កញ្ញា សេង សូណា អតីតតារាសម្ដែងនិយមលេងខ្លួនសិចស៊ី បច្ចុប្បន្នមានជីវភាពខ្វះមុខក្រោយ ការរស់នៅមានលក្ខណៈក្រលំបាក ចំណែកឯសម្រស់វិញក៏បាក់ ខុសប្លែកពីអតីតកាលខ្លាំង ខណៈដែលរស់នៅលំបាកហើយនោះ តារាស្រីរូបនេះថែមទាំងជួបរឿងអកុសលបានឆ្លងនូវជំងឺកូវីដ-១៩ ថែមទៀត។
តាមការរៀបរាប់ប្រាប់កាសែតក្នុងស្រុកមួយតារាស្រីរូបនេះបានឆ្លងជំងឺកូវីដ-១៩ រយៈពេល១សប្ដាហ៍ហើយ ប៉ុន្តែដោយកត់សម្គាល់ឃើញថាមិនមានអ្វីធ្ងន់ធ្ងរទើបសម្រេចចិត្តព្យាបាលនៅតែផ្ទះ លុះត្រាតែផ្ទៃមុខស្រាប់តែប្រែជាជាំខ្មៅស្ទើរមើលមិនស្គាល់ទើបដាច់ចិត្តទៅសម្រាកព្យបាលនៅមន្ទីរពេទ្យសម្ដេចឪ ក្នុងខេត្តបាត់ដំបង។
ក្រៅពីកើតជំងឺឆ្លងដ៏សាហាវនេះហើយអតីតតារាសិចស៊ីក៏បានឱ្យដឹងដែរថាជីវភាពរបស់ខ្លួនលំបាកណាស់ ពិសេសសម្ភារៈចាំបាច់ត្រូវប្រើប្រាស់ក្នុងពេលព្យាបាលមិនមានប្រើប្រាស់នោះទេ ដូច្នេះទើបសេង សូណា សូមធ្វើការអំពាវនាវជូនដល់សប្បុរសជន មិត្តសិល្បៈដូចគ្នា ឱ្យជួយសង្គ្រោះរូបនាងផង ទោះជាតិចក្ដីច្រើនក្ដី ដើម្បីជួយសម្រួលឱ្យនាងឆ្លងផុតស្ថានភាពដ៏លំបាកនេះផង។
ចំពោះបងប្អូនដែលមានបំណងចង់ជួយដល់អតីតតារាសម្ដែងដែលកំពុងតែសម្រាកព្យាបាលជំងឺកូវីដ-១៩ នៅមន្ទីរពេទ្យសម្ដេចឪ ក្នុងខេត្តបាត់ដំបង អាចចូលរួមជួយឧបត្ថម្ភជាប្រាក់ដល់រូបនាងបានតាមរយៈលេខ ០៨៧ ៣៣៣៣ ៤៩ ឬ ABA ០៨៧ ៣៣៣៣ ៤៩។