ក្រុមផលិតភាពយន្តល្បីល្បាញរបស់ Netflix «Squid Game» អាចនឹងត្រូវផាកពិន័យដែលបានប្រើប្រាស់លេខទូរស័ព្ទរបស់គេដោយខុសច្បាប់នៅក្នុងសាច់រឿង ខណៈពេលនេះកំពុងតែស្ថិតក្នុងដំណាក់ការពិភាក្សារកដំណោះស្រាយ។
យោងតាមការចុះផ្សាយពីសារព័ត៌មានក្នុងស្រុកកាលពីថ្ងៃទី២៣ ខែកញ្ញា ឆ្នាំ២០២១ ក្រុមផលិតភាពយន្ត «Squid Game» បានប្រឈមនឹងការតវ៉ាពីមនុស្សម្នាក់ដែលក្លាយជាជនរងគ្រោះក្នុងអំពើបង្ហាញលេខទូរស័ព្ទរបស់គេជាសាធារណៈដោយខុសច្បាប់។
បុគ្គលរូបនោះបានបង្ហើបឱ្យដឹងថាលេខទូរស័ព្ទដែលបានសរសេរលើ Business Card ក្នុងរឿង «Squid Game» គឺដូចគ្នាទៅនឹងលេខដែលខ្លួនប្រើប្រាស់ អស់រយៈពេលជាង១០ឆ្នាំមកហើយ។ បុគ្គលដដែលនោះបានអះអាងថាដំបូងឡើយរូបគេមិនបានដឹងទេថាហេតុអ្វីបានទទួលបានការខលចូលច្រើនខុសធម្មតា ប៉ុន្តែក្រោយមកមានមិត្តរបស់ខ្លួនច្រើននាក់ប្រាប់ថាលេខទូរស័ព្ទរបស់គេត្រូវបានយកទៅបង្ហាញនៅក្នុងរឿង។
ក្រៅពីទទួលបានការខលមួយថ្ងៃៗជាង៤ពាន់ដងហើយនោះ នៅទទួលបានទាំងការផ្ញើសារចូលយ៉ាងច្រើនខ្លាំងមិនចាញ់គ្នាដែរ។ លេខទូរស័ព្ទដែលត្រូវបានអះអាងថាមានម្ចាស់នោះ បានបង្ហាញវត្តមានឱ្យឃើញចំនួនពីរដង ម្ដងនៅភាគទីមួយ ពេលដែលតួអង្គបុរសពាក់អាវធំបង្ហាញកាតឱ្យទៅតួអង្គ Seong Gihun និងម្ដងទៀតក្នុងវគ្គទីពីរពេលដែល Gihun សម្រេចចិត្តចូលរួមលេងហ្គេមវគ្គ២ជាបន្តទៀត។
យោងតាមច្បាប់ប្រទេសកូរ៉េខាងត្បូង ការដែលធ្វើឱ្យបែកធ្លាយឬលេចចេញនូវព័ត៌មានរបស់អ្នកដទៃជាសាធារណៈដោយមិនបានធ្វើការបិទបាំងអ្វីទាំងអស់នោះ នឹងត្រូវពិន័យជាទឹកប្រាក់រហូតដល់៥០លានវ៉ុន (ស្មើនឹង៤២៥០០ដុល្លារអាមេរិក)៕