បច្ចុប្បន្នរឿងភាគ TVB (ហុងកុង) កំពុងតែត្រលប់មកមានប្រជាប្រិយមភាពឡើងវិញក្នុងចំណោមអ្នកទស្សនាបន្ទាប់ពីស្ងប់ស្ងាត់មួយរយៈដោយសារតែលំហូរចូលរឿងភាគថៃ រឿងភាគកូរ៉េ ហ្វីលីពីន ក៏ដូចជារឿងឥណ្ឌា ហើយការងើបមកល្បីល្បាញនិងមានការគាំទ្រច្រើននេះ បានធ្វើឱ្យតារាហុងកុងទាំងប្រុសទាំងស្រី ល្បីល្បាញនិងពេញនិយមពីសំណាក់ហ្វេន។ ថ្ងៃនេះសារព័ត៌មានត្រយងសូមលើកយកប្រវត្តិខ្លះៗរបស់ប្រុសស្អាត Vincent Wong តួឯកល្បីមកបង្ហាញជូនដូចទៅ៖
Vincent Wong កើតនៅថ្ងៃទី៧ ខែកក្កដា ឆ្នាំ១៩៨៣ បច្ចុប្បន្នមានវ័យ ៣៨ឆ្នាំ។ លោកមានស្រុកកំណើតនៅតំបន់ស៊ីនជាំង (Xinjiang)។ ឪពុករបស់លោកជាជនជាតិចិនហាន (Han Chinese) ចំណែកម្តាយលោកជាជនជាតិភាគតិចអ៊ុយហ្គួរ (Uyghur)។ Vincent Wong បានផ្លាស់ទៅរស់នៅទីក្រុងហុងកុងតាំងពីលោកនៅក្មេង។ Vincent Wong បានសិក្សារចនាក្រាហ្វិចនៅសាលាសិល្បៈហុងកុងហើយបានធ្វើការជាអ្នករចនាម៉ូដមុនពេលត្រូវបាននាំចូលសិល្បៈនាឆ្នាំ២០០៤។ បទចម្រៀងដំបូងរបស់លោកក្នុងនាមជាតារាចម្រៀងក្រោមផលិតកម្ម Neway Star មានចំណងជើងថា 訊號 (Signal) បានចេញផ្សព្វផ្សាយនៅថ្ងៃទី ២៨ ខែ មិនា ឆ្នាំ ២០០៥ ក្រោយមកទៀតបានចេញលក់ Album ចម្រៀងជាមួយ Neway ជាបន្តបន្ទាប់។
ឈានចូលដល់ ឆ្នាំ ២០០៨ បុរសសង្ហារូបនេះបានចុះកុងត្រាចូលរួមជាមួយ TVB ដោយបានប្រឡូកចូលក្នុងវិស័យសម្ដែងដំបូងតាមរយៈរឿង Wars of In-Laws II ។ ប្រាំឆ្នាំជាមួយ TVB ពោលនៅឆ្នាំ ២០១៣ លោកបានឈ្នះពានរង្វាន់ប្រចាំឆ្នាំ TVB ដំបូងសម្រាប់ពានរង្វាន់សិល្បករបុរសដែលមានការវិវត្តសមត្ថភាពល្អបំផុត (Most Improved Male Artiste award)។ ពីរឆ្នាំក្រោយទទួលពានរង្វាន់ ទីបំផុត Vincent Wong បានសម្តែងជាតួឯកប្រុសដំបូងនៅក្នុងរឿងកំប្លែង Brick Slaves ដោយរឿងនោះធ្វើឱ្យលោកទទួលបានរង្វាន់ជាតួសម្តែងឆ្នើមដំបូងគេនៅឯពិធីប្រគល់ពានរង្វាន់ TVB ប្រចាំឆ្នាំ ២០១៥ ។ លើសពីនេះទៀតលោកបានឈ្នះពានរង្វាន់ StarHub TVB Award សម្រាប់តួសម្តែងគាំទ្រ (Supporting Role) របស់ TVB ក្នុងរឿងមានចំណងជើងថា«Tomorrow is another day»។ ក្នុងឋានៈជាតារាសម្ដែង Vincent Wong បានផ្ទុះឡើងខ្លាំងក្នុងតួអង្គជា “Ditch” នៅក្នុងរឿង «Over Run Over» ដែលបានចាក់ផ្សាយកាលពីឆ្នាំ២០១៦ ។
