នៅក្នុងបទសម្ភាសថ្មីៗនេះ តារាចម្រៀង តារាសម្ដែងលោក Nicholas Tse បានលើកឡើងថាលោកកើតនៅហុងកុង លោកគឺជាជនជាតិចិនពីកំណើត ហើយលោកពេលនេះបានស្នើសុំលុបសញ្ជាតិកាណាដារបស់លោកហើយ។
Nicholas Tse បានលើកឡើងនៅកល្នុងបទសម្ភាសមួយពាក់ព័ន្ធនឹងរឿងសញ្ជាតិរបស់លោកដែរថា «មិនថាអាហារ តន្ត្រី ឬភាពយន្ត ខ្ញុំពិតជាមានអារម្មណ៍ថាបេះដូងខ្ញុំនិងទំនួលខុសត្រូវគ្រប់គ្រាន់ដើម្បីចែករំលែករឿងរ៉ាវល្អៗពីប្រទេសរបស់ខ្ញុំទៅកាន់ពិភពលោក»។
ការឆ្លើយតបរបស់តារារូបនេះគឺស្របគ្នាទៅនឹងរឿងរ៉ាវចម្រូងចម្រាសក្នុងឧស្សាហកម្មសម្ដែងក៏ដូចជាច្បាប់ចែងថ្មី ដោយមានដំណឹងចចាមអារ៉ាមជាច្រើនបានលេចចេញមកក្រៅជាហូរហែ។ រហូតមកដល់ពេលនេះមិនទាន់ដឹងច្បាស់នៅឡើយទេថាតើមូលហេតុអ្វីទើបឈ្មោះរបស់ Zhao Wei ត្រូវបានលុបចេញខ្ទេច។
ក្នុងនេះដែរក៏មានដំណឹងលេចឮតៗគ្នាទៀតថាមានតារាចិនជាច្រើនបានកំពុងស្ថិតក្នុងបញ្ជីខ្មៅរបស់រដ្ឋបាលប្រទេសចិន ពិសេសព័ត៌មានលេចឮនោះក៏ផ្ដោតជាសំខាន់ដែរថាតារាដែលមានសញ្ជាតិបរទេសនឹងក្លាយជាគោលដៅបន្ទាប់ដែលត្រូវរឹតបន្តឹងនិងចាត់ការលក្ខខណ្ឌដាច់ខាត។
ទោះជាដំណឹងរឿងសញ្ជាតិបរទេសមិនទាន់មានភាពច្បាស់លាស់ណាមួយក្ដីប៉ុន្តែសាធារណជនបានចាប់អារម្មណ៍លើតារាមួយចំនួនដែលមានឈ្មោះក្នុងបញ្ជីដូចជា Jet Li ហៅ លី លានជា បានស្នើសុំសញ្ជាតិអាមេរិកមុននឹងក្លាយជាជនជាតិចិនសញ្ជាតិសិង្ហបុរី ក្នុងឆ្នាំ២០០៩។ Zhang Tielin គឺជាតារាចិនម្នាក់ទៀតដែលមានសញ្ជាតិអង់គ្លេស។ ចំណែក Crystal Liu Yifei ដែលបានអន្តោប្រវេសន៍ទៅកាន់អាមេរិកក្រោយឪពុកម្ដាយលែងលះគ្នាកាលពីអាយុ១៨ឆ្នាំ ក៏មានសញ្ជាតិអាមេរិក។ Will Pan និង Wang Leehom មានសញ្ជាតិអាមេរិក ខណៈដែល Nicholas Tse ក៏ស្ថិតនៅក្នុងបញ្ជីខ្មៅព្រោះមានកាន់សញ្ជាតិកាណាដាដូចគ្នាទៅនឹង Mark Chao។
ផែនការស្នើសុំលុបសញ្ជាតិកាណាដារបស់តារាសម្ដែងល្បីរូបនេះបានធ្វើឱ្យមនុស្សជាច្រើនមានការភ្ញាក់ផ្អើលប៉ុន្តែរឿងនេះមិនមែនជារឿងថ្មីដែលទើបតែកើតមាននោះទេ ព្រោះកាលពីដើមឆ្នាំ២០២១ Arthur Chen Feiyu ដែលកើតនៅអាមេរិកបានក្លាយជាជនជាតិចិនសញ្ជាតិចិនជាផ្លូវការក្រោយលុបចោលសញ្ជាតិអាមេរិកខ្លួន៕
ប្រភព៖ Dramapanda