តារាសម្ដែងជួរមុខពីរដួងរបស់ហុងកុង Natalia Tong និងលោក Kenneth Ma ដែលធ្លាប់ចាប់គូសម្ដែងជាមួយគ្នាក្នុងរឿង «Big White Duel» បានត្រលប់មកសម្ដែងរួមគ្នាម្ដងទៀតនៅក្នុងរឿងភាគត្រៀមបញ្ចាំងរបស់ TVB និយាយពីប៉ូលិស ដែលមានចំណងជើងថា «The Invisible Team»។
ដោយសារតែរឿងនេះមានឈុតឆាកវាយតប់បាញ់ប្រហារច្រើនធ្វើឱ្យតារាទាំងពីរដួងនេះចាំបាច់ត្រូវតែទៅហាត់ប្រាណយករាងដើម្បីឱ្យស៊ីទៅនឹងតួអង្គ។ Natalia ថែមទាំងនិយាយទៀតថានាងបានមើលឃើញសាច់ដុំលេចចេញជារូបរាងក្រោយហាត់ប្រាណរាល់ថ្ងៃជាមួយនឹងគ្រូហាត់ប្រាណផ្ទាល់ខ្លួន។
នៅក្នុងរឿងនោះ តួអង្គរបស់អ្នកទាំងពីរនាក់ក៏មានឈុតឆាកសំខាន់ដែរគឺឈុតឆាកសម្ដែងជាមួយគ្នានៅលើគ្រែ។ យោងតាមការផ្សាយរបស់សារព័ត៌មានហុងកុងបានឱ្យដឹងថា ផលិតកររឿងនេះបានបង្ហើបឱ្យអ្នកសារព័ត៌មានបានដឹងដែរថាខណៈកំពុងតែថតឈុតឆាកស្នេហាតារាទាំងពីរដួងនេះបានធ្វើឱ្យបាក់គ្រែគេង។ នៅក្នុងនោះផលិតកររូបនោះក៏បានបង្ហើបដែរថាមិនត្រឹមតែធ្វើឱ្យបាក់គ្រែទេ តារាទាំងពីរដួងថែមទាំងធ្វើឱ្យបែកបង្អួចផងដែរ។
Natalia បានលើកឡើងថា Prop Master បានស្នើសុំឱ្យពួកយើងកុំប្រើកម្លាំងខ្លាំងពេក តែឈុតឆាកលើគ្រែពិតជាពិបាកថតណាស់ ព្រោះពួកយើងត្រូវផ្លាស់ទីពីទ្វារទៅបន្ទប់ទទួលភ្ញៀវរួចហើយទៅកាន់បន្ទប់គេង។ នេះគឺជាការប្រកួតប្រជែងមួយជាមួយនឹងខ្លួនឯង ធ្វើយ៉ាងណាឱ្យមើលទៅពិតៗ តែហាមធ្វើឱ្យបែកបាក់របស់ដូច្នេះពួកយើងត្រូវតែមានផែនការ»។
នៅក្នុងនោះក៏មានជាសំនួរលើកឡើងដែរថាមានពាក្យចចាមអារ៉ាមថា Natalia Tong នឹងចាកចេញពី TVB ដោយសារតែមើលមិនឃើញអនាគតខ្លួននៅទីនោះ ប៉ុន្តែតារាស្រីរូបនេះបានបដិសេធ ហើយច្រានចោលពាក្យចចាមអារ៉ាមនោះថាជារឿងមិនពិត ដោយនាងបាននិយាយថា ៖ «នៅក្នុងកាលៈទេសៈបែបនេះ តើអ្នកទៅរកការងារកន្លែងណា? ប៉ុន្តែបើមានការងារធ្វើ ខ្ញុំមានពេលវេលាជានិច្ច»៕