ក្រៅពីទទួលបានពានជាតារាឯកសម្ដែងឆ្នើមហើយនោះ Vincent និងដៃគូសម្ដែងដ៏ស័ក្ដិសមរបស់លោកគឺ Tracy Chu ក៏បានឈ្នះប្រជាប្រិយភាពគូសម្ដែងដ៏ឆ្នើមនិងស័ក្តិសមបំផុតប្រចាំឆ្នាំ២០១៦ នៅក្នុងពេលប្រគល់ពានរង្វាន់ប្រចាំឆ្នាំរបស់ទូរទស្សន៍ TVB ផងដែរ។ ជាមួយនឹងសមត្ថភាពក៏ដូចជាទេពកោសល្យសម្ដែងបានល្អ Vincent Wong ត្រូវបានគេដាក់ឈ្មោះក្នុងបញ្ជីឈ្មោះកំពូលតារាឯកទាំង ៥ ក្នុងចំណោមតារាសម្តែងប្រុសឆ្នើមនិងតួអង្គប្រុសដែលមានប្រជាប្រិយបំផុតនៅហុងកុងទៀតផង។
បន្តបន្ទាប់មកទៀតប្រជាប្រិយភាពរបស់បុរសខ្ពស់សង្ហា ១,៨៦ សង់ទីម៉ែត្ររូបនេះ កាន់តែផ្ទុះការគាំទ្រខ្លាំងឡើងៗតាមរយៈតួអង្គដែលលោកបានសម្ដែង ដូចជាតួអង្គ Saving នៅក្នុងរឿង «My Unfair Lady» ប៉ុន្តែតួអង្គដែលធ្វើឱ្យអ្នកគាំទ្រនៅកម្ពុជាលង់ស្នេហ៍ដកចិត្តមិនរួចហើយចងចាំមិនភ្លេចនោះគឺតួអង្គ «Hope Man» មេធាវីពិការភ្នែកនៅក្នុងរឿង «យុទ្ធសាស្ត្របំបែកក្ដី វគ្គ១,២&៣) ឬឈ្មោះជាភាសាអង់គ្លេស «Legal Mavericks» ហើយតួអង្គនេះដែរបានធ្វើឱ្យលោកឈ្នះពានរង្វាន់ជាតារាឯកសម្ដែងឆ្នើមប្រចាំឆ្នាំ២០១៧ នៅក្នុងកម្មវិធីប្រគល់ពានរង្វាន់ប្រចាំឆ្នាំរបស់ TVB ។
រឿងដ៏មានប្រជាប្រិយភាពខ្លាំងរហូតផលិតវគ្គថ្មីជាបន្តបន្ទាប់ដូចជារឿង «យុទ្ធសាស្ត្របំបែកក្ដីវគ្គទី២» បានធ្វើឱ្យ Vincent Wong បន្តឈ្នះពានរង្វាន់ជាតួឯកឆ្នើមទៀតនៅឆ្នាំ ២០២០។ ឈានមកដល់ឆ្នាំ ២០២១ តារាសម្ដែងកូនមួយរូបនេះបានសម្ដែងក្នុងរឿងថ្មីមានចំណងជើងថា «Murder Diary» តទល់ជាមួយនឹង Kara Wai និង Phillip Keung។
សម្រាប់ជីវិតឯកជនវិញ Vincent Wong បានរៀបការជាមួយនឹងតារាសម្ដែង TVB ដូចគ្នាគឺតារាសម្ដែង Yoyo Chen ដែលមានវ័យបងលោក ៣ឆ្នាំ កាលពីថ្ងៃទី១១ ខែវិច្ឆិកា ឆ្នាំ២០១១ បច្ចុប្បន្នអ្នកទាំងពីរមានកូនស្រីម្នាក់ឈ្មោះ Wong Ching Kiu កើតនៅខែមេសា ឆ្នាំ២០១២ បច្ចុប្បន្នមានអាយុ ៩ឆ្នាំ៕