លោក Ronnie Brunswijk ដែលជាអនុប្រធានាធិបតី និងប្រធានក្លិបបាល់ទាត់ Inter Moengotapoe ក្នុងប្រទេស Suriname បានចូលលេងក្នុងការប្រកួតវគ្គ១៦ក្រុមចុងក្រោយនៃពានរង្វាន់កម្រិតទី២ប្រចាំទ្វីបអាមេរិកខាងជើង CONCACAF League រដូវកាលឆ្នាំ២០២១ នេះ។
លោក Ronnie Brunswijk មានវ័យ៦០ឆ្នាំហើយ ពាក់អាវលេខ៦១ ត្រូវបានគ្រូបង្វឹកលោក Josef Joekoe ដាក់ឱ្យចូលប្រកួតប្រមាណ៥៤នាទី និងពាក់ស្លាកជាប្រធានក្រុមផងដែរ ខណៈលទ្ធផលក្រុម Inter Moengotapoe របស់លោក បានចាញ់ក្រុមOlimpia របស់ហុងឌុយរ៉ាស់ ដោយលទ្ធផល៦ទល់០ លើទីលានកីឡដ្ឋាន Franklin Essed Stadion ក្នុងទីក្រុង Paramaribo ព្រឹកថ្ងៃពុធ ទី២២ខែកញ្ញា ឆ្នាំ២០២១ នេះ។
ប្រកួតនេះដែរកីឡាករ Rievaldo Doorson របស់ក្រុម Inter Moengotapoe ត្រូវលោកអាជ្ញាកណ្ដាល Oliver Vergara ជនជាតិប៉ាណាម៉ា ពិន័យកាតក្រហមនៅនាទី៨១ ផងដែរក្រោយបង្កកំហុស។
ក្រុម Inter Moengotapoe ធ្លាប់ឈ្នះពានរង្វាន់លីគកំពូលប្រទេសរបស់ខ្លួន (SVB Eerste Divisie) ១០លើក។ ក្រុមនេះទើបតែខកចិត្តត្រឹមវគ្គផ្ដាច់ព្រ័ត្រពានរង្វាន់ 2021 Caribbean Club Championship ក្រោយចាញ់ក្រុម Cavaly របស់ហៃទី ដោយលទ្ធផល ៣-០៕
