នៅរសៀលថ្ងៃសៅរ៍ សប្ដាហ៍នេះគណៈកម្មការរៀបចំការប្រកួតពានរង្វាន់បាល់ទាត់ AFF Suzuki Cup 2020 បានរៀបចំសន្និសីទសារព៌តមានតាមអនឡាញ រវាងអ្នកសារព័ត៌មានក្នុងតំបន់អាស៊ាន ជាមួយគ្រូបង្វឹកទាំង៥ក្រុមក្នុងពូល B នៃពានរង្វាន់មុន មុនដំណើរការចាប់ពីថ្ងៃទី៦ ខែធ្នូ តទៅ។
លោក Ryu Hirose គ្រូបង្វឹកក្រុមកម្ពុជា បានលើកឡើងថា៖ «សម្រាប់យើងគោលដៅគឺប្រកួតក្នុងកីឡាស៊ីហ្គេម ឆ្នាំ២០២៣ នៅលើទឹកដីរបស់យើង។ យើងសង្ឃឹមថា កីឡាករវ័យក្មេងមានបទពិសោធន៍ល្អក្នុងការប្រកួតនេះ។ យើងបានជួបប្រទះការលំបាកជាច្រើន ក្នុងអំឡុងពេលមានជំងឺកូវីដ-១៩ ទើបមិនមានការប្រកួតមិត្តភាពបាន តែយ៉ាងណាគោលដៅរបស់យើង គឺនៅតែជាស៊ីហ្គេម»។
អត្ថបទពាក់ព័ន្ធ៖កីឡាករ ដែលអាចរកគ្រាប់បាល់បានមុនគេបង្អស់ឱ្យកម្ពុជា ក្នុងពានរង្វាន់ AFF Suzuki Cup
ដោយឡែកគ្រូបង្វឹកជនជាតិកូរ៉េខាងត្បូង Shin Tae-young របស់ឥណ្ឌូណេស៊ី វិញបានបង្ហាញទស្សនៈថា៖«ខ្ញុំរីករាយដែលបានជួបមិត្តរួមការងារនៅអាស៊ីអាគ្នេយ៍ តែសម្រាប់ខ្ញុំ នេះជាលើកដំបូងហើយដែលដឹកនាំក្រុមក្នុងពានរង្វាន់នេះ ហើយសង្ឃឹមថានេះជាបទពិសោធន៍ដ៏ល្អក្នុងអាជីពរបស់ខ្ញុំ។ យើងនឹងធ្វើឱ្យបានល្អគ្រប់ការប្រកួត ព្រោះគោលដៅរបស់យើងគឺឈ្នះ»។
សម្រាប់លោកគ្រូបង្វឹកជនជាតិកូរ៉េខាងត្បូង Park Hang-seo របស់ក្រុមជើងឯកឆ្នាំចាស់វៀតណាម បានបង្ហាញចំណាប់អារម្មណ៍ថា៖ «ខ្ញុំរីករាយណាស់ដែលបានជួបគ្រូបង្វឹកក្នុងពូល B។ វៀតណាម នឹងខិតខំគ្រប់ការប្រកួតដើម្បីទទួលបានលទ្ធផលល្អបំផុតក្នុងការប្រកួតនីមួយៗ ព្រោះថាយើងទើបតែបានលេង៦ប្រកួតក្នុងការប្រកួតជម្រុះជុំទី៣ នៃពាន 2022 FIFA World Cup Qatarហើយចាញ់គ្រប់ការប្រកួត។ បញ្ហារកពិន្ទុមិនបាន បានប៉ះពាល់ដល់បរិយាកាសនៃក្រុមទាំងមូល ណាមួយក្នុងនាមជាក្រុមការពារតំណែងជើងផង គឺវាជាសម្ពាធមួយសម្រាប់យើង។ យើងមិននិយាយពីលទ្ធផលជាមុនបានទេ ប៉ុន្តែយើងនឹងរៀបចំឲ្យបានល្អ»។
អត្ថបទពាក់ព័ន្ធ៖កីឡាករកំពុងប្រកបអាជីពនៅទ្វីបអឺរ៉ុប ១៣រូបនឹងបង្ហាញខ្លួនក្នុងពាន AFF Suzuki Cup
ចំណែកលោក Tan Cheng Hoe គ្រូបង្វឹកក្រុមម៉ាឡេស៊ី បានលើកឡើងដែរថា៖ «អ្នកគាំទ្រយើងជាច្រើនមានការរំពឹងទុកខ្ពស់ពីពួកយើង ដូច្នេះសង្ឃឹមថាអ្នកនឹងរីករាយជាមួយការប្រកួតនេះជាមួយជម្រើសជាតិយើងទាំងមូល។ យើងទើបតែមកដល់សិង្ហបុរី នៅថ្ងៃទី៣ ធ្នូ តែយើងបានប្រមូលផ្តុំនៅកូឡាឡាំពួរ មួយរយៈ ហើយក៏ជួបបញ្ហាមួយចំនួនខ្លះដែរ។ ប៉ុន្តែក្រុមនៅតែផ្តោតអារម្មណ៍ និងសុទិដ្ឋិនិយមក្នុងគ្រប់ការប្រកួតទាំងអស់ ជាពិសេសគឺព្យាយាមរក្សាលំនឹងក្រុមជាមុនសិន សម្រាប់ការប្រកួតបើកឆាកជាមួយកម្ពុជា នៅថ្ងៃទី៦ ធ្នូ»។
សម្រាប់គ្រូបង្វឹករបស់ក្រុមជម្រើសជាតិឡាវ ដែលជាជនជាតិសិង្ហបុរី គឺលោក V. Selvaraj បានបង្ហាញទស្សនៈថា៖«យើងរីករាយណាស់ដែលបានចូលរួមក្នុងព្រឹត្តិការណ៍នេះ។ យើងនឹងរួមគ្នាដើម្បីទទួលបានលទ្ធផលល្អ។ សម្រាប់យើងមានកីឡាករក្មេងៗច្រើន ហើយក៏មានបញ្ហាប្រឈមខ្លាំងដែរសម្រាប់កីឡាករ តែឆន្ទៈរបស់យើងគឺនឹងព្យាយាមឱ្យអស់ពីសមត្ថភាព»។
សម្រាប់ប្រកួតបើកឆាកពូល B នេះវិញមាន៖
៦ ធ្នូ ២០២១៖ កម្ពុជា ប៉ះ ម៉ាឡេស៊ី (ម៉ោង៤:៣០នាទី)
៦ ធ្នូ ២០២១៖ ឡាវ ប៉ះ វៀតណាម (ម៉ោង៧:៣០នាទី)
