អ្នកគាំទ្រភាពយន្តកូរ៉េបើនិយាយពីរាជបុត្រប្រចាំ K-drama ដែលឆក់បានបេះដូងហ្វេនហើយធ្វើឱ្យហ្វេនទន្ទឹងរង់ចាំការវិលត្រលប់មកវិញនោះ ច្បាស់ជាមានបុរសសង្ហាទាំង៣ គឺ Kim Soo Hyun, Lee Jong Suk, និង Lee Min Ho នៅក្នុងបញ្ជី ព្រោះវត្តមានតារានាំសំណាងទាំង៣សម្ដែងរឿងណារឿងនោះមាន Rating ខ្ពស់ ហើយជាប់ Trend លើ Twitter រហូត។
ចុងឆ្នាំ២០២១ កាន់តែខិតជិតមកដល់ ឆ្នាំ២០២២ ក៏កំពុងតែរង់ចាំស្វាគមន៍យ៉ាងកក់ក្ដី ជាធម្មតា ផលិតករ ឬផលិតកម្ម ច្បាស់ជាត្រៀមរួចជាស្រេចសម្រាប់ Project ដើមឆ្នាំនិងចុងឆ្នាំ ដូច្នេះហើយមិនមែនជាការចម្លែកពេកនោះទេដែលឈ្មោះរបស់រាជបុត្រទាំង៣ដួងត្រូវបានអ្នកគាំទ្រនឹករលឹក ហើយចង់ទស្សនារឿងដែលបុរសសង្ហាសម្ដែងនោះ ហើយសង្ឃឹមថាបុរសរូបណាមួយនឹងបង្ហាញវត្តមានសម្ដែងឡើងវិញ។
សម្រាប់ចុងឆ្នាំ២០២១ ឈានចូលដើមឆ្នាំ២០២២ ខាងមុខនេះ វិស័យសិល្បៈភាពយន្តកូរ៉េខាងត្បូងនឹងកក្រើកជាថ្មីព្រោះរាជបុត្រទាំង៣ប្រចាំ K- Drama នឹងបង្ហាញវត្តមានសម្ដែងជាតួអង្គឯកប្រុសក្នុងរឿងភាគចំនួន៣ខុសៗគ្នា។ Lee Jong Suk នឹងវិលមកសម្ដែង ចាប់ដៃគូជាមួយនឹង Noona (សមាជិក Girl’s Generation) នៅរឿងភាគថ្មីរបស់ TVN បែបផ្លូវច្បាប់ «Big Mouth» ដោយរឿងដែលនឹងត្រៀមបញ្ចាំងនោះអ្នកទាំងពីរសម្ដែងជាគូស្វាមីភរិយាជាមួយនឹងគ្នា។
ខណៈបុរសភពផ្កាយ Kim Soo Hyun នឹងសម្ដែងក្នុងរឿង One Ordinary Day (That Night) ជាខ្សែរឿងដែលផលិតយកលំនាំតាមភាពយន្តរបស់ BBC រួមសហការសម្ដែងជាមួយនឹងកំពូលតារាជើងចាស់ល្បីល្បាញជាសកលលោក Cha Seung Won។ រឿងនេះនិយាយពីសិស្សវិទ្យាល័យម្នាក់ត្រូវបានក្លាយជាជនសង្ស័យសម្លាប់មនុស្សហើយគេព្យាយាមរកគ្រប់មធ្យោបាយដើម្បីលាងជំរះភាពស្អាតស្អំនិងកេរ្តិ៍ឈ្មោះរបស់ខ្លួនឡើងវិញ។
ចុងក្រោយគ្មានអ្នកទៀតក្រៅពីបុរសល្អជាងផ្កា F4 ឬ Lee Min Ho នោះឡើយ បុរសខ្ពស់ដូចដើមត្នោតរូបនេះបានសម្ដែងរឿង Pachinko ជាភាពយន្តថតយតាមលំនាំប្រលោមលោកកូរ៉េអាមេរិកកាំងដែលមានឈ្មោះដូចគ្នា។ រឿងនេះនិយាយពីគ្រួសារដែលរស់នៅផ្ដុំគ្នាក្នុងប្រទេសជប៉ុន និងប្រទេសកូរ៉េ ព្រមទាំងបរិយាយពីគ្រួសារដែលមានមនុស្សប្រកាន់ខ្ជាប់ប្រពៃណីនិងទំនៀមទំលាប់ផ្សេងៗរៀងខ្លួន។
ត្រយងជឿថារឿងភាគដែលរាជបុត្ររូបសង្ហាទាំង៣ដួងនេះយល់ព្រមសម្ដែងប្រាកដជាល្អមើលនិងមានចំណុចទាក់ទាញខ្លាំងហើយទើបធ្វើឱ្យពួកគេព្រមទទួលសម្ដែង ម្យ៉ាងទៀតចរិតតួអង្គសុទ្ធតែថ្មី ខុសពីតួអង្គដែលអ្នកទាំង៣រូបធ្លាប់បានសម្ដែងថែមទៀត។