Influencer ជនជាតិចិនត្រូវបានគេរិះគន់យ៉ាងខ្លាំងក្រោយពីនារីវ័យក្មេងរូបនេះបង្រៀនវិធីតុបតែងមុខដាក់លើ Youtube ។ ក្នុងវីដេអូនោះកញ្ញាបានផ្លាស់ប្ដូរសំបុរស្បែក ពណ៌បបូរមាត់ឱ្យក្លាយជាពណ៌ខ្មៅ ដោយប្រើឈ្មោះឃ្លីបវីដេអូនោះថា «រាជិនីវ៉ាកាន់ដា» ដែលជាតួអង្គក្នុងភាពយន្តល្បី «Blackpanther»។
Suzy Z Vloger ម្ចាស់ឆាណែល Youtube និង Tiktok ដែលមានចំនួនទស្សនាជាង២.៧លានដង។ នៅក្នុងវីដេអូដែលរងនូវការរិះគន់យ៉ាងចាស់ដៃនោះ Suzy បានបង្ហាត់វិធីតុបតែងមុខដែលធ្វើឱ្យនារីសំបុរសម្នាក់នេះមានសំបុរខ្មៅជាងមុន ខណៈវីដេអូមួយទៀតកញ្ញាតុបតែងខ្លួនដោយឈុតប្រពៃណីឥណ្ឌា ដោយសរសេរបញ្ជាក់ក្រោមឃ្លីបវីដេអូនោះទៀតថា «គ្រឿងសំអាងមានក្លិនដូចសំឡការី» ដែលសំណេរនេះបានធ្វើឱ្យអ្នកលេងបណ្ដាញសង្គមឆេះដុំ។
អ្នកលេងអ៊ិនធឺណិតបានបញ្ចេញចំណាប់អារម្មណ៍លក្ខណៈរិះគន់និងតិះតៀនថាកញ្ញាមើលងាយជាតិសាសន៍ដទៃថា «សំបុរស្បែករបស់ខ្ញុំមិនមែនសម្រាប់ឱ្យគេយកលេងទេ អ្នកគួរតែគោរពវប្បធម៌ខ្ញុំខ្លះ»។
ប្រជាជនអាស៊ីចំនួនធំសម្ដែងការខកបំណងចំពោះទង្វើរបស់ Net Idol រូបនេះ ព្រោះនៅក្នុងវីដេអូនោះបានបង្ហាញឱ្យឃើញថាប្រទេសចិននៅខ្វះការយល់ដឹងពាក់ព័ន្ធនឹងការរស់នៅជាមួយនឹងសាសន៍ដទៃដែលមានស្បែកខ្មៅ «ជនជាតិអាស៊ីនៅមិនទាន់ដឹងច្រើនពីជនជាតិស្បែកខ្មៅ មនុស្សមួយភាគធំនៅមិនទាន់ដឹងទេថាទង្វើបែបនេះគឺជារឿងខុសឆ្គង តែពួកយើងមិនអាចសង្ឃឹមទេថាមនុស្សទូទាំងពិភពលោកយល់និងដឹងពីបញ្ហានេះ»
ប៉ុន្តែមិនមែនមនុស្សទាំងអស់សុទ្ធតែរិះគន់កញ្ញានោះទេ ព្រោះមានអ្នកចូលមក Comment ខ្លះនិយាយថា Suzy មានសមត្ថភាពពូកែព្រោះកញ្ញាអាចតុបតែងមុខបានសមហើយក៏តុបតែងមុខមកបានស្អាតឥតមានទាស់ថែមទៀត៕
