សាធារណជនកំពុងតែមានការចាប់អារម្មណ៍ខ្លាំងចំពោះករណីចម្រូងចម្រាសរវាងអ្នកនាង ម៉េង កែវពេជ្ជតានិងសិស្សប្អូនក្នុងវិស័យសិល្បៈ បាន មុន្នីល័ក្ខ ព្រោះមួយរយៈក្រោយនេះភាគី អ្នកនាង ម៉េង កែវពេជ្ជតា នៅតែបន្តទាមទារនិងកើតទុក្ខមិនសុខចិត្តទោះជាកញ្ញា បាន មុន្នីល័ក្ខបានចេញមកសុំទោសជាសាធារណៈ និងផ្ញើសារទៅកាន់អ្នកនាង ម៉េង កែវពេជ្ជតាដោយខ្លួនឯងផ្ទាល់រួចក្ដី។
សូមចុចអាន បាន មុន្នីល័ក្ខ ត្រូវរៀមច្បង ម៉េង កែវពេជ្ជតា ប្រកាសចាំស្ដាប់ការពន្យល់និងបកស្រាយ!
ករណីរសើបរឿងមានអ្នកគាំទ្រកញ្ញា បាន មុន្នីល័័ក្ខចូលមកដៀលថានិងឌឺដងឱ្យអ្នកនាង កែវ ពេជ្ជតា រឿងយកបទភ្លេងពីបរទេសនិងបទភ្លេងមរតកដើមមកច្នៃហើយថាជារបស់ខ្លួនឯង ធ្វើឱ្យអ្នកនាងមេម៉ាយរូបនេះខឹងខ្លាំងព្រមទាំងចេញមកព្រមានចំពោះម្ចាស់គណនី ក៏ដូចជាទាមទារចង់ឱ្យ កញ្ញា បាន មុន្នីល័ក្ខសុំទោសខ្លួន។
ក្រោយពីការប្រកាសរបស់អ្នកនាង ឃើញថា កាលពីថ្ងៃទី១០ ខែកញ្ញា កញ្ញា បាន មុនីល័ក្ខបានចេញមកសុំទោសជាសាធារណៈតាមរយៈបណ្ដាញសង្គម ក៏ដូចជាផ្ញើសារទៅកាន់អ្នកនាង ម៉េង កែវពេជ្ជតា ដោយផ្ទាល់ ប៉ុន្តែអ្នកនាង ម៉េង កែវពេជ្ជតា ដូចជាមិនត្រជាក់ចិត្តងាយៗនោះទេ ព្រោះអ្នកនាងបានលើកឡើងថានេះមិនមែនជាលើកទីមួយឡើយដែលអ្នកចម្រៀងស្រករក្រោយបានប្រព្រឹត្តិទង្វើបំពានចំពោះខ្លួន រួចផ្ញើសារមកសុំទោស តែនៅតែខុសដដែលជាដដែលមិនព្រមកែប្រែសោះ។
រំលឹកដល់ដើមហេតុរហូតឈានដល់ផ្ទុះចេញជាទំនាស់នេះកើតឡើងដោយសារអ្នកនាង ម៉េង កែវពេជ្ជតា មិនសប្បាយចិត្តដែលកញ្ញា បាន មុន្នីល័ក្ខយកបទចម្រៀង «ជំនោរដើមខែ» ទៅបកស្រាយហើយមិនបានផ្ដល់ Credit ឱ្យដល់ខ្លួនដែលជាម្ចាស់ដើម។ ហើយបន្តមកទៀតក៏មានករណីគណនីប្រើឈ្មោះ Ban Monyleak Fan ចេញមកឌឺដងឱ្យអ្នកនាង ម៉េង កែវពេជ្ជតា ដូចរៀបរាប់ពីខាងលើ។
រហូតឈានដល់ថ្ងៃសៅរ៍ ទី១១ ខែកញ្ញា នេះ កញ្ញា បាន មុន្នីល័ក្ខ បានចេញមកសុំទោសម្ដងទៀត ព្រមទាំងប្រកាសថាខ្លួនបានលុបបទចម្រៀង «ជំនោរដើមខែ» ដែលជាបទបង្កើតឱ្យមានបញ្ហាកើតឡើងនេះចេញពីក្នុងឆាណែលយូធូបរបស់ខ្លួនរួចរាល់ហើយ ថែមទាំងពោលពាក្យសុំទោសនិងសុំការយល់យោគអធ្យាស្រ័យពីអ្នកនាង ម៉េង កែវពេជ្ជតា និង អ្នកគាំទ្ររបស់អ្នកនាងផងដែរ។