កាលពីថ្ងៃម្សិលមិញនេះ មានផ្ទុះរឿងមួយដែលកំពុងតែក្លាយជាប្រធានបទក្ដៅលើបណ្ដាញសង្គម ពាក់ព័ន្ធនឹងពាក្យចចាមអារ៉ាមដែលភាគីថៃមិនអនុញ្ញាតឱ្យបវរកញ្ញាកម្ពុជាស្លៀកឈុតតំណាងជាតិឡើងប្រកួត យ៉ាងណាមិញម្ចាស់ជយលាភី Miss Grand Cambodia 2021 កញ្ញា ប៉ូ គីមថេងសុតធីតា នៅថ្ងៃទី២៤ ខែតុលា បានចេញមកធ្វើការ Live (ឡាយ) បកស្រាយពីបញ្ហានេះ។
សូមចុចអាន តើពិតទេ? ភាគីថៃមិនអនុញ្ញាតឱ្យបវរកញ្ញាខ្មែរស្លៀកឈុតតំណាងជាតិមានរូបប្រាសាទអង្គរវត្ត
យោងតាមផេកផ្លូវការរបស់កញ្ញាឯកលេខ១ Sothida Pokimtheng (official account) បានធ្វើការ Live ផ្ទាល់បញ្ជាក់ពីមូលហេតុប្ដូរឈុតតំណាងជាតិ ដែលធ្វើឱ្យមានការជជែកតវ៉ាយ៉ាងក្ដៅគគុកខ្លាំងនោះថារឿងហេតុមួយចំនួនតាមពិតមិនធ្ងន់ធ្ងរឬដូចទៅនឹងការផ្សព្វផ្សាយព័ត៌មានទាំងស្រុងនោះទេ ម្យ៉ាងវិញទៀតការផ្លាស់ប្ដូរឈុតតំណាងជាតិនេះក៏មិនបានធ្វើការផ្លាស់ប្ដូរទាំងស្រុងរហូតដល់ខូចទ្រង់ទ្រាយដើមនោះទេ ប៉ុន្តែការប្ដូរទ្រង់ទ្រាយឈុតនេះគឺក្រុមការងារគិតគូរដល់កញ្ញា ព្រោះតែដើម្បីបង្ករភាពងាយស្រួលដល់កញ្ញាប៉ុណ្ណោះ។
ម្ចាស់ជយលាភីតំណាងខេត្តបាត់ដំបងរូបនេះ បានស្រាយបំភ្លឺថា ឈុតតំណាងជាតិនេះគឺពិតជាស្អាតខ្លាំង និងមានចំណុចទាក់ទាញប្រាកដមែន ប៉ុន្តែដោយសារតែការតម្លើងឈុតនេះត្រូវចាយពេលយូរស្ទើរពេញមួយថ្ងៃ ចំណែកទម្ងន់ក៏ធ្ងន់ ហើយការដឹកជញ្ជូនក៏មានការពិបាក ចំណែកការដើរបង្ហាញលើឆាកដែលមានវេលាត្រឹមតែ៤០វិនាទីលើឆាកនោះ ប្រាកដណាស់ច្បាស់ជាមិនអាចធ្វើបាននោះទេ ហេតុនេះទើបក្រុមការងារសម្រេចចិត្តផ្លាស់ប្ដូរទម្រង់និងទ្រង់ទ្រាយឈុតខ្លះ ប៉ុន្តែកញ្ញាក៏បានបញ្ជាក់ហើយបញ្ជាក់ទៀតថា ក្រុមការងារនឹងមិនធ្វើឱ្យបាត់បង់ភាពស្អាតនិងទាក់ទាញរបស់ឈុតនេះជាដាច់ខាត។
នៅក្នុងការ Live នោះដែរ កញ្ញា ប៉ូ គីមថេងសុតធីតា ដែលទើបតែក្រោកពីឈឺនោះក៏ត្រូវបានអ្នកគាំទ្រលើកទឹកចិត្តនិងជូនពរឱ្យកញ្ញាឆាប់ជាមានកម្លាំងពលំ និងគេចផុតពីជំងឺដង្កាត់នានា ព្រោះកញ្ញាកំពុងស្ពាយមោទកភាពជាតិ ត្រៀមចេញទៅប្រកួតនៅប្រទេសថៃក្នុងកម្មវិធី Miss Grand International នាចុងឆ្នាំ២០២១ខាងមុខនេះ៕
