ចំពោះតារាស្រីថៃដ៏ល្បីឈ្មោះ នាង Chompoo Araya បើទោះសព្វថ្ងៃនេះមិនបានទទួលការងារសម្ដែងរឿងភាគទូរទស្សន៍ក៏ដោយ ក៏ប៉ុន្ដែ អ្នកគាំទ្រនាង នៅតែបន្ដតានដានអំពីជីវិតឯកជនភាពរបស់នាង សកម្មភាពជីវិតប្រចាំ និងជីវិតក្រុមគ្រួសាររបស់នាង ដែលនាងកំពុងពពោះកូនទី។
ព័ត៌មានចុងក្រោយបំផុតរបស់តារាស្រីរូបនេះ ត្រូវបានគេដឹងថា នៅក្នុងកម្មវិធី 3Zap ខណៈកំពុងសម្ភាសតារាស្រីម្នាក់ សុខៗស្រាប់តែនិយាយដល់អំពីទំនាក់ទំនងស្នេហា និងជីវិតគ្រួសារ។ សំនួរមួយនេះ ក៏ស្រាប់តែចាក់ដោតដល់អារម្មណ៍តារាស្រី Chompoo Araya ទៅវិញ។ ក្រោយពីប៉ះទង្គិចផ្លូវអារម្មណ៍ភ្លាមៗ នាង Chompoo Araya បានលូកមាត់ក្នុងសំណួរនេះ ដោយលើកឡើងថា នៅពេលនេះនាងកំពុងពពោះកូនទី៣ ក្នុងមានវ័យ៤០ឆ្នាំ ។ នាងមានចិត្តច្រណែនចំពោះស្ត្រីដែលមានគូលឿន និងមានកូនលឿន។ ក្ដីសុខដ៏ធំបំផុតគឺ គ្មានសេរីភាពណាស្មើនឹងកូននោះទេ។
ភ្លាមៗនោះ នាង Chompoo Araya បានស្រក់ទឹកភ្នែកកណ្ដាលកម្មវិធីសម្ភាសតែម្ដង។ នាងបានបន្ដនិយាយទាំងទឹកភ្នែកថា នៅពេលដែលមានកូន នាងយល់អារម្មណ៍អ្នកមានគុណ។ បើទោះជាអ្នកណាមកជេរ ឬមករិះគន់អ្វីក៏ដោយ ក៏នាងគ្មានអារម្មណ៍ប៉ះពាល់ផ្លូវចិត្តដែរ នោះក៏ដោយសារតែការព្រួយបារម្ភពីកូនគឺជារឿងសំខាន់ នាងថានេះហើយជាការពិតដែលស្ត្រីគ្រប់រូបតែងតែមានអារម្មណ៍ស្រឡាញ់កូន។
គួររំលឹកដែរ កាលពីកន្លងទៅថ្មីៗនេះ តារាស្រី Chompoo Araya ធ្លាប់រងការរិះគន់ចំពោះរឿងឪពុកឈឺធ្ងន់ ស្របពេលនាងកំពុងពពោះកូនទី៣។ ស្វាមីរបស់តារាស្រីរូបនេះ ធ្លាប់បានបញ្ជាឱ្យកម្មករ និងបុគ្គលិកនៅក្នុងរោងចក្រ ទៅបរិចា្ចគឈាមក្នុងគោលបំណងស្វែងប្រភេទឈាមដែលដូចប្រភេទឈាមរបស់ឪពុកភរិយាខ្លួន ដែលកំពុងធ្លាក់ខ្លួនឈឺខ្លាំង និងត្រូវការសង្គ្រោះបន្ទាន់។ បន្ទាប់មកហ្វេនៗរបស់នាងមិនពេញយ៉ាងខ្លាំងចំពោះទង្វើនេះ ក៏បានរិះគន់ខ្លាំងៗ ព្រមទាំងដាក់សម្ពាធឱ្យតារាស្រីរូបនេះថា ដើម្បីបង្ហាញក្ដីស្រឡាញ់ចំពោះតារាស្រីជាទីស្នេហ៍ចង់ជួយជីវិតឪពុក មិនគួរណាស្វាមីប្រើអំណាចបង្ខំឱ្យកម្មករមួយរោងចក្រ ទៅប៊ូមឈាមបែបនេះសោះ ។
យ៉ាងណាមិញ ចុងក្រោយនេះ នាង Chompoo Araya បានអះអាងថា នេះមិនមែនហេតុផលសំខាន់ដែលធ្វើឱ្យស្រក់ទឹកភ្នែកនោះទេ អ្វីដែលសំខាន់គឺនាងកំពុងព្រួយបារម្ភពីកូនទី៣ និងសុខភាព ខណៈដែលពេលនេះងមានវ័យ៤០ឆ្នាំទៅហើយ៕