បុរសសង្ហាតារាសម្ដែងលោកចិនលោក Wang Leehom វ័យ៤៥ឆ្នាំ ធ្លាប់បាននិយាយនៅក្នុងបទសម្ភាសន៍មួយថា មកដល់បច្ចុប្បន្ននេះលោកនៅពាក់អាវយឺតដែលលោកចូលចិត្តបំផុតតាំងពីលោកពាក់នៅថ្នាក់វិទ្យាល័យ។
តារាល្បីលោក Wang leehom មិនបានប្រើប្រាស់ទ្រព្យសម្បត្តិដែលលោករកបានដើម្បីឱ្យខ្លួនឯងរស់នៅស្រណុកស្រុកស្រួលឡើយព្រោះទ្រព្យសម្បត្តិរហូតដល់៩០ភាគរយរបស់លោកត្រូវបានបរិច្ចាគដើម្បីការងារមនុស្សធម៌។
ក្រៅពីមាន Apartment តម្លៃ១៩.៣លានដុល្លារជាកម្មសិទ្ធហើយនោះ ធ្លាប់មានពាក្យចចាមអារ៉ាមថាលោកមានទ្រព្យសម្បត្តិសរុបមិនជាប់បំណុលរហូតដល់៤៨.១លានដុល្លារ ប៉ុន្តែមហាជនមិនសូវឃើញលោកប្រើជីវិតជាអភិជនឱ្យសមទៅនឹងឋានៈនិងទ្រព្យសម្បត្តិដែលលោកមាននោះឡើយ ថែមទាំងមានអ្នកឃើញលោកជិះរថយន្ត BMW ចាស់ឆ្កូតថ្នាំអាយុកាល១៣ឆ្នាំ ថែមទាំងក្នុងកន្លែងចតឡានរបស់លោកមិនមានឡានទំនើបចតដូចជាតារាផ្សេងៗនោះឡើយ។
នៅក្នុងកម្មវិធីមួយមិត្តសម្លាញ់របស់លោក លោក David Tao បានប្រកាសរឿងមួយដែលធ្វើឱ្យមហាជនភ្ញាក់ផ្អើលខ្លាំងព្រោះលោកបានចែករំលែកថានៅក្នុងទូរខោអាវរបស់ Wang Leehom មានសុទ្ធតែស្រោមជើងរហែក។ ខណៈនោះ Wang Leehom ក៏ស្ថិតនៅកម្មវិធីនោះដែរ ដូច្នេះលោកត្រូវបានគេបង្ខំឱ្យដោះស្រោមជើង ហើយគឺពិតជាដូចអ្វីដែលបានលើកឡើងស្រោមជើងលោកពិតជារហែកប្រាកដមែន។
ការពិតសម្រាប់លោកគ្រាន់តែប្ដូរស្រោមជើងថ្មីគឺជារឿងមួយងាយស្រួលណាស់ ប៉ុន្តែលោកបែរជាពន្យល់នៅក្នុងការសម្ភាសន៍នោះថា លោកមិនមានចំណង់ចង់បានគ្រឿងតុបតែងកាយនោះទេ ម្យ៉ាងទៀតលោកមិនចង់ខ្ជះខ្ជាយ ដូចជាខោអាវដាច់រហែកក៏លោកមិនដាច់ចិត្តបោះចោលដែរ។
«ខ្ញុំនៅពាក់អាវយឺតដែលខ្ញុំពាក់តាំងពីនៅវិទ្យាល័យ។ សំលៀកបំពាក់៩៥ភាគរយដែលខ្ញុំស្លៀកចេញទៅក្រៅ ក្នុងកម្មវិធីផ្សេងៗសុទ្ធតែខោអាវខ្ចីឬស្ពន់សឺ ហើយស្អែកឡើងត្រូវយកទៅសងគេវិញឬយូរបំផុតត្រឹម ១សប្ដាហ៍»
ប៉ុន្តែបុរសកូន៣ ដែលសន្សំសំចៃខ្ពស់លើការចំណាយនិងរបស់ប្រើប្រាស់ផ្ទាល់ខ្លួន បែរជាចិត្តល្អដូចមហាសមុទ្រ ហើយមិនស្ទាក់ស្ទើរក្នុងការបរិច្ចាគសម្រាប់អ្នកមានតម្រូវការចាំបាច់ ដោយលោកធ្លាប់បានបង្ហើបឱ្យដឹងថាទឹកប្រាក់ ៩០ភាគរយពីចំណូល លោកបរិច្ចាគសប្បុរសធម៌ ចំណែកនៅសល់១០ភាគរយទៀតលោកទុកផលិតនិងនិពន្ធបទភ្លេង។
គួរដឹងថាលោក Wang Leehom និងភរិយា Lee Jinglei បានចាប់ផ្ដើមឧបត្ថម្ភមជ្ឈមណ្ឌលកុមារកំព្រាចំនួន២២កន្លែង តាំងពីអ្នកទាំងពីរចាប់ដៃគ្នារៀបការកាលពីឆ្នាំ២០១៣មកម្ល៉េះ ហើយសង្ឃឹមថាទៅថ្ងៃអនាគតនឹងជួយឧបត្ថម្ភកុមារកាន់តែច្រើនទៀត៕
