កាលពីរាត្រីថ្ងៃព្រហស្បតិ៍ទី២២ ខែតុលា ឆ្នាំ២០២១ កម្មវិធីប្រកួតសម្រស់ដ៏ធំមួយរបស់ប្រទេសកម្ពុជា Miss Universe Cambodia ឆ្នាំ២០២១ បានធ្វើការប្រកួតបឋមដោយក្នុងវគ្គនេះបេក្ខនារីសរុបទាំង១៩រូប ត្រូវប្រកួតប្រជែងចែកចេញជា ៣វគ្គសំខាន់ៗ មានវគ្គប្រកួតឈុតតំណាងជាតិ វគ្គប្រកួតឈុតរាត្រីស្រមោលស និងវគ្គប្រកួតឈុតហែលទឹក។
ចប់ការប្រកួតបឋម Miss Universe Cambodia 2021 បេក្ខនារី៨រូបទទួលបានពានរង្វាន់ពីកម្មវិធី ប៉ុន្តែក្នុងនោះមានបេក្ខនារី៣ រូបមានពានរង្វាន់ចំនួនពីរក្នុងដៃគឺ កញ្ញាសុង សុភក្ត្រ កញ្ញា ឡូយ ច័ន្ទរស្មី និង កញ្ញា ងិន ម៉ារ៉ាឌី ។
កញ្ញា សុង សុភ័ក្ត្រ បេក្ខនារីពាក់ស្លាកលេខ១៣ នៃកម្មវិធី Miss Universe Cambodia 2021 ឈ្នះពានចំនួន២ ពីវគ្គប្រកួតបឋម គឺពានរង្វាន់ឈុតតំណាងជាតិល្អផ្ដាច់គេ (គឺឈុតវប្បការិកា ចត្វានិមិត្ត) និង Miss Congeniality ។
កញ្ញា ឡូយ ចាន់រស្មី បេក្ខនារី ពាក់ស្លាកលេខ៣ មានវ័យ២០ឆ្នាំ កម្ពស់១.៦៥ ជាអ្នកខេត្តសៀមរាប បច្ចុប្បន្នកំពុងបន្តការសិក្សាឆ្នាំទី៣ផ្នែកច្នៃម៉ូដនៅសកលវិទ្យាល័យ ប្រទេសឥណ្ឌូនេស៊ី។ កញ្ញាអាចនិយាយបានចំនួន៤ភាសា ភាសាខ្មែរ អង់គ្លេស ចិន និង ឥណ្ឌូនេស៊ី។ កញ្ញា ចាន់រស្មី ឈ្នះពានពីរនៅក្នុងកម្មវិធីប្រកួតបឋមគឺពានរង្វាន់ឈុតតំណាងជាតិល្អផ្ដាច់គេ (ឈុតវីរៈនារីចំបាំង) និងពានរង្វាន់ Miss Personality។
កញ្ញា ងិន ម៉ារ៉ាឌី ឬ ងិន រ៉ូហ្សា បេក្ខនារី មានលេខសម្គាល់១៥ មានវ័យ២២ឆ្នាំ មានកម្ពស់១.៦៥ អាចនិយាយបានចំនួន៣ភាសា ខ្មែរ អង់គ្លេស និងថៃ។ កញ្ញាឈ្នះពានចំនួន ២រួមមានពានរង្វាន់ Miss Fashionista និង Miss Social Media Star។
សូមជំរាបជូនថានៅថ្ងៃព្រហស្បតិ៍ទី២៨ ខែតុលា សប្ដាហ៍ក្រោយកម្មវិធីប្រកួត Miss Universe Cambodia នឹងធ្វើការប្រកួតផ្ដាច់ព្រ័ត្រដោយមានការផ្សាយផ្ទាល់តាមរយៈផេក Miss Universe និងទូរទស្សន៍បាយ័ន៕