បទចម្រៀង «Are You Ok?» របស់តារាចម្រៀង តន់ ចន្ទសីម៉ា ដែលធ្លាប់រងនូវការរិះគន់យ៉ាងខ្លាំងពីសំណាក់សាធារណជន បានកែសម្រួលរូបភាពវីដេអូនិងកាត់ចោលពាក្យពេចន៍ខ្លះចេញ។ ក្រោយកែសម្រួលបានរួចរាល់ឆ្លើយតបទៅនឹងការរិះគន់ និងទទួលបានទិដ្ឋាការពីក្រសួងវប្បធម៌និងវិចិត្រសិល្បៈ បទនេះបានបង្ហោះចេញឱ្យអ្នកគាំទ្រស្ដាប់និងទស្សនានៅថ្ងៃទី៤ ខែវិច្ឆិកា ឆ្នាំ២០២១ គិតមកដល់ត្រឹមម៉ោង ៤ល្ងាចថ្ងៃទី៥ ខែវិច្ឆិកានេះ «Are You Ok» មានចំនួនទស្សនាកើនដល់ជាង៥លានដងហើយ។ ជាពិសេសបទចម្រៀងនេះមិនត្រឹមតែកំពុងល្បីល្បាញខ្លាំងនៅក្នុងប្រទេសកម្ពុជានោះទេ ប៉ុន្តែបទចម្រៀងដែលជាស្នាដៃកូនខ្មែរមួយនេះកំពុងតែផ្ទុះបានការចាប់អារម្មណ៍យ៉ាងខ្លាំងពីសំណាក់អ្នកគាំទ្រនៅក្រៅប្រទេសផងដែរ។
បទចម្រៀងល្បីលើ Tiktok មួយនេះកំពុងពេញនិយមខ្លាំងនិងមានការចាប់អារម្មណ៍ច្រើនលើសលប់ពី សំណាក់អ្នកគាំទ្រជាតិនិងអន្តរជាតិ រហូតសារព័ត៌មានប្រទេសថៃបានយកទៅចុះផ្សាយលើកសរសើរយ៉ាងព្រោងព្រាត។
បទចម្រៀងមួយនេះបើតាមការចុះផ្សាយនៅលើសារព័ត៌មាន Komchadluek, Line Today និង The People បានចុះផ្សាយថាបទចម្រៀងនេះល្បីល្បាញណាស់នៅលើ App Tiktok ហើយក៏ជាបទចម្រៀង viral ដែលមានអ្នកយកទៅ Cover ទូទាំងពិភពលោក។
សារព័ត៌មានថៃក៏បានផ្សាយឱ្យដឹងដែរថា បទចម្រៀងរាំកាច់ចង្វាក់សប្បាយៗដែលក្រុមអ្នកលេង Tiktok យកទៅ Design និងបង្កើតក្បាច់រាំផ្សេងៗគ្នារហូតមាន Content Creator ថតជាវីដេអូមកប្រកួតប្រជែងគ្នាជុំវិញទូទាំងពិភពលោកនោះ ក៏មាន Idol កូរ៉េ ក៏យកបទចម្រៀងនេះទៅ Cover រាំដូចគ្នាដែរ។
យោងតាមសារព័ត៌មាន Komchadluek បានរៀបរាប់ពីប្រវត្តិបទ «Are You Ok» ថាជាបទចម្រៀងមានប្រភពចេញពីប្រទេសកម្ពុជាច្រៀងដោយតារាចម្រៀងល្បី តន់ ចន្ទសីម៉ា ដែលជាតារាចម្រៀងប្រចាំផលិតកម្ម Galaxy Navatra ជាពិសេសបទនេះគឺជាស្នាដៃនិពន្ធទំនុកភ្លេងនិងទំនុកច្រៀងដោយអ្នកឧកញ៉ា ឡេង ណាវ៉ាត់ត្រា CEO របស់ផលិតកម្ម Galaxy Navatra និងជា មហាសេដ្ឋីអចលនទ្រព្យនៅក្នុងប្រទេសកម្ពុជាផងដែរ។
គួរដឹងថា MV បទចម្រៀង «Are You Ok» ដែលបានកែសម្រួលទាំងវីដេអូនិងខ្លឹមសារខ្លះថ្មីនេះ ទទួលបានការសាទរនិងសរសើរច្រើន៕