បវរកញ្ញា ប៉ូ គឹមថេងសុតធីតា បន្ទាប់ពីដណ្ដើមមកុដ MGC ( Miss Grand Cambodia ) បានកាលពីថ្ងៃទី៩ ខែតុលា ឆ្នាំ២០២១ កន្លងទៅ ខណៈក៏នេះដល់ពេលដែលកញ្ញាស្ពាយមោទកភាពជាតិ ដោយបង្ហាញជំហរយ៉ាងរឹងមាំក្នុងការបោះជំហ៊ានយ៉ាងអង់អាចទៅប្រកួតនៅលើឆាកអន្ដរជាតិ «Miss Grand International» ក្នុងខេត្តភូកេត ព្រះរាជាណាចក្រថៃ។
នៅព្រឹកថ្ងៃទី ១៦ ខែ វិច្ឆិកា ឆ្នាំ២០២១នេះ យោងតាមការបង្ហោះប្រាប់នៅលើទំព័រហ្វេសប៊ុក Miss Grand Cambodia ឱ្យដឹងថា «ពេលនេះកញ្ញាប៉ូ គឹមថេងសុតធីតា កញ្ញាឯកដ៏អស្ចារ្យនៃកម្ពុជា២០២១ ( Miss Grand Cambodia 2021 ) បានត្រៀមនឹងចេញដំណើរហោះហើរពីមាតុភូមិ នៃព្រះរាជាណាចក្រកម្ពុជា ទៅកាន់ព្រះរាជាណាចក្រថៃឡង់ដ៍ ខេត្តភូកេតហើយ ជូនពរកញ្ញាអាចធ្វើដំណើរប្រកបដោយសុខសុវត្ថិភាពនិងនាំមុខមាត់ជូនមកប្រទេសកម្ពុជាវិញ»។
សូមជម្រាបផងដែរថា MGC ប៉ូ គឹមថេងសុតធីតា មិនត្រឹមតែទទួលបានការចាប់អារម្មណ៍ខ្លាំងនៅក្នុងស្រុកនោះទេ ថែមទាំងល្បីឈ្មោះដល់ប្រទេសជិតខាងថែមទៀតផង។ កញ្ញាធ្លាប់បានចូលរួមសម្ដែងភាពយន្ដជាមួយតារាឯកប្រុសមកពីប្រទេសមីយ៉ាន់ម៉ា លោក Paing Takhon រឿង«ជញ្ជាំងក្រហម»។ ក្រៅពីអ្នកគាំទ្រពោលសរសើរពីសម្រស់ក៏ដូចជាសម្ថភាពរបស់ MGC ប៉ូគឹមថេង សុតធីតា ដែលមានអាយុ ២៣ឆ្នាំ កម្ពស់ ១៧៥ សង់ទីម៉ែត្រ តែកញ្ញាមានការតស៊ូមោះមុតខ្លាំងថែមទាំងមានបទពិសោធជាច្រើនក្នុងវិស័យប្រលងប្រជែងបវរកញ្ញានេះ ដោយនាងធ្លាប់បានចូលរួមប្រកួត Miss ផ្សេងៗកន្លងមកផងដែរ។ អ្នកគាំទ្របានរំពឹងទុកថា កញ្ញា ប៉ូគឹមថេង សុតធីតា នឹងនាំភាពជោគជ័យមកកាន់កម្ពុជាវិញនាពេលឆាប់ៗខាងមុខនេះ។
ដូច្នោះសូមកុំឱ្យខកខានបោះឆ្នោតគាំទ្រ MGC ប៉ូ គឹមថេងសុតធីតា តាមរយៈហ្វេសប៊ុកផេច Miss Grand International នាពេលខាងមុខនេះ៕
