ។
ពាននេះរៀបចំឡើងរាល់២ឆ្នាំម្តង គិតចាប់តាំងពីឆ្នាំ១៩៦០ មកម៉្លេះ ស្របពេលក្រុមចិន ឈ្នះជើងឯកបាន១៦លើក ច្រើនជាងគេ ហើយហ្វីលីពីន ឈ្នះ៥លើក អ៊ីរ៉ង់ ឈ្នះ៣លើក កូរ៉េខាងត្បូងនិងជប៉ុន ឈ្នះម្នាក់២លើក និងអូស្រ្ដាលី ឈ្នះ១លើក ផងដែរ៕
