កម្មវិធីប្រកួត Rap ដ៏ធំមួយរបស់ប្រទេសវៀតណាម «Rap Viet» កំពុងតែរងនូវក្ដីអាម៉ាស់យ៉ាងខ្លាំង ដោយសារតែសិល្បករគំនូរដ៏ល្បីល្បាញរបស់ប្រទេស ម៉ិចស៊ិច លោក Jaime Jasso បានចោទប្រកាន់ថាកម្មវិធីនេះបានយកស្នាដៃគំនូរ Graphic របស់លោកទៅប្រើប្រាស់ជាផ្ទាំង Poster ផ្សព្វផ្សាយដោយគ្មានការអនុញ្ញាត។
ទូរទស្សន៍ Vie Channel របស់ប្រទេសវៀតណាម ដែលបានផលិតកម្មវិធីប្រកួតប្រជែង Rap រដូវកាលទីពីរ បានបកស្រាយករណីខាងលើថាបង្ករឡើងដោយសារផ្នែក Design មានការធ្វេសប្រហែសយករូបភាព Free Download (មិនចាយប្រាក់) មកប្រើប្រាស់ ខណៈនេះតំណាងឱ្យក្រុមផលិតបានទំនាក់ទំនងទៅម្ចាស់ស្នាដៃដើម្បីសុំប្រើប្រាស់រូបភាពនេះ។ ប៉ុន្តែបច្ចុប្បន្នរូបភាពដែលត្រូវបានលើកឡើងថាជាប់កម្មសិទ្ធិបញ្ញាត្រូវបានដកចេញពី Page របស់កម្មវិធីហើយ។
សិល្បករគំនូរ Jaime Jasso ដែលជាស្ថាបនិកក្រុមហ៊ុន CGPreceptor បានបង្ហាញការយល់ឃើញចំពោះការយករូបភាព Graphic ទីក្រុងក្នុងពេលរាត្រីទៅប្រើប្រាស់ជា Background នៅលើ Page របស់កម្មវិធីកាលពីកំឡុងខែតុលាកន្លងមក ដោយមិនមានសុំការអនុញ្ញាតពីលោកឬក៏ក្រុម CGPreceptor របស់លោកនោះទេ
Jaime Jasso បានឱ្យដឹងផងដែរថារូបភាពនោះបង្កើតឡើងបច្ចេកទេស 3D Graphics មិនមែនប្រើរូបភាពដែលមានស្រាប់យកមកច្នៃនោះទេ។ ម្ចាស់ស្នាដៃរូបនេះក៏បានបង្ហាញភស្តុតាងរូបភាពដើម និងវីដេអូណែនាំដំណើរក្នុងការគូររូបភាពនេះលើ Youtube តាំងពីឆ្នាំ ២០១៦ មកម្ល៉េះ។
បុរសដដែលរូបនេះបានឱ្យដឹងដែរថាការដែលលោកបង្ខំចិត្តទម្លាយរឿងនេះជាសាធារណៈនៅលើគណនីហ្វេសប៊ុកផ្ទាល់ខ្លួន ព្រោះតែទង្វើនោះមិនគោរពចំពោះលោក ហើយសកម្មភាពនេះត្រូវតែបញ្ឈប់ និងត្រូវតែបង់ថ្លៃកម្មសិទ្ធិបញ្ញា មួយទៀតរឿងដែលធ្វើឱ្យលោកកាន់តែមិនសប្បាយចិត្តខ្លាំងហើយទទួលយកមិនបាននោះគឺ តំណាងរបស់កម្មវិធីបែរជាឆ្លើយតបដោយទម្លាក់ទៅផ្នែករចនា ឬ Design Department ទៅវិញ។ បច្ចុប្បន្នលោកកំពុងតែឱ្យអ្នកតំណាងរបស់លោកនៅប្រទេសវៀតណាមដំណើរការដើម្បីដោះស្រាយបញ្ហានេះ។
កម្មវិធិនេះក៏រងនូវការចោទប្រកាន់ពីការប្រើប្រាស់រូបភាពតារាចិនមកធ្វើជា Main Poster របស់ខ្លួន ហើយទង្វើដែលត្រូវបានលើកឡើងនេះ ត្រូវបានមនុស្សជាច្រើនមិនយល់ស្របចំពោះវិធីសាស្ត្រធ្វើរបស់ក្រុមផលិតកម្មវិធីនេះនោះទេ។ មនុស្សជាច្រើនក៏បានទាមទារឱ្យកម្មវិធីនេះចេញមកពន្យល់យ៉ាងលម្អិតពីបញ្ហានេះ និងសុំទោសជាផ្លូវការណាមួយ។
Huyen Duc បុគ្គលិកផ្នែករចនាម៉ូដ យល់ថាកម្មវិធី Rap Viet មានចេតនាបំពាន ព្រោះនេះមិនមែនជាកំហុសដែលទើបតែកើតឡើងលើកទីមួយនោះទេ ម្យ៉ាងវិញទៀតសកម្មភាពនេះមិនត្រឹមតែធ្វើឱ្យប៉ះពាល់ដល់ទំនាក់ទំនងអន្តរជាតិ និងមុខមាត់របស់ប្រទេសនោះទេ ប៉ុន្តែក៏នឹងធ្វើឱ្យប៉ះពាល់ដល់កម្មវិធីប្រកួតទាំងមូលផងដែរ។
គួរដឹងថា លោក Jaime Jasso គឺជាអ្នកគំនូរជនជាតិ ម៉ិចស៊ិច ដែលមានជំនាញវិជ្ជាជីវៈនិងបទពិសោធរយៈពេល ១៨ឆ្នាំកន្លងមកហើយ នៅក្នុងវិស័យ Visual Effect ទាំងក្នុងប្រទេសម៉ិចស៊ិចនិងសហរដ្ឋអាមេរិក។ លោកក៏ស្ថិតក្នុងក្រុមដែលឈ្នះពានរង្វាន់អូស្ការនៅក្នុងផ្នែក «Best Visual Effects» សម្រាប់រឿង Avatar ក្នុងឆ្នាំ២០០៩ ហើយលោកក៏ស្ថិតក្នុងក្រុមបង្កើត Visual Effect ឱ្យភាពយន្តខ្នាតធំ «Iron Man 2» «Tansformers 3» និងរឿង «Star Wars: The Force Awakens»៕
