ក្រុម​បាល់ទាត់ Tottenham Hotspur សមាជិក​លីគ​កំពូល​ប្រទេស​អង់គ្លេស English Premier League នឹង​ប្រើប្រាស់​អាវ​ពិសេស​មួយ​ សម្រាប់​ប្រកួត​នៅ​យប់​ថ្ងៃ​អាទិត្យ ទី​៣ ខែ​ឧសភា ឆ្នាំ​២០២១ នេះ​តទល់​ជាមួយ​ក្រុម Sheffield United ក្នុង​សប្ដាហ៍​ទី៣៤។ អាវ​នោះ​នឹង​មាន​​មាន​អក្សរ​ខាង​មុខ​ថា« ISF ពី​កម្ពុជា ដោយ AIA»។

ISF គឺ​អក្សរ​កាត់​របស់​អង្គការ​ផ្កាយសមុទ្រ ដែល​មាន​ទស្សនវិស័យ​ផ្ដោត​លើ​អភិវឌ្ឍន៍​បាល់ទាត់​នៅ​កម្ពុជា។ កញ្ញា ជួប វិច្ឆិកា ប្រធាន​ប្រចាំ​ប្រទេសរបស់អង្គការផ្កាយសមុទ្រ​ បាន​លើក​ឡើង​​ថា៖«ការ​ដាក់​បង្ហាញ​និមិត្ត​សញ្ញា​របស់​អង្គការ​ផ្កាយ​សមុទ្រ​លើ​អាវ​កីឡា​ក្នុង​អំឡុង​ពេល​ប្រកួត ​គឺ​ជា​មោទនភាព​ដ៏​ធំ​ធេង​សម្រាប់​អង្គការ​របស់​យើង​ ក៏​ដូចជា​សម្រាប់​កុមារ និង​ប្រជាជន​កម្ពុជា ទាំងអស់ផងដែរ»។

កញ្ញា​បន្ថែម​ថា៖«ពួក​យើង​សូមថ្លែងអំណរគុណយ៉ាងជ្រាលជ្រៅចំពោះអ្នករាល់គ្នានៅ​ក្លិបបាល់ទាត់ Tottenham Hotspur និងក្រុមហ៊ុន AIA ដែលបានខិតខំ​ប្រឹងប្រែង​ដើម្បី​ឲ្យព្រឹត្តិការណ៍​មួយនេះ​អាច​ដំណើរ​ការ​ទៅ​បាន»។ សកម្មភាព​នេះ​មានការគាំទ្រពីសមាជិកជាច្រើន​នៅទូទាំងប្រទេស​កម្ពុជា, ចក្រភពអង់គ្លេស, ហុងកុង, អូស្ត្រាលី និង សហរដ្ឋអាមេរិក។ អង្គការផ្កាយសមុទ្រ ពិតជា​មាន​ក្តី​សោមនស្ស​យ៉ាង​ខ្លាំង​ក្នុង​ការ​អបអរសាទរ​ និង​លើក​ទឹកចិត្ត​ដល់ដៃគូ​ខ្លួន​នៅ​ជុំវិញ​ពិភពលោក​ក្នុង​ការ​ប្រកួត​​រវាង​ក្រុម Spur និង​Sheffield United នេះ។

ក្រុម​បាល់ទាត់ Spur បច្ចុប្បន្ន​កំពុង​ឈរ​ក្នុង​ចំណាត់​ថ្នាក់​លេខ​៧ ក្នុង​ពានរង្វាន់​លីគ​កំពូល​អង់គ្លេស ហើយ​ក្រុម Sheffield United ជា​ក្រុម​បាត​តារាង​ក្នុង​ចំណោម​សមាជិក​ទាំង​២០ក្រុម។ ជំនួប​រវាង​ក្រុម​ទាំង​២​នឹង​ធ្វើ​ឡើង​នៅ​វេលា​ម៉ោង​១:១៥នាទី​រំលង​អាធ្រាត្រ (ម៉ោង​នៅ​កម្ពុជា)៕

 

Share.