មួយរយៈនេះមានអ្នកលេងបណ្ដាញសង្គមមួយចំនួនបានជ្រួលតាមគ្នាហូបរុក្ខជាតិមួយប្រភេទដែលប្រជាជនហៅថា «ដើមដំបងយក្ស» ខណៈអ្នកខ្លះទៀតហៅថា «ប្រទាលបាតដៃ»។ រុក្ខជាតិនេះចាប់ផ្ដើមពេញនិយមក្នុងស្រទាប់មហាជនព្រោះមានអ្នកយករុក្ខជាតិមួយប្រភេទនេះមកញ៉ាំ និងបង្ហោះបង្អួតថាមានរសជាតិឆ្ងាញ់ ជូរអែមៗ ឬស្រដៀងនឹងរសជាតិផ្លែម្កាក់។
ដោយឃើញទំនោរហូបដំបងយក្សកំពុងតែផុសផុល តារាកំប្លែងដ៏មានប្រជាប្រិយគឺអ្នកនាង ស្រេង សុកាន់ដា ហៅ ស្រីខ្ញុង បានសាកទទួលដើមប្រទាលបាតដៃឬដែលគេហៅថាដំបងយក្សនេះនឹងគេដែរ ប៉ុន្តែជាលទ្ធផល អ្នកនាងពុលក្អួតប៊ិះនឹងស្លាប់ខ្លួនថែមទៀតផង។
ការលើកឡើងខាងលើនេះគឺតាមរយៈការបង្ហោះរបស់សមីខ្លួននៅបណ្ដាញសង្គម ដែលមានឈ្មោះថា «អូន សុកាន់ដា» ដោយសំណេររបស់អ្នកនាងមានន័យទាំងស្រុងយ៉ាងដូច្នេះ៖ «ជោរតាមគេដំបងយក្សឆ្ងាញ់ណាស់ ឆ្ងាញ់ណាស់ឯងក្អួតចង់ស្លាប់», «ធ្វើការហត់មិនឈឺ មកឈឺដោយសារស៉ីដំបងយក្ស គួរឲ្យខឹងណាស់ អ្នកណាថាឆ្ងាញ់ចេញមុខមក»។
សម្រាប់រុក្ខជាតិដែលកំពុងតែពេញនិយមក្នុងចំណោមសាធារណជនមួយនេះ ក៏មានហ្វេសប៊ុកមួយដែលមានឈ្មោះថា បុរាណាចារ្យ ធ្វើការបកស្រាយពន្យល់យ៉ាងលម្អិតអំពីរុក្ខជាតិមួយប្រភេទនេះផងដែរ ខណៈដែលសារព័ត៌មានក៏បានធ្លាប់បានចុះផ្សាយអត្ថបទចែករំលែកចំណេះដឹងស្ដីពីការប្រៀបធៀបប្រទាលបាតដៃនេះដែរ។
សូមចុចអាន មុនញុំាំប្រទាលបាតដៃ ត្រូវដឹងពីប្រភេទរបស់វាសិន
គួរដឹងផងដែរថាអ្នកនាង ខ្ញុង គឺជាតារាកំប្លែងមួយរូបដែលមានកេរ្តិ៍ឈ្មោះនិងមានការគាំទ្រយ៉ាងច្រើនពីសំណាក់អ្នកគាំទ្រ បច្ចុប្បន្ននេះអ្នកនាងបានសម្រេចចិត្តលាឈប់ពីភាពជាបុគ្គលិករបស់ស្ថានីយទូរទស្សន៍ CTN ហើយមកផ្ដោតលើអាជីវកម្មអនឡាញលក់ ប្រហុក ផ្អក ត្រីងៀត នៅលើបណ្ដាញសង្គម មានការទទួលគាំទ្រច្រើនបង្គួរពីអតិថិជនជាពិសេសអ្នកគាំទ្ររូបអ្នកនាងតែម្ដង៕
