«ប្ដីក្រោមគ្រែ» ជាចំណងជើងបទថ្មីរបស់តារាចម្រៀងប្រុស បូ តាំងហៀង ដែលអ្នកគាំទ្រគ្រប់គ្នាស្គាល់ថា ជាម្ចាស់បទល្បី «បើបងបាត់ការចងចាំ» ។ តារាចម្រៀងប្រុសរូបសង្ហានេះ បានខកខានក្នុងការចេញចម្រៀងជាយូរណាស់មកហើយ រហូតដល់អ្នកគាំទ្រគិតថា លោកអាចនឹងលាលែងចេញពីវិស័យសិល្បៈ។ តែការពិតទៅលោកនៅតែបន្ដបម្រើអារម្មណ៍មហាជនក្នុងវិស័យចម្រៀងជារៀងរាល់ថ្ងៃ តាមរយៈការច្រៀងនៅតាមភោជនីយដ្ឋាន ឬផាប់រាត្រីជាដើម។
ថ្មីៗនេះ លោក បូ តាំងហៀង បានបង្ហាញវត្តមានជាតារាចម្រៀងនៅក្នុងក្រុម Arom Music និងជាតារាចម្រៀងប្រុសប្រចាំក្រុមផងដែរ។ តាំងនាមជំនួសឱ្យក្រុមចម្រៀង Arom Music លោក ហេង គីហួរ ជាអ្នកគ្រប់គ្រងក្រុម នេះបានប្រាប់អ្នកសារព័ត៌មានត្រយងថា វត្តមានរបស់តារាចម្រៀង បូ តាំងហៀង គឺមិនមានកុងត្រាជាមួយផលិតកម្មណាមួយទេ ក៏ប៉ុន្ដែលោកបានចូលរួមជាមួយក្រុមចម្រៀង Arom Music ដោយចេញពីបេះដូង និងឆន្ទៈស្រឡាញ់សិល្បៈចម្រៀងនេះ។ លោក គីហួរ ហៅ ហួរចៃ បានបន្ដទៀតថា លោកនឹងត្រៀមបទចម្រៀងថ្មីជាច្រើនបទទៀតសម្រាប់លោក បូ តាំងហៀង ដែលសុទ្ធសឹងជាបទនិពន្ធថ្មីទាំងអស់ក្នុងឆ្នាំ២០២។
បើទោះបីជាចំណងជើងស្ដាប់មើលទៅរៀងសាហាវបន្ដិច តែបទ«ប្ដីក្រោមគ្រែ» ត្រូវបានរៀបរាប់ពីអារម្មណ៍សោកសៅរបស់បុរសម្នាក់ ដែលខកចិត្តនឹងរឿងស្នេហា ត្រូវសង្សាររៀបការចោល។ អត្ថន័យបទនេះ មិនត្រឹមតែបង្ហាញពីភាពឈឺចាប់របស់មនុស្សប្រុសប៉ុណ្ណោះទេ តែក៏បានបង្កប់សាច់រឿងពីក្រោយ ដែលជាហេតុនាំឱ្យគូស្នេហ៍ក្នុងបទចម្រៀងនេះ ឈានដល់តំណាក់កាលចែកផ្លូវគ្នាផងដែរ។ បទនេះមានការនិពន្ធទំនុកច្រៀងដោយលោក ស៊ុន រដ្ឋា ដែលគេស្គាល់ថាជាអ្នកនិពន្ធបទល្បីៗឱ្យផលិតកម្មសាន់ដេ។
ចង់ដឹងថា សាច់រឿងទាំងមូល និងអត្ថន័យបទ «ប្ដីក្រោមគ្រែ» រៀបរាប់យ៉ាងណាខ្លះនោះ តោះ! មកទស្សនាវីដេអូខាងក្រោមនេះ៖