Song Hye Kyo ហៅ ហាន់ ជីអ៊ុន និងប្រុសស្អាត Yoo Ah In គឺជាមិត្តភក្ដិដែលរាប់អានគ្នាយ៉ាងល្អ ក្នុងឋានៈមិត្តភក្ដិ Yoo Ah In បានបង្ហាញការគាំទ្រចំពោះ Song Hye Kyo និង ក្រុមការងារថតរឿងថ្មីរបស់នាង។ តើអ្នកគាំទ្រចង់ដឹងទេថាតារាប្រុសរូបសង្ហាម្នាក់នេះផ្ញើរបស់អ្វីទៅឱ្យហាន់ជីអ៊ុន?
កាលពីថ្ងៃទី ១ ខែឧសភា ម្សិលមិញ Song Hye Kyo បានបង្ហោះ Story នៅលើ IG របស់ខ្លួនព្រមទាំងមួយរូបថតឡានកាហ្វេនិងសំណេរខ្លីថា៖ «អរគុណលោក Hong Sik » ។ រូបភាពនោះបង្ហាញពីឡានដឹកកាហ្វេលក់មួយគ្រឿងយកទៅដាក់បញ្ឈរនៅទីតាំងថតរឿង «Now, We Are Breaking Up» រឿងភាគថ្មីដែលសម្ដែងដោយ Song Hye Kyo Jang Ki Yong, Choi Hee Seo Kim Joo Heon , Sehun (ក្រុម EXO) និង Yura (Girl’s Day)។
ដោយនៅលើឡានមានចងបាដា៖ «ស្រលាញ់កញ្ញា Song Hye Kyo សូមមានអាយុយឺនយូរ» ពាក្យជូនពរពី Uhm Hong Sik ជាឈ្មោះពិតរបស់ Yoo Ah In ។
Song Hye Kyo និង Yoo Ah In រាប់អាននិងស្និទ្ធស្នាលគ្នាយូរឆ្នាំ ហើយតែងតែមានរបស់ផ្ញើគ្នាទៅវិញទៅមកដើម្បីបង្ហាញពីការគាំទហរនៅពេលអ្នកទាំងពីរមាន Project ថ្មីៗ ទោះបីជាអ្នកទាំងពីរមិនដែលធ្លាប់បានសម្ដែងរឿងជាមួយគ្នាក្ដី។
រឿងថ្មីដែលអ្នកគាំទ្រសង្ស័យថាទំនងជាថតតាមសាច់រឿងពិតនៃស្នេហាបែកបាក់របស់ Song Hye Kyo និង អតីតស្វាមី Song Joong Ki ដែលមានចំណងជើងថា «Now,We Are Breaking Up» បានកំណត់ចាក់បញ្ចាំងនៅពាក់កណ្ដាលឆ្នាំ២០២១នេះនៅលើកញ្ចក់ទូរទស្សន៍ SBS ៕