Ellen DeGeneres មិនដែលរំពឹងទេថាកម្មវិធីរបស់ខ្លួននឹងទទួលបានការគាំទ្រហើយអាចដំណើរការបានរហូតដល់ទៅ ១៩ឆ្នាំ មុននឹងសម្រេចចិត្តបិទកម្មវិធីនៅឆ្នាំ២០២២ ខាងមុខនេះ។
យោងតាមការផ្សាយ Bang Showbiz ពិធីការិនីវ័យ៦៣ឆ្នាំ ដែលបានចាប់ផ្ដើមកម្មវិធីជជែកកម្សាន្ត «Ellen Show» កាលពីឆ្នាំ ២០០៣ បើគិតមកដល់បច្ចុប្បន្ននេះមានរយៈពេល១៩ឆ្នាំគត់។
សមីខ្លួនម្ចាស់កម្មវិធីរូបនេះ មិនដែលគិតទេថាកម្មវិធីរបស់ខ្លួនអាចដំណើរការបានយូរយ៉ាងនេះ រហូតអាចបម្រើអារម្មណ៍អ្នកទស្សនានិងអ្នកគាំទ្ររហូតជិត ២ទសវត្សរ៍ យ៉ាងដូច្នេះទេ។
Ellen បានប្រកាសកាលពីខែឧសភា ឆ្នាំ២០២១នេះថា កម្មវិធីរបស់ខ្លួននិងឈានចូលដល់ទីបញ្ចប់ ហើយក៏ទទួលស្គាល់ដែរថាលោកស្រីមានគំរោងបិទកម្មវិធីតាំងពីរដូវកាលទី១៦មកម្ល៉េះ។
លោកស្រីបានបញ្ជាក់ថាការពិតលោកស្រីចង់បិទកម្មវិធីតាំងពីបាន១៦ឆ្នាំមកម្លេះប៉ុន្តែមានស្នើសុំឱ្យចុះកុងត្រាបន្ថែម៤ឆ្នាំទៀត ប៉ុន្តែលោកស្រីចង់ធ្វើត្រឹមមួយឆ្នាំទៀតប៉ុណ្ណោះ ហើយក្រោមការចរចាគ្នាទើបសម្រេចថាចុះកុងត្រា៣ឆ្នាំបន្ថែម ដូច្នេះពេលនេះគឺចប់កុងត្រា៣ឆ្នាំដែលបានចុះកិច្ចព្រមព្រៀងជាមួយគ្នាហើយ។
Ellen ក៏បានបញ្ជាក់ឱ្យដឹងដែរថាមានអ្នកស្នើឱ្យអ្នកស្រីធ្វើឱ្យគ្រប់២០ឆ្នាំ ប៉ុន្តែអ្នកស្រីយល់ថាត្រឹម១៩ឆ្នាំនេះគឺជាល្អបំផុតមួយហើយ។
គួរដឹងថាលោកស្រី Ellen DeGeneres កើតនៅថ្ងៃទី២៦ ខែមករា ឆ្នាំ១៩៥៨ បច្ចុប្បន្នមានវ័យ ៦៣ឆ្នាំ លោកស្រីគឺជាអ្នកកំប្លែង,ពិធីការិនីទូរទស្សន៍,តារាសម្ដែង,អ្នកនិពន្ធនិងជាផលិតករ៕