ចាត់ទុកជារឿងមួយដ៏គួរឱ្យសោកស្ដាយដែលពិធីបុណ្យកាន់បិណ្ឌត្រូវបានប្រកាសផ្អាកដោយសារតែមានផ្ទុះឆ្លងជំងឺកូវីដ-១៩ នៅតាមបណ្ដាវត្តអារ៉ាមមួយចំនួន តែបើងាកមកមើលលើបណ្ដាញសង្គមឯណេះវិញ តារាហ្វេសប៊ុក សម្បូររឿង កក្កដា សុភ័ណ្ឌ ហាក់ក្លាយផ្ទាំងស៊ីបរងការចោទប្រកាន់ថាលោកជាមេនាំស៊យ ទើបបណ្ដាលឱ្យបិទវត្តទូទាំងប្រទេសក្រោយលោកបានទៅធ្វើបុណ្យនៅវត្ត។
កាលពីថ្ងៃទី២៣ ខែកក្កដា ឆ្នាំ២០២១ តារាហ្វេសប៊ុក កក្កដា សុភ័ណ្ឌ បានបង្ហោះរូបថតមួយសន្លឹកថាលោកបានទៅវត្តដើម្បីថតការងារថ្មី ប៉ុន្តែក្រៅពីទទួលបានការទទួលសាទរពីអ្នកគាំទ្រហើយនោះ នៅតែគេចមិនផុតពីការរិះគន់ ព្រោះមានអ្នកលើកឡើងថាលោកទៅវត្តមួយថ្ងៃសោះស្រាប់តែត្រូវបិទគ្រប់វត្ត។
យោងតាមការផុសជាច្រើននៅលើបណ្ដាញសង្គមដែលកំពុងតែក្ដៅគគុកនោះ សង្កេតឃើញថា ឈ្មោះរបស់ កក្កដា សុភ័ណ្ឌ កំពុងតែក្លាយជាទីពេញនិយម ព្រោះលោកកំពុងក្លាយជាប្រធានបទដែលអ្នកលេងបណ្ដាញសង្គមលើកយកជជែកវែកញែកផងនិងរិះគន់ផងថាលោកគឺជាមូលហេតុនាំស៊យ ទើបធ្វើឱ្យគ្រប់វត្តនៅទូទាំងប្រទេសត្រូវប្រកាសផ្អាក។ ផ្អែកតាមរយៈការផុសរបស់ផេកគាំទ្រកម្មវិធីប្រកួតសម្រស់ដ៏ធំនិងមានហ្វេនចុច Like ច្រើនដូចជា Beauty pageant បានផុសរូបព្រមទាំងភ្ជាប់សំណេរថា «ស្ដាយណាស់អត់បានទៅវត្ដទៀតហើយឆ្នាំនេះ..»ក៏មានអ្នកចូលមកខមមិនភាគច្រើនស្ដីបន្ទោសនិងថ្កោលទោសចំពោះតារាហ្វេសប៊ុករូបនេះសឹងតែគ្រប់គ្នា ដូចជា «ផ្កាយដុះកន្ទុយស្រុកខ្មែរស្រីដាប្រហារពិភពលោក»និង «មិនទានបានបិណ្ឌមួយវត្តផងលូវបិទវត្តបាតចង្រៃម៉ង» ជាដើម។
ប៉ុន្តែមិនបានសេចក្ដីថាក្នុងនោះសុទ្ធតែស្ដីបន្ទោស កក្កដា សុភ័ណ្ឌ នោះឡើយព្រោះមានមតិខ្លះក៏បានលើកឡើងបែបយល់ចិត្តយល់ថ្លើមដែរថា ៖ «អ្នកមួយចំនួនដែលខមិនថាអោយគេនិង ជាមនុស្សប្រភេទអី ម៉េចBully គេសាហាវមេសគ្នាធ្វើអីក៏ខុស» និង « Bullyគ្នាសាហាវមួយចំនួនក្នុងខមិនគ្នាធ្វើអីក៏ខុស»។
គួរដឹងថា នេះមិនមែនជាលើកទីមួយឡើយដែល កក្កដា សុភ័ណ្ឌ ត្រូវបានអ្នកលេងបណ្ដាញសង្គមស្ដីបន្ទោសព្រោះកន្លងមកលោកក៏ធ្លាប់ត្រូវបានរិះគន់ខ្លាំងច្រើនដែរ ពាក់ព័ន្ធករណីចូលរួមពិធីមង្គលការមួយនៅខេត្តតាកែវ ហើយក្រោយមករកឃើញថាលោកមានកើតជំងឺកូវីដ-១៩៕