នៅថ្ងៃទី២៣ ខែវិច្ឆិកា ឆ្នាំ២០២១ នេះ តារាសម្ដែងរឿងភាគកូរ៉េដ៏ល្បីល្បាញ Park Shin Hye បានចេញសេចក្ដីប្រកាសដ៏សំខាន់មួយតាមរយៈក្លឹបអ្នកគាំទ្រផ្លូវការរបស់ខ្លួន ដែលជាដំណឹងមួយធ្វើឱ្យអ្នកគាំទ្រកញ្ញាមានការភ្ញាក់ផ្អើលលាយឡំដោយក្ដីរំភើបរីករាយចំពោះដំណឹងដ៏រីករាយរបស់តារាស្រីរូបនេះ។
នៅក្នុងសេចក្ដីរបស់ Park Shin Hye បានសរសេររៀបរាប់ថា៖
«សួស្ដី! នាងខ្ញុំ Park Shin Hye។ សព្វថ្ងៃនេះអាកាសធាតុកាន់តែត្រជាក់ហើយ។ ខ្ញុំកំពុងគិតថា តើអ្នកទាំងអស់គ្នាបានថែរក្សាសុខភាពរបស់ខ្លួនដែរទេ? មុននេះបន្តិចខ្ញុំរកឃើញកុងត្រារបស់ខ្ញុំដំបូងដែលខ្ញុំបានចុះហត្ថាលេខាជាតារាប្រចាំក្រុមហ៊ុនរបស់ខ្ញុំកាលពី២០ឆ្នាំមុន។ កាលណោះខ្ញុំសិក្សាថ្នាក់ទី៦ ហើយចូលមកដល់ឆ្នាំទីពីរនៅក្នុងថ្នាក់វិទ្យាល័យ ខ្ញុំបានចាប់ផ្ដើមអាជីពជាតារាសម្ដែង។ ចាប់តាំងពីពេលនោះមកដល់ពេលនេះមានរយៈពេល១៨ឆ្នាំហើយ។ ពេលវេលាពិតជាដើរលឿនដូចជាហោះ។
មានមនុស្សជាច្រើនបានចូលមកក្នុងជីវិតយុវវ័យរបស់ខ្ញុំ ខ្ញុំសូមអរគុណចំពោះការស្រលាញ់ និងការលើកទឹកចិត្ត ខ្ញុំបានក្លាយជាតារាសម្ដែងដែលបង្ហាញនូវផ្នែកជាច្រើនរបស់ខ្ញុំតាមរយៈការសម្ដែងជាច្រើនរបស់ខ្ញុំ។ ខ្ញុំមានពេលរីករាយជាច្រើននៅខាងមុខកាំមេរ៉ា ប៉ុន្តែខ្ញុំក៏មានពេលវេលាជាច្រើនដែលពិបាកដូចគ្នា តែព្រោះមានហ្វេនផ្ដល់កម្លាំងចិត្តនិងទំនុកចិត្តចំពោះខ្ញុំ។ ពាក្យសម្ដីរបស់អ្នកប្រាប់ខ្ញុំបានធ្វើឱ្យមានកម្លាំង ហើយក៏គ្រប់គ្រាន់ឱ្យខ្ញុំអាចក្រោកឡើងជាថ្មីវិញបាន។ ថ្ងៃនេះមានហេតុផលច្រើនយ៉ាងដែលធ្វើឱ្យខ្ញុំភ័យព្រួយក្នុងការប្រាប់ដំណឹងមួយនេះដល់អ្នកទាំងអស់គ្នា ដោយសារតែខ្ញុំបារម្ភខ្លាចអ្នកគ្រប់គ្នាតក់ស្លុត។ ប៉ុន្តែខ្ញុំចង់ឱ្យអ្នកទាំងអស់គ្នាក្លាយជាមនុស្សទីមួយដេលដឹងរឿងរបស់ខ្ញុំ។
ខ្ញុំកំពុងតែជិតរៀបការជាមួយមនុស្សដែលខ្ញុំបានសេពគប់មួយរយៈមកហើយ គេជាមនុស្សម្នាក់ដែលចាំគាំទ្រខ្ញុំរហូតមក ហើយគេក៏ជាម្នាក់ដែលបំពេញរាល់ចំណុចខ្វះខាតរបស់ Park Shin Hye ពេលនេះខ្ញុំកំពុងតែរៀបចំផែនការជីវិតក្នុងនាមជាដៃគូរៀបការរបស់មនុស្សម្នាក់
លើសពីនេះទៀត ខ្ញុំក៏រាងស្ទាក់ស្ទើក្នុងការពិភាក្សារឿងនេះជាមួយនឹងអ្នកទាំងអស់គ្នាផងដែរខណៈដែលពួកខ្ញុំកំពុងតែរៀបចំកម្មវិធីរៀបការ ជីវិតថ្មីដ៏មានតម្លៃមួយទៀតបានចាប់បដិសន្ធិឡើង។ ខ្ញុំចង់ប្រាប់អ្នកទាំងអស់គ្នាណាស់ ខ្ញុំសន្យាថានឹងបង្ហាញតែរឿងល្អៗរបស់ខ្ញុំ បន្ទាប់ពីក្លាយជាសមាជិកម្នាក់ក្នុងគ្រួសារតូចរបស់ខ្ញុំ
ជាទីបញ្ចប់ខ្ញុំចង់សុំអរគុណចំពោះក្ដីស្រលាញ់និងការគាំទ្រចំពោះខ្ញុំ ទោះជាខ្ញុំនៅខ្វះខាតជាច្រើនចំណុចក្ដី។ ខ្ញុំប្រហែលជាអាចត្រូវការសំរាកមួយរយៈ តែខ្ញុំនឹងព្យាយាមឱ្យអស់ពីសមត្ថភាពដើម្បីវិលត្រលប់មកវិញក្នុងនាមជាតារាសម្ដែងមួយរូបយ៉ាងឆាប់ មិនឱ្យអ្នកទាំងអស់គ្នាចាំខ្ញុំយូរពេកនោះទេ។ រហូតដល់ពេលយើងជួបគ្នាជាថ្មី សូមអ្នកទាំងអស់គ្នាមានសុខភាពល្អ នៅពេលនេះខ្ញុំសូមលាអ្នកទាំងអស់គ្នាត្រឹមនេះហើយ។
គួរដឹងថាតារាសម្ដែងស្រី Park Shin Hye បានទទួលស្គាល់ជាសាធារណៈថាខ្លួនបានសេពគប់គ្នាជាមួយនឹងសិស្សប្អូនជាតារាសម្ដែង Choi Tae Joon កាលពីឆ្នាំ២០១៧។ យោងតាមការឱ្យដឹងពីផលិតកម្ម Salt Entertainment បានប្រកាសឱ្យដឹងថា Park Shin Hye និង Choi Tae Joon នឹងរៀបចំកម្មវិធីអាពាហ៍ពិពាហ៍ជាលក្ខណៈឯកជននៅថ្ងៃទី២២ ខែមករា ឆ្នាំ២០២២ ខាងមុខនេះ៕
សូមអបអរសាទរចំពោះគូស្វាមីភរិយា និងអនាគតលោកប៉ាអ្នកម៉ាក់ថ្មោងថ្មី!
.