នៅពេលនេះមានការវែកញែកខ្លាំងចំពោះដំណឹងកំពូលតារាស្រីហ្វីលីពីន Marian Rivera ដែលមហាជនអ្នកគាំទ្រស្គាល់ថានាង ម៉ារីម៉ា នឹងមានវត្តមានចូលរួមជាគណៈកម្មការ Miss Universe 2021 ថាជាការពិត ឬគ្រាន់តែជាការសង្ស័យ។ អ្នកគ្រប់គ្រងតារាស្រីរូបនេះ នៅមិនទាន់មានសេចក្ដីប្រកាសអះអាងជាផ្លូវការណាមួយនៅឡើយទេ។ ក៏ប៉ុន្ដែបណ្ដាញសង្គម Twitter ឯណេះវិញ អ្នកគាំទ្រនាងមានការចង្អុលបង្ហាញភ័ស្ដុតាងអះអាងថា នាង Marian Rivera បានចូលរួមធ្វើជាគណៈកម្មការ Miss Universe ក្នុងឆ្នាំនេះ។
អ្នកលេងបណ្ដាញសង្គម Twitter បានទាញអះអាងអំណាងថា នៅលើ Instagram នាង Marian Rivera បានបង្ហោះរូបភាពថ្មី ដែលមានទីតាំងចេញពីប្រទេស អ៊ីស្រាអែល ដោយដាក់ចំណងជើង Caption ថា “Honored. #Grateful”។ អ្វីដែលធ្វើឱ្យអ្នកលេងបណ្ដាញសង្គមប្រាកដចិត្តខ្លាំងនោះ គឺកញ្ញាបានដាក់ Emoji រូបមកុដ និងរូបផ្កាយ ហាក់ដូចបង្ហើបប្រាប់អ្នកគាំទ្រថា អ្នកនាងកំពុងធ្វើដំណើរទៅអ៊ីស្រាអែលចូលរួមការប្រកួតបវរកញ្ញាចក្រវាឡឆ្នាំនេះតែម្ដង។
កាលពីម៉ោង ៣ រសៀលក្នុងថ្ងៃទី១ ខែធ្នូ នេះ មានសារព័ត៌មានកម្សាន្ដប្រទេសហ្វីលីពីន GMA Entertainment ក៏បានចេញផ្សាយពីព័ត៌មានអះអាងថា តារាស្រីរូបនេះបានចូលគណៈកម្មការ Miss Universe 2021 ដោយប្រើចំណងជើងថា « Marian Rivera នឹងនាំបទពិសោធន៍រាប់ឆ្នាំក្នុងនាមជាសិល្បការិនី ចូលរួមធ្វើជាគណៈកម្មការវិនិច្ឆ័យបវរកញ្ញាចក្រវាឡក្នុងឆ្នាំនេះ»។
សូមជម្រាបផងដែរ យ៉ាងណាមិញ អ្នកគាំទ្រក៏បានចាប់អារម្មណ៍ចំពោះការ Comment របស់ស្វាមីនាង ដែលបានសរសេរពាក្យថា « Miss you » ដែលនេះបញ្ជាក់ឱ្យឃើញថា អ្នកទាំងពីរពិតជាមិនបាននៅជិតគ្នាពិតប្រាកដមែន ហើយតារាស្រីរូបនេះគឺពិតជាបានចាកចេញពីប្រទេសហ្វីលីពីន ហោះកាន់ប្រទេសអ៊ីស្រាអែលក្នុងការចូលរួមធ្វើជាគណៈកម្មការ Miss Universe 2021 ជាការពិតមែន៕