បច្ចុប្បន្នមានរឿងល្អពីរដែលធ្វើឱ្យសាធារណជនមានការចាប់អារម្មណ៍ខ្លាំង និងមានសេចក្ដីអំណរព្រោះតារាស្រីពីរដួងគឺតារាចម្រៀងស្រី ទេព បូព្រឹក្ស បានចំណាយថវិកា៦០០លានរៀលមកផលិតបទចម្រៀងដែលស្ដែងពីស្ត្រីជាអ្នកចម្បាំងដ៏អង់អាចក្លាហានទាក់ទាញបាននូវចំណាប់អារម្មណ៍ក៏ដូចជាការសរសើរយ៉ាងច្រើនមហាសាលពីសំណាក់អ្នកបានទស្សនាស្នាដៃនោះ ខណៈស្រីស្រស់ ប៉ូ គីមថេងសុតធីតា ឯណោះវិញក៏កំពុងតែនៅប្រទេសថៃដើម្បីត្រៀមខ្លួនប្រកួតលើឆាកអន្តរជាតិក្នុងនាមជាស្ត្រីស្អាតនិងឆ្លាត តំណាងឱ្យព្រះរាជាណាចក្រកម្ពុជា ជាងនោះកញ្ញាក៏ជាបេក្ខនារីដែលទទួលបានចំនួន Vote Best Before Arrival ច្រើនផងដែរ។
ការបញ្ចេញនូវវីដេអូ MV ដែលបង្ហាញពីអារ្យធម៌ដ៏រុងរឿង ស្ត្រីខ្មែរដ៏អង់អាចក្លាហានក្នុងសម័យបុរាណ អមជាមួយនឹងអាវុធយុទ្ធភ័ណ្ឌសឹកសង្គ្រាម បានឆក់យកព្រលឹងនិងដួងវិញ្ញាណកូនខ្មែរឱ្យពុះកញ្ជ្រោល ហើយវិលត្រលប់មកមានមោទកភាពចំពោះជាតិសាសន៍ ប្រវត្តិសាស្ត្រដ៏រុងរឿង និងដឹងគុណចំពោះបុព្វបុរសដែលបានបូជាសាច់ស្រស់ឈាមស្រស់ ដើម្បីថែរក្សាការពារទឹកដីសុវណ្ណភូមិសម្រាប់កូនខ្មែរជំនាន់ក្រោយ។
កន្លងមកកញ្ញា ទេព បូព្រឹក្ស តែងតែព្យាយាមបញ្ជ្រាបបញ្ចូលនូវសំលៀកបំពាក់ប្រពៃណីវប្បធម៌ក្នុងបទចម្រៀងចង្វាក់ញាក់កន្ត្រាក់អារម្មណ៍របស់ក្នុងគោលបំណងចង់បង្ហាញដល់យុវជនជំនាន់ក្រោយពីសម្បត្តិវប្បធម៌របស់ខ្លួន ប៉ុន្តែកញ្ញាតែងតែរងនូវការជេរប្រមាថនិងមុះសារពីសំណាក់បុគ្គលដែលច្រណែននិងមិនគាំទ្រកញ្ញា។ យ៉ាងណាមិញវីដេអូដែលចំណាយប្រាក់គិតជាដុល្លារជាង១៤ដុល្លារនេះ កញ្ញាមិនរុញរានឹងលក់ឡានមួយគ្រឿងមកផលិតដើម្បីជាឯកសារ ជាបណ្ណាល័យមានរូបភាព ទុកជាសម្បត្តិកេរ្តិ៍មរតកសម្រាប់ជាតិនិងក្មេងៗជំនាន់ក្រោយៗទៀត បានយល់ដឹងនិងស្គាល់ពីប្រវត្តិសាស្ត្ររបស់ជាតិខ្លួន។
ងាកមកបវរកញ្ញា MGC ២០២១ កញ្ញា ប៉ូ គីមថេងសុតធីតា ក៏កំពុងតែសកម្មក្នុងការបង្ហាញនូវវប្បធម៌ជាតិ សំលៀកបំពាក់ប្រពៃណីខ្មែរ ឱ្យបរទេសកាន់តែស្គាល់ច្បាស់ថែមមួយកម្រិត តាមរយៈការចេញទៅតំណាងជាតិក្នុងការប្រកួត Miss Grand International នៅប្រទេសថៃ។ ការប្រកួតមិនទាន់ចាប់ផ្ដើមផងស្រីស្អាតរបស់កម្ពុជារូបនេះបានឆក់នូវចំណាប់អារម្មណ៍ពីបេក្ខនារីពីប្រទេសផ្សេងៗ សាធារណជន អ្នកកាសែតជាតិនិងអន្តរជាតិ ព្រោះតែកញ្ញាមានភាពអង់អាចក្លាហាន មានជំនឿចិត្តខ្ពស់ និងត្រៀមខ្លួនជាពិសេសដើម្បីការប្រកួតតំណាងប្រទេសកម្ពុជាលើកនេះ ហេតុដូច្នេះទើបអ្នកគាំទ្រមានការរំពឹងខ្ពស់លើកញ្ញាក្នុងការនាំយកនូវមុខមាត់និងកិត្តិយសត្រលប់មកកាន់ដែនដីសុវណ្ណភូមិវិញ។
សង្កេតឃើញថាប៉ុន្មានថ្ងៃមកនេះនៅលើបណ្ដាញសង្គមមហាជនហាក់ផ្ដោតការចាប់អារម្មណ៍ទៅលើរឿងល្អៗចំនួន២នេះ ដែលធ្វើឱ្យសហគមន៍អនឡាញដ៏ធំហ្វេសប៊ុកមានតែភាពកោតសរសើរ ការចែករំលែករឿងរ៉ាវល្អ ពាក់ព័ន្ធនឹងស្ត្រី២រូបនេះ បង្កជាបរិយាកាសដ៏សែនរីករាយ និងស្នាមញញឹមឱ្យគ្រប់ៗគ្នា ជាពិសេសក្នុងឱកាសដ៏វិសេសវិសាលនៃពិធីបុណ្យអុំទូក អកអំបុក និងបណ្ដែតប្រទីបឆ្នាំ២០២១ នេះ ឱ្យកាន់តែគគ្រឹកគគ្រេងទ្វេថែមទៀត។
ត្រយងសូមជូនពរឱ្យស្ត្រីទាំងពីររូបគឺ កញ្ញា ទេព បូព្រឹក្ស និងកញ្ញា ប៉ូ គីមថេងសុតធីតា ទទួលបានជោគជ័យក្នុងដំណើរការការងារសិល្បៈរៀងៗខ្លួន ហើយក៏សង្ឃឹមយ៉ាងមុតមាំថានៅឆ្នាំ២០២២ខាងមុខនេះ ប្រទេសកម្ពុជានឹងវិលត្រលប់មករកប្រក្រតីភាពដូចកាលពីមុនវិញ៕