«សារព័ត៌មានត្រយង»និង«ក្លិបបាល់ទាត់វិសាខា» សមាជិកពានរង្វាន់លីគកំពូលកម្ពុជា បានចុះអនុសារណៈយោគយល់គ្នា (MOU) ដើម្បីធ្វើជាដៃគូក្នុងការផ្សព្វផ្សាយព័ត៌មានកីឡានៅកម្ពុជា ឱ្យកាន់តែទូលំទូលាយទៅកាន់សាធារណជន ទាំងក្នុងប្រទេស ក្នុងតំបន់និងសកលលោក។
ពិធីចុះកិច្ចព្រមព្រៀងនេះធ្វើឡើងនៅកីឡដ្ឋានវិសាខា នៅរសៀលថ្ងៃចន្ទ ទី២៩ ខែវិច្ឆិកា ឆ្នាំ២០២១ ដោយមានលោកស្រី ហេង សុខនី នាយិកាផ្នែកទីផ្សារ លោក ម៉ុក សុធា នាយកផ្នែកលក់ និងលោក ម៉ឺន រស្មី នាយក ផ្នែកកីឡា តំណាងសារព័ត៌មានត្រយង។ ចំណែកភាគីខាងក្លិបបាល់ទាត់វិសាខា វិញមាន លោកជំទាវ នូ សុវត្ថិ ចាន់វល័ក្ខ ជាអនុប្រធានក្លិប និងកញ្ញា អ៊ូ បញ្ញាសុកិត្យា នាយិការបស់ក្លិប។
កិច្ចព្រមព្រៀងរវាងសារព័ត៌មាននិងក្លិបបាល់ទាត់អាជីពនេះ ដោយធ្វើកិច្ចសហប្រតិបត្តិការជាមួយគ្នា ក្នុងការផ្សព្វផ្សាយព័ត៌មាន និងការផ្សាយបន្ដផ្ទាល់ផ្សេងៗ ទាក់ទងនឹងកីឡាបាល់ទាត់ និងកម្មវិធីផ្សេងៗ ដែលរៀបចំដោយក្លិបវិសាខា។ ភាគីទាំង២ រំពឹងថាក្រោមកិច្ចសហប្រតិបត្តិការ នៃអនុស្សារណៈយោគយល់គ្នានេះ នឹងជួយពង្រីកនូវវិសាលភាពព័ត៌មានកីឡាបាល់ទាត់នៅកម្ពុជាឲ្យកាន់តែទូលំទូលាយបន្ថែមទៀត៕
