អ្នកនាង ម៉េង កែវពេជ្ជតា មួយរយៈនេះហាក់សម្បូររឿងធ្វើឱ្យក្ដៅក្រហាយចិត្ត អស់ពីរឿងមួយចូលដល់រឿងមួយទៀត មិនឱ្យបានសំរាកសោះ ព្រោះអស់ពីរឿងមានអ្នកលើកឡើងថាកូនមានដុងសិល្បៈដោយសារតែកាត់តាមហ្សែនឪពុក មកដល់រឿងថ្មីនេះមានគណនីមួយដាក់ឈ្មោះថា អ្នកគាំទ្រ បាន មុនីល័ក្ខ ជាភាសាអង់គ្លេសចូលមកឌឺដងឱ្យរឿងច្រៀងយកបទភ្លេងចម្លងតែពីគេទៀត។
កញ្ញា បាន មុនីល័ក្ខ ដែលជាតារាចម្រៀងប្រចាំផលិតកម្ម Town Entertainment កំពុងតែជួបរឿងស៊យដោយមិនដឹងខ្លួន ព្រោះនៅសុខៗសោះ ស្រាប់តែផ្ទុះរឿងមកដល់ខ្លួន ដោយសារតែមានគណនីមួយដាក់ឈ្មោះជាអ្នកគាំទ្រខ្លួនចូលទៅ Comment ថាឱ្យតារារៀមច្បង អ្នកនាង ម៉េង កែវពេជ្ជតា។
កាលពីថ្ងៃទី៩ ខែកញ្ញា ឆ្នាំ២០២១ ផេករបស់នាង ម៉េង កែវពេជ្ជតា បានបង្ហោះរូបថតបទសន្ទនារវាងខ្លួនជាមួយនឹងគណនីមួយដែលមានឈ្មោះថា Ban Monyleak Fan និងសរសេរសំណេរដោយកំហឹងព្រោះតែគណនីនោះបានវាយតម្លៃឱ្យអ្នកនាងថា និយមលួចភ្លេងថៃ និងភ្លេង អធិរាជសំឡេងមាស ស៊ិន ស៊ីសាមុត ក៏ដូចជាតារាចម្រៀង រស់ សេរីសុទ្ធា រួចយកមកកែបន្តិចបន្តួច ហើយដាក់ថាជាស្នាដៃរបស់ខ្លួន។
ការលើកឡើងខាងលើនេះបានធ្វើឱ្យអ្នកមេម៉ាយកូនពីរកើតទុក្ខមិនសុខចិត្តហើយបានធ្វើការផុសបង្ហាញពីការខឹងសម្បារព្រមទាំងលើកឡើងថា តារាស្រករក្រោយមិនព្រមហាមឃាត់អ្នកគាំទ្រខ្លួនបណ្ដោយឱ្យមករករឿងអ្នកនាង។
ក្រោយសំណេរបែបខឹងសម្បាររបស់អ្នកនាងត្រូវបានផុសចេញជាសាធារណៈក៏មានអ្នកលេងបណ្ដាញសង្គមជាច្រើនបានចូលមកប្រាប់ដល់អ្នកនាងថានោះជាគណនីក្លែងក្លាយមិនមែនជារបស់អ្នកនាង បាន មុនីល័ក្ខនោះទេ ប៉ុន្តែអ្នកនាង ម៉េង កែវពេជ្ជតា បានចូលមកឆ្លើយតបវិញថា អ្នកនាងដឹងថានោះមិនមែនជាគណនីរបស់កញ្ញា បាន មុន្នីល័ក្ខ ប៉ុន្តែអ្នកនាងចង់ឃើញតារារូបនេះចេញមកហាមឃាត់ និងបកស្រាយប្រាប់មហាជន ក៏ដូចជាចេញមកសុំទោសអ្នកនាង ព្រោះកញ្ញា បាន មុន្នីល័ក្ខទើបមានបញ្ហានេះកើតឡើង បន្ថែមពីនោះទៀតតារារៀមច្បងរូបនេះ ថែមទាំងផ្លែផ្កាទៀតថា តារាស្រករក្រោយមិនព្រមចេញមុខមកហាមឃាត់ ធ្វើមិនដឹង ឬជាចរិតពិតចូលចិត្តមើលគេឈ្លោះគ្នា?
បន្ទាប់ពីផ្ទុះរឿងរ៉ាវ ចម្រូងចម្រាស់នេះសារព័ត៌មានត្រយងបានទំនាក់ទំនងទៅកាន់តារាចម្រៀង កញ្ញា បាន មុន្នីល័ក្ខ ដើម្បីសុំការបកស្រាយប៉ុន្តែមិនទាន់ការឆ្លើយតបនោះទេ។
គួរដឹងថាកញ្ញា បាន មុន្នីល័ក្ខ បច្ចុប្បន្នគឺជាតារាចម្រៀងប្រចាំផលិតកម្មថោន កំពុងមានស្នាដៃសម្ដែងជាតួឯកស្រីក្នុងរឿងភាគ «ព្រហ្មលិខិតដុះស្លាប» របស់ទូរទស្សន៍ TownHD ជាមួយនឹងដៃគូតួឯកប្រុស លោក ម៉ៅ ហាជី ជាតារាចម្រៀងរួមផលិតកម្ម៕
ទស្សនាវីដេអូព័ត៌មានខាងក្រោម៖