ម្ចាស់ម្កុដ Miss Univeres Cambodia 2021 បវរកញ្ញា ងិន ម៉ារ៉ាឌី កំពុងត្រៀមខ្លួនជាស្រេច តំណាងឲ្យកម្ពុជាទៅចូលរួមប្រកួតប្រជែងជាមួយបណ្ដាប្រទេសជាច្រើនទៀតមកពីជុំវិញពិភពលោកនៅលើឆាកអន្ដរជាតិ Miss Universe International 2021។
ដោយផ្អែកតាមហ្វេសប៊ុករបស់បវរកញ្ញា ងិន ម៉ារ៉ាឌី Miss Universe Cambodia 2021 ក៏បានបង្ហោះឱ្យដឹងពីអត្ថន័យឈុត «វប្បការិកាចត្វានិមិត្ត» ឈុតតំណាងជាតិត្រៀមចូលរួមប្រកួតនៅថ្ងៃទី១២ ខែធ្នូ ឆ្នាំ២០២១នេះ ក្នុងប្រទេសអ៊ីស្រាអែល។
កញ្ញា ងិន ម៉ារ៉ាឌី បានបង្ហោះសាររៀបរាប់ថា «ឈុត: វប្បការិកា ចត្វានិមិត្ត ឈុតនេះត្រូវតំណាងឱ្យកម្ពុជាក្នុងកម្មវិធី Miss Universe international នៅប្រទេស Israel នាពេលខាងមុខនេះ។ វប្បការិកា សំដៅលើ ស្ត្រីជាអ្នកសាបព្រោះ អ្នកផ្សព្វផ្សាយ ចត្វា មានន័យថា ៤ និមិត្ត គឺ គោល។ ជារួម : ស្ត្រីជាអ្នកផ្សាយចេញនូវចំណុចគោលទាំងបួន នៃសិល្បៈវប្បធម៌ជាតិ ១.ផ្ទាំងស្បែកធំស្ថិតក្នុងទម្រង់សិល្បៈល្ខោលស្រមោលស្បែកធំរបស់កម្ពុជា។ ២.ខ្មុកទសមុខ: ខ្មុក ជាមុខដែលតួអង្គប្រើសម្រាប់ពាក់នៅក្នុងប្រភេទល្ខោនខោលខ្មែរ និងមានតួអង្គសំដែងសុទ្ធតែជាមនុស្សប្រុសទាំងអស់ ។ ៣.របាំព្រះរាជទ្រព្យ: ច្នៃជាអឌ្ឍកាយរាមសីតា ក្នុងទម្រង់របាំព្រះរាជទ្រព្យ។ លក្ខណៈពិសេសនៃរបាំគឺអ្នករាំសុទ្ធតែជាមនុស្សស្រី លើកលែងតែតួអង្គស្វា និងឥសីប៉ុណ្ណោះ ដែលសំដែងដោយមនុស្សប្រុស។ ៤.ផ្ការំដួល: ព្រះរាជាណាចក្រកម្ពុជា បានកំណត់យកផ្ការំដួលជាផ្កាតំណាងជាតិ ដោយប្រៀបប្រដូចផ្ការំដួលទៅនឹងនារីក្រមុំដែលទន់ភ្លន់ស្រស់ស្អាតយ៉ាងនោះដែរ ។ តម្លើងឈុតដោយ ទឹក គ្រឿង នឹងក្រុមក្មេងវត្ត។ កាត់ដេរដោយ លោកដែន ដាណូកាត់ដេរ »។
គួរបញ្ជាក់បន្ថែមទៀតថា ខណៈការរៀបរាប់អត្ថន័យរបស់ឈុត «វប្បការិកា ចត្វានិមិត្ត» បានយ៉ាងក្បោះក្បាយខាងលើនេះ អ្នកគាំទ្រសរសើរលើកទឹកចិត្តបន្ថែមថា «នៅពេលដែលកញ្ញាគ្រងឈុតនេះហើយ មើលទៅមានភាពអង់អាច រឹងមាំខ្លាំង និងសរសើរចំពោះការខិតខំប្រឹងប្រែងលះបង់ពេលវេលា កម្លាំងកាយចិត្តពិតប្រាកដក្នុងការធ្វើឈុតតំណាងជាតិដ៏អស្ចារ្យប្រកបដោយប្រណីតភាព។
យ៉ាងណាមិញ អ្នកគាំទ្រ កញ្ញា ងិន ម៉ារ៉ាឌី បានបង្ហាញអារម្មណ៍ត្រេកអរ និងមោទនភាពខ្លាំងចំពោះស្នាដៃរចនាម៉ូដឈុតខាងលើនេះណាស់ ដោយកោតសរសើរពីការព្យាយាមប្រឹងប្រែងផ្សព្វផ្សាយ អភិរក្ស ការពារវប្បធម៌និងថែរក្សាអរិយធម៌ដ៏រុងរឿងរបស់ខ្មែរ ទៅកាន់ឆាកអន្ដរជាតិមួយនេះ៕
សូមចុចទស្សនាវីដេអូព័ត៌មានខាងក្រោមនេះ៖