សញ្ញា Blue Verify កំពុងក្លាយជាទីចាប់អារម្មណ៍សម្រាប់បុគ្គលល្បីៗ បច្ចុប្បន្ននេះ ព្រោះមានតារាសម្ដែង តន្ត្រីករ និងផលិតកម្មបានព្យាយាមស្នើសុំសញ្ញានេះដាក់នៅលើផេកឬឈ្មោះរបស់គេនីមួយៗ ដោយសារសញ្ញានេះគឺជាសញ្ញាបញ្ជាក់អត្តសញ្ញាណថាបុគ្គលឬគណនីមួយនោះពិតប្រាកដឥតក្លែងបន្លំ។
ងាកមកប្រទេសកម្ពុជាឯណេះវិញក៏មានសិល្បករ ក្រុមហ៊ុនសិល្បៈ ផលិតកម្មជាច្រើនបានទទួលសញ្ញា Blue Verify នេះដើម្បីបញ្ជាក់ពីសមាសភាពពិតរបស់ខ្លួន យ៉ាងណាមិញនៅក្នុងចំណោមបវរកញ្ញាទាំងអស់របស់កម្ពុជាមានតែពីររូបប៉ុណ្ណោះដែលទទួលបានសញ្ញា Blue Verify ទទួលស្គាល់ពីក្រុមហ៊ុនហ្វេសប៊ុក។
បវរកញ្ញាដំបូងគេដែលទទួលបានសញ្ញានេះគឺកញ្ញា ប៊ី សុធារី (Sotheary Bee) Miss Charm Cambodia 2021 ដោយកញ្ញាមានចំនួនអ្នក Follow ចំនួន 156K (គិតត្រឹមព្រឹកថ្ងៃទី៣០ ខែកញ្ញា ឆ្នាំ២០២១)ខណៈកាលពីថ្ងៃទី២៩ខែកញ្ញាឆ្នាំ២០២១ ម្សិលមិញនេះ បវរកញ្ញាឯកទីពីរដែលទទួលបានសញ្ញាសម្គាល់ Blue Verify ពីហ្វេសប៊ុកដូចគ្នាដែរនោះគឺកញ្ញា រ៉េត សារិតា (Sarita Reth) Miss Universe Cambodia 2020 ដោយកញ្ញាមានចំនួន Follow 285k នៅលើហ្វេសប៊ុកចំនួន (គិតត្រឹមព្រឹកថ្ងៃទី៣០ ខែកញ្ញា ឆ្នាំ២០២១)។
តើសញ្ញា Blue Verify គឺជាអ្វី? ការពិត (Blue Verify) ឬ The Blue Tick មានដើមកំណើតដំបូងនៅលើ Twitter គឺជាសញ្ញាមួយបញ្ជាក់ថាគណនី twitter នោះគឺជាគណនីពិតប្រាកដ។ ភាគច្រើនគណនីដែលមានសញ្ញា Blue Tick នេះគឺសិល្បករ,អ្នកនយោបាយ, និងស្លាកសញ្ញាល្បីៗ ដើម្បីបង្ហាញថាពួកគេគឺជាអ្នកណា។
ក្រោយមកសញ្ញានេះត្រូវបានបណ្ដាញសង្គមធំៗយកទៅប្រើប្រាស់ដើម្បីជាមធ្យោបាយបង្ហាញឬប្រាប់ថាគណនីរបស់សិល្បករនិងបុគ្គលល្បីៗ ក៏ដូចជាស្លាកសញ្ញាផលិតផលនោះគឺជារបស់ពិត៕