មួយរយៈនេះមានអ្នកទស្សនារឿង «អ្នកឈ្នះ» វគ្គ២ ដែលកញ្ញា យ៉ា សុផាន់ម៉ៃ ដើរតួជាអ្នកទីបី (លីណា) ចូលទៅជ្រៀតជ្រែកគ្រួសាររបស់ប ៉ារ៉ា (Prince) និង ម៉ាក់លីន (រចនា រ៉ាវ៉ាឌី) ឱ្យបែកបាក់គ្នា បានចូលតួខ្លាំងនឹងរឿងនេះរហូតបានជេរខឹងចំពោះតួអង្គដែលកញ្ញា យ៉ា សុផាន់ម៉ៃបានសម្ដែង។ ចុះមានអ្នកណាបានដឹងទេថានៅក្នុងសាច់រឿងឈ្លោះគ្នាស៊ីសាច់ហុតឈាមតែខាងក្រៅរឿងវិញអ្នកទាំងពីរនេះដូចក្នុងសាច់រឿងដែរទេ?
ក្រោយផ្ទុះសង្គ្រាមតាមអនឡាញរវាងអ្នកចូលតួជ្រុលនិងហ្វេនរបស់កញ្ញាយ៉ា សុផាន់ម៉ៃ ដែលចូលមកការពារអាយដលរបស់ខ្លួនដែលត្រូវបានគេជេរប្រមាថចំពោះតួអង្គដែលកញ្ញាបានសម្ដែង ស្រាប់តែកាលពីរាត្រីថ្ងៃសៅរ៍ទី១ខែឧសភា ស្របពេលដែលផលិតកម្មសាស្ត្រាហ្វៀមប្រកាសស្វាគមន៍ការចូលរួមទ្រនំរបស់កញ្ញា យ៉ា សុផាន់ម៉ៃ ស្រាប់តែ ម៉ាក់លីន ដែលជាសត្រូវលេខ១ក្នុងរឿង «អ្នកឈ្នះ» វគ្គ២ បានបង្ហោះសំណេរយ៉ាងវែងអន្លាយរួមជាមួយនឹងរូបថត៣សន្លឹកអមភ្ជាប់ជាមួយនឹងសំណេររបស់ខ្លួនដើម្បីបញ្ជាក់អះអាងពីសម្ព័ន្ធភាពនិងទំនាក់ទំនងខាងក្រៅរវាងខ្លួននិងកញ្ញា យ៉ា សុផាន់ម៉ៃ ថាយ៉ាងដូច្នេះ៖ «ស្វាគមន៍មកកាន់គ្រួសារ Sastra Ya Sophan Mai ចូលមករួមដៃគ្នានាំភាពយន្តរឿងខ្មែរឆ្ពោះទៅកាន់ពិភពលោកឆ្លៀតឱកាសដែលស្វាគមន៍សមាជិកថ្មីនេះសូមនិយាយបន្តិចណា ចង់ប្រាប់ទៅកាន់ fan របស់គាត់ និង fan របស់ខ្ញុំទាំងអស់គ្នាថា ពួកខ្ញុំឈ្លោះគ្នាតែក្នុងរឿងទេហើយពួកខ្ញុំមិនមែនត្រឹមតែស្គាល់គ្នារឿងនឹងទេពួកយើងស្គាល់គ្នានិងរាប់អានគ្នាតាំងពីយូរមកហើយតាមពីខ្ញុំចេញថតរឿងដំបូងមកម៉្លេះហើយចរិករបស់ស្រីម៉ៃនៅក្រៅអត់អីទេអត់ដូចក្នុងរឿងទេគាត់គួរឱ្យស្រលាញ់ណាស់ អញ្ចឹងឈប់ឈ្លោះគ្នាទៀតណាfan fan គួរឱ្យស្រលាញ់ទាំងអស់គ្នា»។
បន្ទាប់ពីសំណេររបស់កញ្ញាបង្ហោះចេញទៅក៏មាន Fan ជាច្រើនបានចូលរួមកោតសរសើរនិងអបអរសាទរចំពោះមិត្តភាពរបស់អ្នកទាំងពីរ ព្រមទាំងផ្ដាំដល់អ្នកដែលចូលតួឱ្យឈប់ជេរទៀតព្រោះនៅខាងក្រៅអាយដលទាំងពីរស្រលាញ់រាប់អានគ្នាមិនមានឈ្លោះទាស់ទែងដូចក្នុងសាច់រឿងនោះទេ។
កញ្ញា យ៉ា សុផាន់ម៉ៃ ដែលផ្ទុះការគាំទ្រយ៉ាងខ្លាំងតាមរយៈការសម្ដែងជាតួអង្គម្ចាស់តូចមីរ៉ា ភាពយន្តភាគខ្មែរដ៏ល្បីល្បាញរបស់ស្ថានីយទូរទស្សន៍ ភីអិនអិន បានចូលរួមជាគ្រួសាររបស់ផលិតកម្មសាស្ត្រាហ្វៀមកាលពីថ្ងៃទី១ខែឧសភាម្សិលមិញនេះ ហើយកញ្ញាក៏នឹងមានរឿងភាគខ្លីវែងជាច្រើនទៀតចាំបំរើអារម្មណ៍អ្នកគាំទ្រជាបន្តទៀតក្នុងផលិតកម្មនេះ៕