អ្នកគាំទ្រតារាចម្រៀងសញ្ជាតិអង់គ្លេស Adele បានត្រៀមទឹកភ្នែកហើយឬនៅ? ម្ចាស់ពានរង្វាន់ Grammy បានបង្ហាញវត្តមាន Live នៅលើ IG កាលពីថ្ងៃសៅរ៍ ខែតុលា ឆ្នាំ២០២១ កន្លងទៅនេះថាអ្នកនាងត្រៀមចេញបទចម្រៀងថ្មី «Easy On Me» នៅក្នុងអាល់ប៊ុមទី៤ របស់ខ្លួន។
នៅក្នុងការ Live នោះ Adele អង្គុយយកដៃឱបក្បាល ដោយមានចាក់អមសំឡេងចម្រៀងប្រមាណជា៣០វិនាទី ដកស្រង់ចេញពីបទថ្មីដែលនឹងត្រៀមចេញ។
ក្រោយបានស្ដាប់អត្ថន័យដ៏ខ្លីដកស្រង់ចេញពីបទចម្រៀងនោះរួច អ្នកគាំទ្រ បានបង្ហោះរៀបរាប់ពីចំណាប់អារម្មណ៍ខ្លួនលើបណ្ដាញសង្គម Twitter ថា «លោកអើយ! ទើបតែ៣០វិនាទីសោះ ខ្ញុំឈឺចាប់បាត់ទៅហើយ» ខណៈម្នាក់ទៀតបាននិយាយថា «ខ្ញុំបានត្រៀមខ្លួនសម្រាប់ការឈឺចាប់ហើយ។ ខ្ញុំមិនអាចទ្រាំរង់ចាំបានទៀតទេ»
ងាកមក Adele វិញនៅមិនទាន់បានបង្ហើបពីខ្លឹមសារជាក់លាក់ណាមួយពីអាល់ប៊ុមចម្រៀងទី៤របស់ខ្លួនជាផ្លូវការនៅឡើយទេ ប៉ុន្តែមនុស្សជាច្រើនរំពឹងថាអាល់ប៊ុមនោះគឺមានចំណងជើងថា «៣០» មួយឆ្នាំក្រោយពីម្ចាស់បទ «Hello» បាននិពន្ធចម្រៀងដ៏ច្រើន។ អាល់ប៊ុមចម្រៀងរបស់ Adele កន្លងមកចំនួន៣ សុទ្ធតែដាក់ឈ្មោះថា «១៩» «២១» និង «២៥» ដែលជាអាយុរបស់អ្នកនាងក្នុងពេលចេញអាល់ប៊ុមនោះ។
សម្រាប់ប្រធានបទក្នុងអាល់ប៊ុមថ្មីរបស់ Adele គឺអ្នកនាងកំពុងតែស្ថិតក្នុងដំណាក់កាលដ៏ពិសេសនោះ ជាពេលវេលាប្រកួតប្រជែងខ្លាំងមួយក្នុងជីវិត ព្រោះកាលពីឆ្នាំ២០១៩ Adele បានបែកបាក់ជាមួយនឹងអតីតស្វាមីលោក Simon Konecki ដោយអ្នកទាំងពីរមានកូនប្រុសម្នាក់ជាមួយគ្នាឈ្មោះ Angelo។
ចំពោះការបែកបាក់គ្នានេះ Adele បានប្រាប់ទស្សនាវដ្តី Vogue ថា «ខ្ញុំឆ្លងកាត់នូវអារម្មណ៍ច្រើនយ៉ាង ហើយខ្ញុំក៏មិនរីករាយដែរ រវាងពួកខ្ញុំមិនមានធ្វើខុសនោះទេ ហើយពីរនាក់ខ្ញុំក៏មិនមានអ្នកណាធ្វើឱ្យអ្នកណាឈឺចាប់ដែរ គឺគ្រាន់តែខ្ញុំចង់ឱ្យកូនប្រុសខ្ញុំមើលឃើញថាខ្ញុំមានការស្រលាញ់ ហើយក៏ទទួលបានការស្រលាញ់។ រឿងនេះមានសារៈសំខាន់ណាស់សម្រាប់ជីវិតខ្ញុំ»
សូមចុចអាន មានមូលហេតុ Adele ជះលុយ១៤លាន$ ទិញផ្ទះថ្មីជិតផ្ទះអតីតស្វាមីនិងផ្ទះចាស់២ទៀតរបស់ខ្លួន!
ខណៈដែលឆ្លងកាត់ជីវិតលែងលះដែលប្រហែលជាមើលទៅមានការយោគយល់ ដូច្នេះបទចម្រៀងដែលស្ដែងពីរឿងនេះក៏ប្រហែលជានឹងសោកសៅហើយឈឺចាប់ នេះគឺជាអ្វីដែលអ្នកគាំទ្ររបស់ Adele រំពឹងចេញពីអាល់ប៊ុមចម្រៀងថ្មីរបស់អាយដលខ្លួន៕
ទស្សនានិងស្ដាប់កម្សាន្តបទ «Easy On Me» ដែល Adele ចែករំលែកលើ Instagram របស់អ្នកនាង៖