AS Saint-Étienne ជាក្លិបបាល់ទាត់ដែលឈ្នះជើងឯកពានរង្វាន់លីគកំពូលប្រទេសបារាំង បានច្រើនជាងគេគឺរហូតដល់ទៅ១០ដង ក្នុងអាយុកាល១០២ឆ្នាំ ខណៈព្រះអង្គម្ចាស់ នរោត្តម រ៉ាវីចក្រ ដែលជាសែស្រឡាយរាជវង្សនៃព្រះរាជាណាចក្រកម្ពុជា សព្វព្រះទ័យ ទិញយកក្លិបបាល់ទាត់មួយនេះ។
តើអ្នកស្គាល់ពីទ្រង់ នរោត្តម រ៉ាវីចក្រ កម្រិតណា? ព្រះអង្គម្ចាស់ នរោត្តម រ៉ាវីចក្រ ប្រសូតនៅថ្ងៃទី១ ខែមករា ឆ្នាំ១៩៧៤ ជាបុត្រាមួយអង្គរបស់សម្តេចព្រះមហិស្សរា នរោត្តម ចក្រព័ង្ស់និងអ្នកម្នាង ហ៊ុន សឿន។ ព្រះអង្គជាព្រះរាជនត្តា (ចៅ) មួយព្រះអង្គរបស់ព្រះបរមរតនកោដ្ឋ។
សារព័ត៌មាន leparisien បានចេញផ្សាយថាព្រះអង្គម្ចាស់ នរោត្តម រ៉ាវីចក្រ បានដាក់សំណើរតាមរយៈធនាគារ KPMG ទិញយកក្លិប AS Saint-Étienne ចំនួន១០០លានអឺរ៉ូ ខណៈភាគីខាងក្លិបនៅមិនទាន់ឆ្លើយតបនៅឡើយនោះទេ។ ក្លិបដែលមានមូលដ្ឋាននៅទីក្រុង Saint-Étienneមួយនេះបានប្រកាសដាក់លក់ជាផ្លូវការ ចាប់តាំងពីថ្ងៃទី១៣ ខែមេសា ឆ្នាំ២០២១ កន្លងមកម៉្លេះ។
ព្រះអង្គម្ចាស់ នរោត្តម រ៉ាវីចក្រ ចាត់ទុកថាការទិញក្លិបបាល់ទាត់មួយនេះនឹងអាចធ្វើឱ្យទំនាក់ទំនងរវាងបារាំងនិងកម្ពុជាកាន់តែប្រសើរឡើងមួយកម្រិតទៀតផងដែរ ម្យ៉ាងទ្រង់បានសព្វព្រះរាជហឫទ័យនូវវប្បធម៌របស់ទីក្រុងនេះផងដែរ។
សារព័ត៌មានថ្មីៗ របស់កម្ពុជា បានសម្ភាសន៍ព្រះអង្គម្ចាស់ នរោត្តម ពុទ្ធពង្ស ដែលជាព្រះរៀមរបស់ព្រះអង្គម្ចាស់ រ៉ាវីចក្រ ថា៖«ជាព័ត៌មានពិត។ នេះជាគម្រោងរបស់ព្រះអនុជខ្ញុំជាមួយមិត្តភក្តិព្រះអង្គដែលអ្នកជំនួញអឺរ៉ុប។ ខ្ញុំរំពឹងថា Saint-Etienne នឹងជ្រើសរើសសំណើនេះ»។
ក្លិបបាល់ទាត់ AS Saint-Etienne មានរហស្សនាមថាក្រុមពណ៌ខៀវ ឬ Les Stéphanois បានបង្កើតឡើងកាលពីឆ្នាំ១៩១៩ ដោយធ្លាប់ឈ្នះជើងឯកពានរង្វាន់លីគកំពូលបារាំង Ligue 1 ចំនួន១០លើកច្រើនជាងគេ។ បច្ចុប្បន្នក្រុមនេះប្រកួតបាន៦ លើកក្នុងរដូវកាលឆ្នាំ២០២១ ស្មើ៣លើក និងចាញ់៦លើក ឈរលេខ១៩ ក្នុងចំណោមសមាជិកទាំង២០៕